ടോക്കിയോ: ഇന്ത്യന്‍ വനിതാ ഹോക്കി താരം വന്ദന കടാരിയയ്ക്കും കുടുംബത്തിനും നേരെയുണ്ടായ ജാതി അധിക്ഷേപം ലജ്ജാകരമെന്ന് ക്യാപ്റ്റന്‍ റാണി റംപാല്‍. ടോക്കിയോയില്‍ നിന്നും വെർച്വൽ പ്രസ് കോണ്‍ഫറന്‍സിനിടെ സംസാരിക്കവെയാണ് ഇന്ത്യന്‍ ക്യാപ്റ്റന്‍ ഇക്കാര്യം പറഞ്ഞത്. മതം, ജാതി എന്നിവയ്ക്ക് അധീതമായാണ് തങ്ങള്‍ രാജ്യത്തിന് വേണ്ടി കളിക്കാനിറങ്ങുന്നതെന്നും റാണി റാംപാല്‍ പറഞ്ഞു.
"സംഭവിച്ചത് വളരെ മോശമായ കാര്യമാണ്. നമ്മുടെ രാജ്യത്തെ പ്രതിനിധീകരിക്കാൻ ഞങ്ങൾ വളരെ കഠിനാധ്വാനം ചെയ്യുന്നുണ്ട്. മതം, ജാതി എന്നിവയുള്‍പ്പെടെയുള്ള കാര്യങ്ങള്‍ അടിസ്ഥാനമാക്കിയുള്ള എല്ലാ തരത്തിലുള്ള വിവേചനങ്ങളും അവസാനിപ്പിക്കേണ്ടതാണ്. കാരണം ഇതിനെല്ലാം ഉപരിയായാണ് ഞങ്ങൾ പ്രവർത്തിക്കുന്നത്" റാണി പറഞ്ഞു.
"ഞങ്ങൾ ഇന്ത്യയുടെ വിവിധ ഭാഗങ്ങളിൽ നിന്നാണ് വരുന്നത്, വ്യത്യസ്ത മതങ്ങളാണ് പലരും പിന്തുടരുന്നത്. എന്നാൽ ഇവിടെ വരുമ്പോൾ ഞങ്ങൾ ഇന്ത്യയ്ക്കായി ഒരുമിച്ച് പ്രവർത്തിക്കുന്നു. പക്ഷെ ആളുകൾ അത്തരം പെരുമാറ്റത്തിൽ ഏർപ്പെടുന്നത് കാണുമ്പോൾ ലജ്ജ തോന്നുന്നു". ഇന്ത്യന്‍ ക്യാപ്റ്റന്‍ പറഞ്ഞു.
