മ്യൂണിച്ച്: കൊവിഡിനെ തുടർന്ന് നിശ്ചലമായ പുല്‍മൈതാനങ്ങൾക്ക് വീണ്ടും തീപിടിക്കും. ലോകത്ത് കാല്‍പന്തിന്‍റെ ആ മനോഹാരിതക്ക് അരങ്ങൊരുങ്ങുന്നത് ജര്‍മനിയിലാണ്. ജർമന്‍ ബുണ്ടസ് ലീഗിലെ ശേഷിക്കുന്ന ഒമ്പത് റൗണ്ട് മത്സരങ്ങൾക്ക് ഇന്ത്യന്‍ സമയം ശനിയാഴ്‌ച രാത്രി ഏഴിനാണ് തുടക്കമാവുക. കൊവിഡ് കാരണം മത്സരങ്ങൾ നിർത്തിവെച്ച ശേഷം പുനരാരംഭിക്കുന്ന മേജർ യൂറോപ്യന്‍ ലീഗെന്ന പ്രത്യേകതയും ബുണ്ടസ് ലീഗിനുണ്ട്. അടച്ചിട്ട സ്റ്റേഡിയങ്ങളിലാണ് മത്സരങ്ങൾ നടക്കുക. ആദ്യ മത്സരം ബൊറൂസിയ ഡോർട്ട്മുണ്ടും ഷാല്‍ക്കെയും തമ്മിലാണ്.
പോയിന്‍റ് പട്ടികയില്‍ നിലവിലെ ചാമ്പ്യന്‍മാരായ ബയേണ്‍ മ്യൂണിക്ക് തന്നെയാണ് മുന്നില്‍. 25 മത്സരങ്ങളില്‍ നിന്ന് 55 പോയിന്‍റ് ബയേണ്‍ സ്വന്തമാക്കി. രണ്ടാം സ്ഥാനത്ത് 51 പോയിന്‍റുമായി ബൊറൂസിയ ഡോർട്ട്മുണ്ടും മൂന്നാം സ്ഥാനത്ത് 50 പോയിന്‍റുമായി ലൈപ്‌സീഗുമാണ് ഉള്ളത്.
യൂണിയന്‍ ബെർലിന് എതിരെ ഞായറാഴ്‌ച രാത്രിയാണ് ഒന്നാം സ്ഥാനക്കാരായ ബയേണിന്‍റെ കളി. മത്സരത്തിന് മുന്നോടിയായി ബയേണ്‍ താരങ്ങൾ വെള്ളിയാഴ്‌ച പരിശീലനം നടത്തി. ക്വാറന്‍റയിനില്‍ പാർപ്പിച്ച ഹോട്ടലില്‍ നിന്നും രണ്ട് ബസുകളിലായാണ് താരങ്ങൾ പരിശീലനത്തിന് എത്തിയത്. എല്ലാവരും മാസ്ക്ക് ധരിക്കുകയും സാമൂഹ്യ അകലം പാലിക്കുകയും ചെയ്‌തു. ഹോട്ടല്‍ ബയേണ്‍ മ്യൂണിക്ക് കളിക്കാർക്ക് മാത്രമായി റിസർവ് ചെയ്‌തിരിക്കുകയാണ്.
കൊവിഡ് 19 ഭീതി തുടരുന്ന സാഹചര്യത്തില്‍ ലീഗിലെ മത്സരങ്ങൾ പൂർത്തിയാകുമോയെന്ന കാര്യത്തില്‍ ഉറപ്പില്ല. എന്തെങ്കിലും കാരണവശാല്‍ ലീഗിലെ ശേഷിക്കുന്ന മത്സങ്ങൾ ഉപേക്ഷിക്കേണ്ടിവന്നാല്‍ പോയിന്‍റ് പട്ടികയില്‍ ഒന്നാം സ്ഥാനത്തുള്ള ടീമിനെ ചാമ്പ്യന്‍മാരായി പ്രഖ്യാപിക്കും. അവസാന രണ്ട് സ്ഥാനത്തുള്ളവർ തരം താഴ്‌ത്തപെടുകയും ചെയ്യും.
