പാള്‍: അഫ്‌ഗാനിസ്ഥാനെതിരായ ടി20 പരമ്പരയിലൂടെ ഏറെ നീണ്ട ഇടവേളയ്‌ക്ക് ശേഷം ഇന്ത്യന്‍ ടീമിലേക്ക് മടങ്ങിയെത്തിയിരിക്കുകയാണ് വെറ്ററന്‍ താരങ്ങളായ രോഹിത് ശര്‍മയും വിരാട് കോലിയും. ഇതോടെ ജൂണില്‍ നടക്കാനിരിക്കുന്ന ടി20 ലോകകപ്പില്‍ ഇന്ത്യയ്‌ക്കായി ഇരുവരും കളത്തിലിറങ്ങിയേക്കും എന്നാണ് പൊതുവെ സംസാരം. ഇപ്പോഴിതാ വിഷയത്തില്‍ പ്രതികരിച്ചിരിക്കുകയാണ് ദക്ഷിണാഫ്രിക്കയുടെ ഇതിഹാസ ഓള്‍റൗണ്ടര്‍ ജാക്ക് കാലിസ്.(Jacques Kallis on Rohit Sharma and Virat Kohli T20I return).
ഇരു താരങ്ങളുടേയും അനുഭവപരിചയം പ്രധാനമാണെങ്കിലും ലോകകപ്പ് ടീം തെരഞ്ഞെടുപ്പില്‍ ഗെയിം പ്ലാനുകളും നിർണായക ഘടകമാണെന്നാണ് കാലിസ് അഭിപ്രായപ്പെട്ടിരിക്കുന്നത്. 2022-ലെ ടി20 ലോകകപ്പിന് ശേഷം ടി20 ഫോര്‍മാറ്റില്‍ നിന്നും രോഹിത്തും കോലിയും വിട്ടുനില്‍ക്കുകയായിരുന്നു.
നേരത്തെ സ്‌പെഷ്യലിസ്റ്റുകളെ ഉള്‍പ്പെടുത്തി ടി20 ലോകകപ്പിന് ടീമിറക്കാനായിരുന്നു ബിസിസിഐ ലക്ഷ്യം വച്ചിരുന്നത്. രോഹിത്തും കോലിയും മാറി നിന്നതോടെ ഇതിന്‍റെ ഭാഗമായി കൂടുതല്‍ യുവതാരങ്ങള്‍ ഇന്ത്യന്‍ ടീമിലേക്ക് എത്തി. എന്നാല്‍ പരിചയസമ്പത്തിനൊപ്പം നിലവില്‍ ഇരുവരുടെയും ഫോം കണ്ടില്ലെന്ന് നടിക്കാന്‍ മാനേജ്‌മെന്‍റിന് കഴിയാതെ വരികയായിരുന്നു.
കഴിഞ്ഞ ഏകദിന ലോകകപ്പില്‍ രോഹിത് നല്‍കിയിരുന്ന ആക്രമണാത്മക തുടക്കം മറ്റ് താരങ്ങള്‍ക്ക് കൂടുതല്‍ ആത്മവിശ്വാസം നല്‍കുന്നതിനൊപ്പം ഇന്ത്യയുടെ മിന്നും കുതിപ്പിന് മുതല്‍ക്കൂട്ടാവുകയും ചെയ്‌തിരുന്നു. കോലിയാവട്ടെ ടൂര്‍ണമെന്‍റില്‍ റെക്കോഡ് റണ്‍വേട്ടയായിരുന്നു നടത്തിയിരുന്നത്.
