ആലപ്പുഴ: തടങ്കല്‍ പാളയങ്ങള്‍ നിർമിച്ച് രാജ്യത്ത് അരാജകത്വം സൃഷ്ടിക്കാനാണ് പൗരത്വ നിയമ ഭേദഗതി നിയമത്തിലൂടെ ശ്രമിക്കുന്നതെന്ന് ജസ്റ്റിസ് കെമാല്‍ പാഷ. ആലപ്പുഴ ലജ്‌നത്തുല്‍ മുഹമ്മദിയയുടെയും വിവിധ മഹല്ലുകളുകളുടെയും ആഭിമുഖ്യത്തില്‍ സംഘടിപ്പിച്ച പ്രതിഷേധ സമ്മേളനം ഉദ്ഘാടനം ചെയ്തുകയായിരുന്നു അദ്ദേഹം. ഫലസ്‌തീനികൾക്ക് രാജ്യത്ത് ജീവിക്കാനാവാത്ത സ്ഥിതിപൊലെ ഇന്ത്യയെ മാറ്റാനാണ് ശ്രമം. എന്‍പിആറും എന്‍ആര്‍സിയും പരസ്പര ബന്ധിതമാണെന്നും മറിച്ചുള്ള പ്രചാരണങ്ങള്‍ വസ്തുതാ വിരുദ്ധമാണെന്നും അദ്ദേഹം പറഞ്ഞു. ഇന്ത്യയുടെ യുവത്വം പ്രതികരിക്കുന്ന കാഴ്ചയാണ് ഇപ്പോള്‍ രാജ്യം മുഴുവന്‍ കാണുന്നത്. നേതാക്കളില്ലാത്ത ഈ സമരത്തില്‍ ഓരോരുത്തരും നേതാക്കളാണെന്നും കെമാല്‍ പാഷെ പറഞ്ഞു.
അധികാര രാഷ്ട്രീയം മതം മറയാക്കിയതിൻ്റെ അനന്തര ഫലമാണ് ഇപ്പോള്‍ അനുഭവിക്കുന്നതെന്നും അയോധ്യ കേസിലെ വിധി വന്നപ്പോള്‍ നാടിൻ്റെ നന്മക്കായാണ് ജനങ്ങള്‍ മിണ്ടാതിരുന്നതെന്നും അദ്ദേഹം പറഞ്ഞു. നോട്ടു നിരോധന സമയത്തും ഇത് തന്നെയായിരുന്നു അവസ്ഥയെന്നും പൗരത്വ നിയമ ഭേഗഗതി മുസ്ലീംകളെ മാത്രമല്ല ബാധിക്കുകയെന്നും ഇത് മനസിലാക്കിയാണ് എല്ലാ മതവിശ്വാസികളും ഇതിനെ എതിര്‍ക്കുന്നതെന്നും അദ്ദേഹം പറഞ്ഞു.
ഐഎല്‍പിയുടെ മറവില്‍ സംസ്ഥാനങ്ങളെ വെട്ടിമുറിക്കുകയാണ്. മണിപ്പൂരിലും മേഘാലയയിലും ഏർപ്പെടുത്തിയ ഐഎല്‍പി അഖണ്ഡ ഭാരതത്തെ വെട്ടിമുറിക്കുമെന്നും കമാല്‍ പാഷ മുന്നറിയിപ്പ് നൽകി. ത്രിപുരയിലും ഐഎല്‍പി ആവശ്യപ്പെട്ടിട്ടുണ്ടെന്നും ഭരണഘടനയെ തന്നെ ഇല്ലാതാക്കാനുള്ള ശ്രമമാണ് ഇപ്പോള്‍ നടക്കുന്നതെന്നും ജനാധിപത്യപരമായ സമരമാര്‍ഗങ്ങളിലൂടെ ഇതിനെ ചെറുത്ത് തോല്‍പ്പിക്കണമെന്നും അദ്ദേഹം പറഞ്ഞു.
ലജനത്തുൽ മുഹമ്മദീയ്യ പ്രസിഡൻ്റ് എ.എം നസീര്‍ അധ്യക്ഷനായി. ഐ ബി ഉസ്മാന്‍ ഫൈസി, അനസ്, അഡ്വ. എ എം ആരിഫ് എം.പി, മുൻ എം.പി സെബാസ്റ്റ്യൻ പോൾ, കെപിസിസി അംഗം അഡ്വ ഡി സുഗതന്‍, സിപിഐ സംസ്ഥാന എക്സിക്യൂട്ടീവ് അംഗം പി പ്രസാദ്, ആലപ്പുഴ രൂപത വികാരി ജനറല്‍ പയസ് ആറാട്ടുകുളം, നഗരസഭാ അധ്യക്ഷൻ ഇല്ലിക്കല്‍ കുഞ്ഞുമോന്‍, സുന്നി നേതാവും മതപണ്ഡിതനുമായ പി.കെ മുഹമ്മദ് ബാദുഷ സഖാഫി, കെ.എൻ ജാഫര്‍ സ്വാദിഖ് സിദ്ധിഖി എന്നിവര്‍ പ്രഭാഷണം നടത്തി. സലിം മാക്കിയില്‍ പ്രതിജ്ഞയും കുന്നപ്പള്ളി മജീദ് പ്രമേയ പ്രഭാഷണവും നടത്തി. ലക്ഷംപേർ പങ്കെടുത്ത പ്രതിഷേധ റാലിയും ഇതിന് മുന്നോടിയായി സംഘടിപ്പിച്ചിരുന്നു.
