ആലപ്പുഴ: നഗരസഭാ അധ്യക്ഷ സ്ഥാനത്തെ സംബന്ധിച്ച തർക്കത്തിൽ തെരുവിൽ പരസ്യ പ്രകടനം നടത്തിയ സിപിഎം അംഗങ്ങളോട് വിശദീകരണം തേടി സിപിഎം നേതൃത്വം. ആലപ്പുഴ നോർത്ത് ഏരിയ കമ്മിറ്റിക്ക് കീഴിലുള്ള ജില്ലാ കോടതി ലോക്കൽ കമ്മിറ്റിയിൽ ഉൾപ്പെടുന്ന സിപിഎം പ്രവർത്തകരാണ് നേതൃത്വത്തിനെതിരെ നഗരത്തിൽ പരസ്യ പ്രകടനം നടത്തിയത്. പ്രദേശത്തെ മൂന്ന് ബ്രാഞ്ച് സെക്രട്ടറിമാരോടും 11 പാർട്ടി അംഗങ്ങളോടുമാണ് വിശദീകരണം ചോദിച്ച് കത്ത് നൽകിയത്.
ആലപ്പുഴ നെഹ്‌റു ട്രോഫി വാർഡിൽ നിന്ന് ജയിച്ച ജനാധിപത്യ മഹിളാ അസോസിയേഷൻ സംസ്ഥാന കമ്മിറ്റി അംഗവും സിപിഎം ആലപ്പുഴ നോർത്ത് ഏരിയ കമ്മിറ്റി അംഗവുമായ കെ.കെ ജയമ്മയെ അധ്യക്ഷയാക്കണമെന്നാവശ്യപ്പെട്ടാണ് നഗരത്തിൽ പരസ്യമായി പ്രവർത്തകർ പ്രതിഷേധ പ്രകടനം നടത്തിയത്. വൈകുന്നേരത്തിന് മുൻപായി വിശദീകരണം എഴുതി നൽകണമെന്നാവശ്യപ്പെട്ടാണ് കത്ത് നൽകിയിട്ടുള്ളത്. സിപിഎം ജില്ലാ സെക്രട്ടറി ആർ നാസറിന്‍റെ നിർദേശാനുസരണം സിപിഎം ആലപ്പുഴ നോർത്ത് ഏരിയ സെക്രട്ടറി വി ബി അശോകനാണ് കത്ത് നൽകിയത്.
