ട്രിനിഡാഡ്: വെസ്റ്റ് ഇൻഡീസിനെതിരായ മൂന്നാം ഏകദിനത്തിലെ കൂറ്റന്‍ വിജയത്തോടെ ഇന്ത്യ പരമ്പര തൂക്കിയിരുന്നു. മൂന്ന് മത്സര പരമ്പര 2-1നാണ് സന്ദര്‍ശകര്‍ നേടിയത്. ആദ്യ രണ്ട് മത്സരങ്ങളില്‍ ഇരു ടീമുകളും ഓരോ വിജയം നേടിയതോടെ മൂന്നാം ഏകദിനമാണ് പരമ്പര വിജയികളെ നിര്‍ണയിച്ചത്.
ട്രിനിഡാഡിലെ ബ്രയാന്‍ ലാറ ക്രിക്കറ്റ് അക്കാദമി സ്റ്റേഡിയത്തില്‍ നടന്ന മത്സരത്തില്‍ 200 റണ്‍സിനായിരുന്നു ഇന്ത്യ ആതിഥേയരെ വീഴ്‌ത്തിയത്. പരമ്പര നേടിയെങ്കിലും വെസ്റ്റ് ഇൻഡീസ് ക്രിക്കറ്റ് ബോര്‍ഡ് (West Indies Cricket Board) ഒരുക്കിയ സൗകര്യങ്ങളില്‍ ഇന്ത്യയുടെ പകരക്കാരന്‍ ക്യാപ്റ്റന്‍ ഹാര്‍ദിക് പാണ്ഡ്യ (Hardik Pandya ) സംതൃപ്‌തനായിരുന്നില്ല. മത്സര ശേഷമുള്ള അവതരണ ചടങ്ങില്‍ ഇക്കാര്യം താരം തുറന്ന് പറയുകയും ചെയ്‌തു.
ഇന്ത്യൻ ക്രിക്കറ്റ് താരങ്ങളുടെ അടിസ്ഥാന ആവശ്യങ്ങൾ പോലും കൈകാര്യം ചെയ്യുന്നതിൽ വെസ്റ്റ് ഇൻഡീസ് ക്രിക്കറ്റ് ബോർഡ് പരാജയപ്പെട്ടുവെന്നാണ് ഹാര്‍ദിക് പാണ്ഡ്യയുടെ വിമര്‍ശനം. ടീമിന് ആഢംബരങ്ങൾ ആവശ്യമില്ലെന്നും എന്നാല്‍ അടിസ്ഥാന ആവശ്യങ്ങളെങ്കിലും സാധിച്ചുതരാന്‍ വെസ്റ്റ് ഇന്‍ഡീസ് ക്രിക്കറ്റ് ബോര്‍ഡ് അടുത്ത തവണയെങ്കിലും ശ്രദ്ധിക്കണമെന്നുമായിരുന്നു ഹാര്‍ദിക്കിന്‍റെ വാക്കുകള്‍.
"ഞങ്ങൾ കളിച്ച ഏറ്റവും നല്ല ഗ്രൗണ്ടുകളിൽ ഒന്നായിരുന്നുവിത്. എന്നാല്‍ അടുത്ത തവണ ഞങ്ങൾ വെസ്റ്റ് ഇൻഡീസിലേക്ക് വരുമ്പോൾ കാര്യങ്ങൾ മെച്ചപ്പെടുമെന്ന് പ്രതീക്ഷിക്കുന്നു. യാത്ര പോലുള്ള കാര്യങ്ങളില്‍ വെസ്റ്റ് ഇൻഡീസ് ക്രിക്കറ്റ് ബോർഡ് കുറച്ച് കൂടി ശ്രദ്ധക്കുകയും തടസ്സങ്ങളൊന്നുമില്ലെന്ന് ഉറപ്പാക്കുകയും ചെയ്യുമെന്നാണ് കരുതുന്നത്. ഞങ്ങൾ ആഡംബരങ്ങളല്ല ആവശ്യപ്പെടുന്നത്. എന്നാല്‍ ചില അടിസ്ഥാന ആവശ്യങ്ങളില്‍ ശ്രദ്ധിക്കേണ്ടതുണ്ട്"-ഹാര്‍ദിക് പറഞ്ഞു.
അതേസമയം മത്സരത്തില്‍ ടോസ് നഷ്‌ടപ്പെട്ട് ആദ്യ ബാറ്റ് ചെയ്യാന്‍ ഇറങ്ങിയ ഇന്ത്യ നിശ്ചിത 50 ഓവറില്‍ അഞ്ച് വിക്കറ്റ് നഷ്‌ടത്തില്‍ 351 റണ്‍സ് അടിച്ച് കൂട്ടിയിരുന്നു. ഇഷാന്‍ കിഷന്‍ (64 പന്തുകളില്‍ 77), ശുഭ്‌മാന്‍ ഗില്‍ (92 പന്തുകളില്‍ 85), സഞ്ജു സാംസണ്‍ (41 പന്തുകളില്‍ നിന്ന് 51), ഹാര്‍ദിക് പാണ്ഡ്യ (52 പന്തുകളില്‍ 70*) എന്നിവരുടെ അര്‍ധ സെഞ്ചുറി മികവിലായിരുന്നു ഇന്ത്യ കൂറ്റന്‍ സ്‌കോര്‍ നേടിയത്.
ഒരു ബാറ്ററും സെഞ്ചുറി തികയ്ക്കാതെ ടീം ഇന്ത്യ ഏകദിനത്തില്‍ നേടുന്ന ഏറ്റവും ഉയര്‍ന്ന സ്‌കോറാണിത്. 18 വര്‍ഷങ്ങള്‍ക്ക് മുമ്പ് ശ്രീലങ്കയ്‌ക്ക് എതിരെ സ്ഥാപിച്ച റെക്കോഡിനെയാണ് പ്രകടനം പഴങ്കഥയാക്കിയത്. 2005-ൽ നാഗ്‌പൂരില്‍ നടന്ന മത്സരത്തില്‍ ആറ് വിക്കറ്റ് നഷ്‌ടത്തില്‍ 350 റണ്‍സെടുത്തായിരുന്നു അന്ന് ലങ്കയ്‌ക്ക് എതിരെ ഇന്ത്യ റെക്കോഡിട്ടത്.
മറുപടിക്ക് ഇറങ്ങിയ വെസ്റ്റ് ഇന്‍ഡീസിന് 35.3 ഓവറില്‍ പത്ത് വിക്കറ്റ് നഷ്‌ടത്തില്‍ 151 റണ്‍സാണ് നേടാന്‍ കഴിഞ്ഞത്. 34 പന്തില്‍ 39 റണ്‍സുമായി പുറത്താവാതെ നിന്ന വാലറ്റക്കാരന്‍ ഗുഡകേഷ് മോട്ടിയാണ് വിന്‍ഡീസിന്‍റ ടോപ് സ്‌കോറര്‍. നാല് വിക്കറ്റ് വീഴ്‌ത്തിയ ശാർദുൽ താക്കൂര്‍, മൂന്ന് വിക്കറ്റ് വീഴ്‌ത്തിയ മുകേഷ്‌ കുമാര്‍ എന്നിവര്‍ ചേര്‍ന്നാണ് ഇന്ത്യന്‍ വിജയം എളുപ്പമാക്കിയത്. ഇന്ത്യയ്‌ക്കായി കുല്‍ദീപ് യാദവ് രണ്ടും ജയ്‌ദേവ് ഉനദ്‌ഘട്ട് ഒന്നും വിക്കറ്റുകളും നേടിയിരുന്നു.
