ഷാങ്ഹായി: ലോകത്തിലെ ഏറ്റവും വലിയ ഫുട്‌ബോൾ സ്റ്റേഡിയം നിർമിക്കാന്‍ ഒരുങ്ങി ചൈന. ആഗോള തലത്തില്‍ വിവധ രാജ്യങ്ങൾ കൊവിഡിന്‍റെ പിടിയില്‍ അമരുമ്പോഴാണ് ചൈനയുടെ ഈ നീക്കം. സ്റ്റേഡിയത്തിന്‍റെ നിർമാണ പ്രവർത്തനങ്ങൾക്ക് വ്യാഴാഴ്‌ച്ച തുടക്കമായി. 12,00 കോടി ചൈനീസ് യുവാന്‍ ചെലവഴിച്ച് ഗ്വാങ്‌ചൗവിലാണ് സ്റ്റേഡിയം നിർമിക്കുന്നത്. ഏകദേശം 13,000 കോടി രൂപയോളം വരും ഈ തുക. ഒരു ലക്ഷം പേർക്ക് കളി കാണാനുള്ള സൗകര്യങ്ങളാകും സ്റ്റേഡിയത്തില്‍ ഒരുക്കുക. ചൈനീസ്
സൂപ്പർ ലീഗ് ക്ലബ് ഗ്വാങ്‌ചൗ എവർഗ്രാന്‍ഡെയാണ് സ്റ്റേഡിയം നിർമിക്കുന്നത്. നിർമാണം പൂർത്തായയാല്‍ ലോക പ്രശസ്ത ഫുട്‌ബോൾ ക്ലബായ ബാഴ്‌സലോണയുടെ ഹോം ഗ്രൗണ്ടായ നൗക്യാമ്പിനേക്കാൾ വലുതായി ഈ സ്റ്റേഡിയം മാറും. സ്റ്റേഡിയത്തിന്‍റെ നിർമാണം 2022-ല്‍ പൂർത്തിയാകുമെന്ന് ചൈനീസ് വാർത്താ ഏജന്‍സി വ്യക്തമാക്കി. വിരിഞ്ഞു നില്‍ക്കുന്ന താമരപൂവിന്‍റെ മാതൃകയിലാണ് സ്റ്റേഡിയം നിർമിക്കുക. ചൈനീസ് സൂപ്പർ ലീഗില്‍ ഇതിനകം എട്ട് തവണ ഗ്വാങ്‌ചൗ എവർഗ്രാന്‍ഡെ ചാമ്പ്യന്‍മാരായിട്ടുണ്ട്. നിലവില്‍ ഇറ്റലിയെ ലോകകപ്പ് ചാമ്പ്യന്‍മാരാക്കിയ ഫാബിയോ കാന്നവാരോയാണ് ഗ്വാങ്‌ചൗവിന്‍റെ പരിശീലകന്‍.
രാജ്യത്ത് ഫുട്‌ബോളിന് പ്രചാരം നല്‍കാനുള്ള ചൈനീസ് ഗവണ്‍മെന്‍റ് ഇതിനകം നീക്കങ്ങൾ ആരംഭിച്ചിട്ടുണ്ട്. ഇതിന്‍റെ ഭാഗമായി രാജ്യത്ത് വിവിധ ഇടങ്ങളിലായി പടുകൂറ്റന്‍ ഫുട്‌ബോൾ സ്റ്റേഡിയങ്ങൾ നിർമിക്കാന്‍ ഒരുങ്ങുകയാണ് ചൈന. 2021-ലെ ഫിഫ ക്ലബ് ഫുട്‌ബോളിന് ചൈനയാണ് ആതിഥേയത്വം വഹിക്കുക.
അതേസമയം കൊവിഡ് 19 വ്യാപനത്തിന്‍റെ ഭാഗമായി ചൈനയില്‍ ഇതിനകം 4,632 പേർ മരിച്ചതായാണ് ആഗോള തലത്തില്‍ നിന്നും ലഭിക്കുന്ന കണക്കുകൾ. 82,692 പേർക്കാണ് ചൈനയില്‍ വൈറസ് ബാധ സ്ഥിരീകരിച്ചത്. ലോകത്ത് ആദ്യം കൊവിഡ് 19 പൊട്ടിപുറപെട്ടത്ത് ചൈനയിലെ വുഹാനിലായിരുന്നു. പിന്നീട് ഇത് ആഗോള തലത്തില്‍ മറ്റു രാജ്യങ്ങളിലേക്ക് വ്യാപിക്കുകയായിരുന്നു.