അതേസമയം അഫ്‌ഗാനെതിരെ മൊഹാലിയില്‍ നടന്ന ആദ്യ ടി20യോടെയാണ് രോഹിത് തന്‍റെ ഇടവേള അവസാനിപ്പിച്ചത്. എന്നാല്‍ ആരാധകര്‍ ഏറെ പ്രതീക്ഷയോടെ കാത്തിരുന്നതിരിച്ചുവരവ് ദുരന്തമായാണ് കലാശിച്ചത്. രണ്ട് പന്തുകള്‍ മാത്രം നേരിട്ട ഹിറ്റ്‌മാന്‍ റണ്ണൗട്ടായി മടങ്ങുകയായിരുന്നു.
സഹ ഓപ്പണര്‍ ശുഭ്‌മാന്‍ ഗില്ലുമായുള്ള ആശയക്കുഴപ്പമാണ് രോഹിത്തിന്‍റെ പുറത്താവലിന് വഴിയൊരുക്കിയത്. ഇതില്‍ ഗില്ലിനോട് കടുത്ത അതൃപ്‌തി പ്രകടിപ്പിച്ചുകൊണ്ടായിരുന്നു രോഹിത് കളം വിട്ടത്. വ്യക്തിപരമായ കാരണങ്ങളാല്‍ കോലി മത്സരത്തിന് ഇറങ്ങിയിരുന്നില്ല.
ALSO READ: 'ഞാന്‍ അങ്ങിനെ പറഞ്ഞിട്ടേയില്ല'; പാകിസ്ഥാനെതിരെ മോശം പരാമര്‍ശം നടത്തിയിട്ടില്ലെന്ന് ഗില്‍ക്രിസ്റ്റ്
അതേസമയം നാളെ നടക്കുന്ന രണ്ടാം ടി20യില്‍ കോലി കളിക്കും. ഇന്‍ഡോറിലാണ് ഇന്ത്യ- അഫ്‌ഗാന്‍ രണ്ടാം ടി20 അരങ്ങേറുന്നത്. തിലക് വര്‍മയായിരിക്കും കോലിയ്‌ക്ക് പ്ലേയിങ് ഇലവനിലേക്ക് വഴിയൊരുക്കുക. മത്സരം വിജയിച്ചാല്‍ ഇന്ത്യയ്‌ക്ക് പരമ്പര പിടിക്കാം.
ALSO READ: എല്ലാം അവന്‍റെ കഠിനാധ്വാനത്തിന്‍റെ ഫലം; ജുറെലിന് ഇന്ത്യന്‍ ടീമിലേക്ക് വിളിയെത്തിയതില്‍ സംഗക്കാര
മൊഹാലിയില്‍ ആറ് വിക്കറ്റിന് വിജയിച്ച ആതിഥേയര്‍ നിലവില്‍ മൂന്ന് മത്സര പരമ്പരയില്‍ 1-0ന് മുന്നിലാണ്. ശിവം ദുബെയുടെ ഓള്‍റൗണ്ടിങ് മികവാണ് ആദ്യ ടി20യില്‍ ഇന്ത്യയ്‌ക്ക് വിജയം ഒരുക്കിയിരുന്നത്. മത്സരത്തില്‍ ടോസ് നഷ്‌ടപ്പെട്ട് ആദ്യം ബാറ്റിങ്ങിന് ഇറങ്ങിയ സന്ദര്‍ശകര്‍ നിശ്ചിത 20 ഓവറില്‍ അഞ്ച് വിക്കറ്റ് നഷ്‌ടത്തില്‍ 158 റണ്‍സായിരുന്നു കണ്ടെത്തിയത്. പിന്തുടരാനിറങ്ങിയ ഇന്ത്യ 17.3 ഓവറില്‍ നാല് വിക്കറ്റ് നഷ്‌ടത്തില്‍ 158 റണ്‍സെടുത്തുകൊണ്ട് വിജയം ഉറപ്പിക്കുകയായിരുന്നു.
ALSO READ: ഇന്ത്യ തേടിക്കൊണ്ടിരുന്ന പേസ് ഓള്‍റൗണ്ടര്‍ ; ശിവം ദുബെയെ പുകഴ്‌ത്തി ഹര്‍ഭജന്‍
