ഫുക്കറ്റ് : തായ്‌ലൻഡ് ഓപ്പൺ ഇന്‍റർനാഷണൽ ബോക്‌സിങ് ടൂർണമെന്‍റിൽ ഇന്ത്യയ്‌ക്ക് നാല് സ്വര്‍ണം. ഗോവിന്ദ് സഹാനി (48 കിലോ), അനന്ത ചോപ്‌ഡെ (54 കിലോ), സുമിത് (75 കിലോ) എന്നിവരാണ് സ്വര്‍ണം ഇടിച്ചിട്ടത്. ടൂര്‍ണമെന്‍റിന്‍റെ ഫൈനലില്‍ ഗോവിന്ദ് സഹാനിയും സുമിത്തും തദ്ദേശീയരായ എതിരാളികള്‍ക്കെതിരെ 5-0 എന്ന സമാന സ്‌കോറിനാണ് ഇടിച്ച് ജയിച്ചത്.
പുരുഷന്മാരുടെ 48, 75 കിലോ വിഭാഗങ്ങളിലായി നടന്ന മത്സരത്തിന്‍റെ തുടക്കം മുതല്‍ തന്നെ ആധിപത്യം പുലര്‍ത്തിയ ഇരുവരും എതിരാളികള്‍ക്ക് ഒരവസരവും നല്‍കിയിരുന്നില്ല. സഹാനി നത്തഫോൺ തുവാംചാരോയനേയും, സുമിത് പീതപത് യെസുങ്‌നോയനേയുമാണ് കീഴടക്കിയത്.
പുരുഷന്മാരുടെ 54 കിലോ വിഭാഗത്തില്‍ തായ്‌ലന്‍ഡിന്‍റെ തന്നെ റിത്തിയമോൻ സാങ്‌സാവാങ്ങിനെയാണ് അനന്ത കീഴടക്കിയത്. ആക്രമണാത്മകതയും പ്രതിരോധവും സംയോജിപ്പിച്ചായിരുന്നു അനന്തയുടെ ജയം.
അതേസമയം അമിത് പംഗൽ (52 കിലോ), മോണിക്ക (48 കിലോ), വരീന്ദർ സിങ് (60 കിലോ), ആശിഷ് കുമാർ (81 കിലോ) എന്നിവര്‍ വെള്ളിയും, മനീഷ (57 കിലോ), പൂജ (69 കിലോ), ഭാഗ്യബതി കചാരി (75 കിലോ) എന്നിവര്‍ വെങ്കലവും സ്വന്തമാക്കിയിട്ടുണ്ട്. ഇതോടെ ടൂര്‍ണമെന്‍റില്‍ മൂന്ന് സ്വർണവും നാല് വെള്ളിയും മൂന്ന് വെങ്കലവും ഉൾപ്പെടെ 10 മെഡലുകളാണ് ഇന്ത്യൻ ബോക്‌സർമാർ ഇതേവരെ നേടിയിട്ടുള്ളത്.
സ്വർണമെഡൽ ജേതാക്കൾക്ക് 2,000 യുഎസ് ഡോളറും വെള്ളി, വെങ്കല മെഡൽ ജേതാക്കൾക്ക് യഥാക്രമം 1,000 യുഎസ് ഡോളറും 500 യുഎസ് ഡോളറുമാണ് സമ്മാനമായി ലഭിക്കുക.
