ടോക്കിയോ : കൊവിഡ് ഭീതിക്കിടെ ലോകത്തിന്‍റെ കണ്ണും കാതും ജപ്പാനിലെ ടോക്കിയോയിലേക്ക് ചുരുങ്ങിയ 16 ദിവസങ്ങള്‍. ട്രാക്കിലും ഫീല്‍ഡിലുമായുള്ള ചരിത്ര നേട്ടങ്ങള്‍, പൊട്ടിച്ചിരികള്‍, കണ്ണീര്‍ വിലാപങ്ങള്‍... അങ്ങനെ... അങ്ങനെ പറഞ്ഞ് തീരാത്തത്രയും ടോക്കിയോ വിശേഷങ്ങള്‍ക്ക് ഞായറാഴ്‌ച തിരശീല വീഴും.
ലോക കായിക മാമാങ്കത്തിന്, ഒളിമ്പിക്‌സിന് ഇന്ന് ഔദ്യോഗിക സമാപനം. പ്രാദേശിക സമയം രാത്രി എട്ട് മണിയോടെയാണ് സമാപന ചടങ്ങുകള്‍ ആരംഭിക്കുക. ജപ്പാന്‍റെ പാരമ്പര്യം ലോകത്തോട് വിളിച്ചോതുന്ന പരിപാടികള്‍ക്കൊടുവില്‍ ഒളിമ്പിക് ദീപശിഖ 2024 ലെ വേദിയായ പാരീസിലെ സംഘാടക സമിതിക്ക്‌ കൈമാറും.
ചാമ്പ്യന്മാരായി അമേരിക്ക
കഴിഞ്ഞ വര്‍ഷം നടക്കേണ്ടിയിരുന്ന ഒളിമ്പിക്‌സ് കൊവിഡിനെ തുടര്‍ന്നാണ് നിരവധി ആശങ്കകള്‍ക്കിടയിലും ജൂലൈ 23ന് ആരംഭിച്ചത്. 42 വേദികളില്‍ 33 കായിക ഇനങ്ങളിലായി നടന്ന 339 മത്സരങ്ങള്‍ക്കൊടുവില്‍ ഇത്തവണയും അമേരിക്ക ഒന്നാമതെത്തി.
സ്വര്‍ണ വേട്ടയിലും മെഡല്‍ നേട്ടത്തിലും റിയോയയിലെ കണക്കിനൊപ്പമെത്താനായില്ലെങ്കിലും ലോക കായിക വേദിയില്‍ തലയെടുപ്പോടെ തന്നെ അവര്‍ നിന്നു. 39 സ്വര്‍ണം, 41 വെള്ളി, 33 വെങ്കലം എന്നിങ്ങനെയാണ് അമേരിക്കയുടെ പട്ടികയിലുള്ളത്.
38 സ്വര്‍ണവും 32 വെള്ളിയും 18 വെങ്കലവുമായി ചൈന രണ്ടാമതെത്തിയപ്പോള്‍ അതിഥേയരായ ജപ്പാന്‍ മൂന്നാം സ്ഥാനത്തെത്തി. 27 സ്വര്‍ണവും 14 വെള്ളിയും 17 വെങ്കലവുമുള്‍പ്പെടെ 58 മെഡലുകളാണ് ജപ്പാന്‍റെ പട്ടികയിലുള്ളത്.
ഇന്ത്യയ്ക്ക് പുതു ചരിത്രം
ഒളിമ്പിക് ചരിത്രത്തില്‍ ഏറ്റവും കൂടുതല്‍ മെഡല്‍ നേട്ടവുമായാണ് ഇക്കുറി ഇന്ത്യന്‍ സംഘം ടോക്കിയോയില്‍ നിന്നും മടങ്ങുന്നത്. 2012ലെ ലണ്ടന്‍ ഒളിമ്പിക്‌സിലെ ആറ് മെഡലുകള്‍ എന്ന റെക്കോര്‍ഡാണ് ഇക്കുറി ഇന്ത്യ പഴങ്കഥയാക്കിയത്.
ലണ്ടനില്‍ രണ്ട് വെള്ളിയും നാല് വെങ്കലവുമുള്‍പ്പെടെ ആറ് മെഡലുകളായിരുന്നു ഇന്ത്യയുടെ അക്കൗണ്ടിലുണ്ടായിരുന്നത്. എന്നാല്‍ ഒരു സ്വര്‍ണവും രണ്ട് വെള്ളിയും നാല് വെങ്കലവുമുള്‍പ്പെടെ ഏഴ് മെഡലുകള്‍ ടോക്കിയോയില്‍ ഇന്ത്യ സ്വന്തമാക്കി.
also read:ഒളിമ്പിക്സില്‍ കൂടുതല്‍ മെഡലുകളുമായി ഇന്ത്യ; ടോക്കിയോ ഒരു പുതുചരിത്രം
ജാവലിന്‍ താരം നീരജ് ചോപ്രയിലൂടെ ഒളിമ്പിക് അത്‌ലറ്റിക്സിലെ ആദ്യ മെഡല്‍ നേട്ടവും രാജ്യം ആഘോഷിച്ചു. ടോക്കിയോയില്‍ 87.03 മീറ്റര്‍ ദൂരം എറിഞ്ഞാണ് നീരജ് 'സുവര്‍ണ' ചരിത്രം കുറിച്ചത്.
