ബുഡാപെസ്റ്റ്: ലോക അത്ലറ്റിക്സ് ചാമ്പ്യന്‍ഷിപ്പില്‍ ജാവലിന്‍ ത്രോയിലൂടെ ചരിത്രമെഴുതി ഇന്ത്യന്‍ താരം നീരജ് ചോപ്ര (Neeraj Chopra). ജാവലിന്‍ ത്രോയില്‍ സ്വര്‍ണം നേടിയാണ് നീരജിന്‍റെ അഭിമാന നേട്ടം. ലോക അത്ലറ്റിക്സ് ചാമ്പ്യന്‍ഷിപ്പില്‍ (World athletics championships) വിജയം കൈവരിക്കുന്ന ആദ്യ ഇന്ത്യക്കാരനെന്ന ചരിത്രം കൂടിയാണ് നീരജ് വിജയത്തിനൊപ്പം എഴുതിച്ചേര്‍ത്തത്.
88.17 മീറ്റര്‍ ജാവലിന്‍ എറിഞ്ഞാണ് നീരജ് ചോപ്ര സ്വര്‍ണം (Neeraj Chopra wins gold) സ്വന്തമാക്കിയത്. ലോക അത്ലറ്റിക്സ് ചാമ്പ്യന്‍ഷിപ്പിലും ഒളിമ്പിക്‌സിലും സ്വര്‍ണം സ്വന്തമാക്കുന്ന അപൂര്‍വ നേട്ടംകൂടിയാണ് നീരജിന്‍റേത്. പാകിസ്ഥാന്‍ താരം അര്ഷാദ് നദീം വെള്ളിയും ചെക്ക് റിപ്പബ്ലിക്കിന്‍റെ ജാക്കുബ് വാദ്‌ലെ വെങ്കലവും സ്വന്തമാക്കി. ആദ്യ ഊഴത്തില്‍ ഫൗള്‍ സംഭവിച്ചുവെങ്കിലും രണ്ടാമത്തെ ശ്രമത്തില്‍ നീരജിന് നേട്ടം കൈവരിക്കാനായി. ഇന്ത്യന്‍ താരങ്ങളായ കിഷോര്‍ കുമാര്‍ ജനയ്‌ക്ക് അഞ്ചാംസ്ഥാവും ഡിപി മനുവിന് ആറാം സ്ഥാനവും നേടാനായി.
വെല്ലുവിളികളെ തകര്‍ത്തെറിഞ്ഞ് നീരജ്: ലോക അത്ലറ്റിക്സ് ചാമ്പ്യൻഷിപ്പ്‌സ് ഫൈനലില്‍ നീരജ് ചോപ്രയ്‌ക്ക് പാക് താരം അര്ഷാദ് നദീം കടുത്ത വെല്ലുവിളിയാവുമെന്ന് പല വിലയിരുത്തലുകളും വന്നിരുന്നു. എന്നാല്‍, ഈ നിരീക്ഷണങ്ങളെയെല്ലാം നിഷ്‌പ്രഭമാക്കുന്ന പ്രകടനമാണ് മത്സരത്തില്‍ നീരജിന്‍റെ ഭാഗത്തുനിന്നും ഉണ്ടായത്. മത്സരത്തിലെ യോഗ്യത റൗണ്ടില്‍ ഗ്രൂപ്പ് ബിയില്‍ നിന്നും അര്ഷാദ് നദീം നേരിട്ട് യോഗ്യത നേടുകയായിരുന്നു. ഗ്രൂപ്പ് എയില്‍ മത്സരിച്ച നീരജ് ചോപ്ര 88.77 മീറ്റർ ദൂരം ജാവലിന്‍ പായിച്ചാണ് ഫൈനലില്‍ ഇടംപിടിച്ചത്.
ഗ്രൂപ്പ് ബിയില്‍ മത്സരിച്ച അര്ഷാദ് നദീം 86.79 മീറ്റര്‍ എറിഞ്ഞാണ് മത്സരത്തില്‍ എത്തിയത്. എന്നാല്‍, നീരജ് ചോപ്രയ്‌ക്ക് ഇതേവരെ കഴിയാത്ത 90 മീറ്റര്‍ ബെഞ്ച് മാര്‍ക്ക് പിന്നിട്ട താരമാണ് നദീം. ഈ കാര്യങ്ങള്‍ എല്ലാം ചൂണ്ടിക്കാട്ടിയാണ് നീരജിന് ഫൈനല്‍ കടുപ്പമാവുമെന്ന തരത്തില്‍ വിലയിരുത്തലുകള്‍ വന്നത്. കഴിഞ്ഞ വര്‍ഷം ബെര്‍മിങ്‌ഹാമില്‍ പാക് താരം എറിഞ്ഞ 90.18 മീറ്റർ, കോമൺവെൽത്ത് ഗെയിംസ് റെക്കോഡ് കൂടിയാണ്.
READ MORE | Neeraj Chopra vs Arshad Nadeem നീരജിന് കടുപ്പമാവും; പാകിസ്ഥാന്‍റെ അര്ഷാദ് നദീമും ഫൈനലില്‍
പരിക്കിനെ തുടര്‍ന്ന് ഒളിമ്പിക്‌സിന് പിന്നാലെ നടന്ന കോമൺവെൽത്ത് ഗെയിംസില്‍ നീരജ് ഇറങ്ങിയിരുന്നില്ല. തന്‍റെ ആദ്യ ശ്രമത്തില്‍ തന്നെ ഫൈനലിന് ഓട്ടോമാറ്റിക് ക്വാളിഫിക്കേഷനായുള്ള 83 മീറ്റര്‍ ദൂരം പിന്നിടാന്‍ കഴിഞ്ഞിരുന്നു. എന്നാല്‍, തന്‍റെ മൂന്നാം ശ്രമത്തിലാണ് അര്ഷാദ് നദീം യോഗ്യതാദൂരം പിന്നിട്ടത്. ആദ്യ ശ്രമത്തിൽ തന്നെ 70.63 മീറ്റര്‍ ദൂരമാണ് പാകിസ്ഥാന്‍ താരത്തിന് കണ്ടെത്താന്‍ കഴിഞ്ഞത്. രണ്ടാം ഏറില്‍ 81.53 മീറ്ററിലേക്ക് എത്തിക്കാനും താരത്തിന് കഴിഞ്ഞിരുന്നു.
