മ്യുണിക്ക് : ചെറിയ ഇടവേളയ്ക്ക് ശേഷം യൂറോ കപ്പിലെ മരണ ഗ്രൂപ്പ് പോരാട്ടങ്ങള്‍ വീണ്ടും സജീവമാകുന്നു. എഫ്‌ ഗ്രൂപ്പില്‍ നിലവിലെ ചാമ്പ്യന്‍മാരായ പോർച്ചുഗല്ലും ജർമനിയും ഇന്ന് നേർക്കുനേർ എത്തും. ഇന്ത്യൻ സമയം രാത്രി 9:30 ന് ജർമനിയിലെ അലയൻസ് അരീനയിലാണ് പോരാട്ടം.
പറങ്കിപ്പടയുടെ നായകന്‍ ക്രിസ്റ്റ്യാനോ റൊണാൾഡോയ്ക്ക് ഇത് റെക്കോർഡുകൾക്ക് വേണ്ടിയുള്ള പോരാട്ടം കൂടിയാണ്. മൂന്ന് ഗോളുകള്‍ കൂടി സ്വന്തമാക്കിയാല്‍ അന്താരാഷ്‌ട്ര ഫുട്‌ബോളില്‍ ഏറ്റവും കൂടുതല്‍ ഗോളുകളെന്ന നേട്ടത്തിനൊപ്പം റോണോ എത്തും.
പ്രവചനങ്ങളിലും പോർച്ചുഗല്ലാണ് മുന്‍പന്തിയിൽ. ഫോം തുടരുന്ന റോണോക്കൊപ്പം ഫെർണാണ്ടോ സാന്റോസിന്‍റെ ശിഷ്യർ ഡബിൾ സ്‌ട്രോങ്ങാണ്. മറുഭാഗത്ത് ജർമന്‍ നായകൻ മാനുവൽ ന്യൂയറിന് ഇത് അഭിമാന പോരാട്ടമാണ്. ആദ്യ മത്സരത്തിൽ ഫ്രാൻസിനോട് തോറ്റ ജർമനിക്ക് ജയം അനിവാര്യമാണ്.
Also Read: പറന്നകന്ന് മില്‍ഖ ; ചിത്രങ്ങളിലൂടെ
പോർച്ചുഗല്ലുമായുള്ള അവസാനത്തെ നാല് മത്സരങ്ങളില്‍ ജയം സ്വന്തമാക്കാന്‍ സാധിച്ചത് ജര്‍മനിയുടെ ആത്മവിശ്വാസം വര്‍ധിപ്പിക്കുന്നുണ്ട്. സ്റ്റാര്‍ട്ടിങ് ഇലവനില്‍ കാര്യമായ മാറ്റങ്ങളുമായാകും ഇന്ന് ലോയുടെ ശിഷ്യന്‍മാര്‍ ഇറങ്ങുക.
കഴിഞ്ഞ മത്സരത്തില്‍ ഫ്രാൻസിനെതിരെ സെൽഫ് ഗോൾ വഴങ്ങിയതാണ് ജര്‍മനിക്ക് തിരിച്ചടിയായത്. അത്തരം അബദ്ധങ്ങള്‍ ആവർത്തിക്കാതിരിക്കാനും ന്യൂയറും കൂട്ടരും ശ്രദ്ധിക്കണം. മത്സരം സോണി ലൈവിലും സോണി ടണിലും തത്സമയം കാണാം.