നീരജിന് പുറമെ മീരാബായ് ചാനു (വെയ്‌റ്റ് ലിഫ്റ്റിങ്- വെള്ളി), രവികുമാര്‍ ദഹിയ (ഗുസ്തി- വെള്ളി), ബജ്‌റംഗ് പുനിയ (ഗുസ്തി-വെങ്കലം), പിവി സിന്ധു (ബാഡ്മിന്‍റണ്‍- വെങ്കലം), ലവ്‌ലിന ബോര്‍ഗോഹെയ്‌ന്‍ (ബോക്സിങ്- വെങ്കലം), പുരുഷ ഹോക്കി ടീം(വെങ്കലം) എന്നിവരാണ് ഇന്ത്യയ്ക്കായി മെഡല്‍ നേടിയത്.
41 വര്‍ഷത്തെ ഇടവേളയ്ക്ക് ശേഷമായിരുന്നു ഹോക്കിയില്‍ ഇന്ത്യയുടെ മെഡല്‍ നേട്ടം. ടുര്‍ണമെന്‍റിലുടനീളം ഇന്ത്യയുടെ യാത്രയില്‍ നിര്‍ണായകമായത് മലയാളി ഗോള്‍കീപ്പര്‍ ശ്രീജേഷിന്‍റെ മിന്നുന്ന പ്രകടനമാണ്. ഇത് മലയാളികള്‍ക്ക് സ്വകാര്യമായി അഭിമാനിക്കാനുള്ള വക കൂടിയൊരുക്കി.
ടോക്കിയോയിലെ വേഗക്കാര്‍
ഇറ്റലിയുടെ മാര്‍സെല്‍ ജേക്കബ്‌സ് ഏറ്റവും വേഗതയേറിയ പുരുഷതാരമായപ്പോള്‍ വനിതകളുടെ വേഗപ്പോരില്‍ ജമൈക്ക സമഗ്രാധിപത്യം പുലര്‍ത്തി. 9.80 സെക്കൻറിലാണ് ജേക്കബ്‌സ് സ്വര്‍ണത്തിലേക്ക് ഓടിക്കയറിയത്.
9.84 സെക്കന്‍റില്‍ മത്സരം പൂര്‍ത്തിയാക്കിയ അമേരിക്കയുടെ ഫ്രെഡ് കെർലെയ് വെള്ളിമെഡലും കാനഡയുടെ ആന്ദ്രേ ഡി ഗ്രാസ് (9.89 സെക്കന്‍റ്) വെങ്കലമെഡലും നേടി.
100 മീറ്ററില്‍ വനിതകളുടെ വിഭാഗത്തില്‍ സ്വർണം നേടിയ എലെയ്ൻ തോംസണിനൊപ്പം വെള്ളിയും വെങ്കലവും സ്വന്തമാക്കിയത് ലോക റെക്കോര്‍ഡുകാരന്‍ ഉസൈൻ ബോൾട്ടിന്‍റെ സ്വന്തം നാട്ടുകാര്‍ തന്നെ.
10.61 സെക്കന്‍റില്‍ മത്സരം പൂര്‍ത്തിയാക്കിയാണ് എലെയ്ൻ തോംസണ്‍ സ്വര്‍ണ നേട്ടം ആഘോഷിച്ചത്. ഷെല്ലി അൻഫ്രേസര്‍ (10.74) ഷെറീക്ക ജാക്സണ്‍ (10.76) എന്നിവര്‍ യഥാക്രമം വെള്ളിയും, വെങ്കലവും നേടി.
ഇനി പാരീസില്‍ കാണാം
2024 ജൂലൈ 26 മുതൽ ഓഗസ്റ്റ് 11 വരെ ഫ്രാൻസിലെ പാരീസിൽ വച്ചാണ് 30ാമത് ഒളിമ്പിക്‌സ് നടക്കുക. കൊവിഡ് ഭീതിയൊഴിഞ്ഞ് ലോകം പുതിയ താളവും വേഗവും കണ്ടെത്തുമ്പോള്‍ പുതുചരിത്രം തീര്‍ക്കാന്‍ പാരീസ് നഗരവും ഉണരും.
