മാഞ്ചസ്റ്റർ : മാഞ്ചസ്റ്റർ യുണൈറ്റഡിന്‍റെ പോർച്ചുഗീസ് സൂപ്പർതാരം ക്രിസ്റ്റ്യാനോ റൊണാൾഡോ ഈ സമ്മർ ട്രാൻസ്‌ഫർ ജാലകത്തിൽ ക്ലബ് വിടാൻ സാധ്യതയെന്ന് റിപ്പോർട്ടുകൾ. യുണൈറ്റഡിന്‍റെ പുതിയ ഡച്ച് പരിശീലകൻ എറിക് ടെൻ ഹാഗിന്‍റെ വരും സീസണിലെ പദ്ധതികളിൽ തനിക്ക് ഇടം ലഭിക്കാനിടയില്ലെന്ന തോന്നൽ കൊണ്ടാണ് താരം ക്ലബ് വിടാൻ തയ്യാറെടുക്കുന്നത്. ജോസെ മൗറീഞ്ഞ്യോ പരിശീലിപ്പിക്കുന്ന ഇറ്റാലിയൻ ക്ലബ്ബായ എ.എസ്. റോമയിലേക്കോ കരിയര്‍ തുടങ്ങിയ സ്പോര്‍ട്ടിംഗ് ലിസ്ബണിലേക്കോ ചേക്കേറാനാണ് റൊണാള്‍ഡോ ശ്രമിക്കുന്നത് എന്നാണ് റിപ്പോര്‍ട്ടുകള്‍.
കഴിഞ്ഞ സീസണിലാണ് യുവന്‍റസിൽ നിന്നും ക്രിസ്റ്റ്യാനോ റൊണാൾഡോ മാഞ്ചസ്റ്റർ യുണൈറ്റഡിലേക്ക് തിരിച്ചെത്തിയത്. വലിയ പ്രതീക്ഷ നല്‍കിയ റൊണാൾഡോ പക്ഷേ നിരാശപ്പെടുത്തിയില്ല. ക്ലബ്ബിനുവേണ്ടി 24 ഗോളുകൾ നേടിയെങ്കിലും പ്രീമിയര്‍ ലീഗിലും ചാമ്പ്യന്‍സ് ലീഗിലും യുണൈറ്റഡിന് വലിയ നേട്ടമുണ്ടാക്കാൻ കഴിഞ്ഞിരുന്നില്ല. കഴിഞ്ഞ സീസണില്‍ പ്രീമിയര്‍ ലീഗില്‍ ആറാമത് ഫിനിഷ് ചെയ്‌തതിനാൽ ചാമ്പ്യന്‍സ് ലീഗ് യോഗ്യതയുമില്ല. ഇതിനുപിന്നാലെയാണ് എറിക് ടെൻ ഹാഗിനെ പുതിയ പരിശീലകനായി നിയമിച്ചത്.
പ്രമുഖ സ്‌പോർട്‌സ് മാധ്യമങ്ങളുടെ റിപ്പോർട്ടുകൾ പ്രകാരം അടുത്ത സീസണിൽ ടെൻ ഹാഗ് മാഞ്ചസ്റ്റർ യുണൈറ്റഡിൽ നടപ്പിൽ വരുത്താൻ പോകുന്ന പദ്ധതികളിൽ തനിക്ക് സ്ഥാനം ലഭിക്കില്ലെന്നാണ് റൊണാൾഡോ കരുതുന്നത്. ഇതേത്തുടർന്നാണ് ടീമിലെ പ്രധാന താരമായി തുടരാൻ എല്ലായ്‌പ്പോഴും ആഗ്രഹിക്കുന്ന റൊണാൾഡോ മാഞ്ചസ്റ്റർ യുണൈറ്റഡ് വിടാൻ ആഗ്രഹിക്കുന്നത്.
ALSO READ: സൂപ്പര്‍ താരം സാദിയോ മാനെ ലിവര്‍പൂള്‍ വിടുന്നു; ബയേണുമായി കരാറില്‍
റിപ്പോർട്ടുകൾ പ്രകാരം റൊണാൾഡോയുടെ ഏജന്‍റായ ജോർജ് മെൻഡസ് താരത്തിന് അടുത്ത ക്ലബ് കണ്ടെത്താനുള്ള ശ്രമത്തിലാണ്. റോമയ്ക്ക് ചാമ്പ്യന്‍സ് ലീഗ് യോഗ്യത ഇല്ല എന്നതിനാൽ പോർച്ചുഗീസ് ലീഗിൽ പോർട്ടോയ്‌ക്കുപിന്നിൽ രണ്ടാമെതെത്തി ചാമ്പ്യൻസ് ലീഗ് യോഗ്യത നേടിയ സ്പോർട്ടിങ് ലിസ്ബണിലേക്ക് താരം കൂടുമാറിയേക്കാം.
