മുംബൈ: സ്റ്റാര്‍ പേസറായിരുന്ന സഹീർ ഖാന് ഇന്ത്യക്കായി 100 ടെസ്റ്റ് മത്സരങ്ങൾ കളിക്കാൻ കഴിയാതിരുന്നതിന് കാരണം വിരാട് കോലി കൈവിട്ട ഒരു ക്യാച്ചാണെന്ന് വെറ്ററന്‍ പേസര്‍ ഇഷാന്ത് ശര്‍മ. സഹീര്‍ ഖാന് ഉള്‍പ്പെട്ട ഒരു ചര്‍ച്ചയ്‌ക്കിടെ തമാശയായാണ് ഇഷാന്ത് ശര്‍മ ഇക്കാര്യം പറഞ്ഞത്. 2014 ഫെബ്രുവരിയിൽ ന്യൂസിലൻഡിനെതിരായ രണ്ടാം ടെസ്റ്റ് മത്സരത്തിൽ വിരാട് കോലിയുടെ കൈവിട്ട ക്യാച്ച് തന്‍റെ കരിയർ അവസാനിച്ചെന്ന് സഹീര്‍ ഖാന് പറഞ്ഞെന്ന് വരുത്തിതീര്‍ക്കാന്‍ രസകരമായ ഒരു കഥയും ഇഷാന്ത് ശർമ്മ പങ്കുവച്ചു.
വെല്ലിങ്‌ടണില്‍ നടന്ന ഈ മത്സരത്തിന് ശേഷമായിരുന്നു സഹീര്‍ അന്താരാഷ്‌ട്ര ക്രിക്കറ്റിൽ നിന്നും വിരമിക്കൽ പ്രഖ്യാപിച്ചത്. മത്സരത്തില്‍ 302 റണ്‍സ് നേടിയ ബ്രണ്ടന്‍ മക്കല്ലെത്തിന്‍റെ ക്യാച്ചായിരുന്നു അന്ന് കോലി നഷ്‌ടപ്പെടുത്തിയത്.
ഇഷാന്ത് പറഞ്ഞ കഥയിങ്ങനെ.... "ഞങ്ങൾ അന്ന് ന്യൂസിലൻഡിൽ കളിക്കുകയായിരുന്നു. ബ്രണ്ടൻ മക്കല്ലം 300-ല്‍ ഏറെ റൺസ് നേടിയിരുന്നു. അതിന് മുന്നെ വിരാട് കോലി മക്കല്ലെത്തിന്‍റെ ഒരു ക്യാച്ച് നഷ്‌ടപ്പെടുത്തുകയും ചെയ്തു. ഉച്ച ഭക്ഷണത്തിന് അടുത്താണ് അതു സംഭവിച്ചതെന്നാണ് എന്‍റെ ഓര്‍മ്മ.
വിരാട് വന്ന് സാക്കിനോട് (സഹീര്‍ ഖാന്) മാപ്പ് പറഞ്ഞു. അപ്പോള്‍, 'വിഷമിക്കേണ്ട, നമ്മള്‍ അവനെ പുറത്താക്കും' എന്നായിരുന്നു സാക്ക് പറഞ്ഞത്. വൈകീട്ട് ചായയ്‌ക്ക് പിരിയുമ്പോളും മക്കല്ലത്തിന്‍റെ വിക്കറ്റ് വീഴ്‌ത്താന്‍ കഴിഞ്ഞിരുന്നില്ല. ചായ കുടിക്കുന്നതിനിടയിലും കോലി വീണ്ടും മാപ്പ് പറഞ്ഞപ്പോള്‍ വിഷമിക്കേണ്ടെന്ന് സാക്ക് വീണ്ടും പറയുകയും ചെയ്തു.
തൊട്ടടുത്ത ദിവസവും ചായയ്‌ക്ക് പിരുയുമ്പോഴും കോലി തന്‍റെ ക്ഷമാപണം ആവര്‍ത്തിച്ചു. അപ്പോള്‍ സാക്ക് അവനോട് പറഞ്ഞത്, 'നീ എന്‍റെ കരിയർ അവസാനിപ്പിച്ചു!,' എന്നാണ്" ചിരിച്ചുകൊണ്ട് ഇഷാന്ത് പറഞ്ഞു നിര്‍ത്തി.
യഥാര്‍ത്ഥത്തില്‍ നടന്ന കാര്യം വെളിപ്പെടുത്തിക്കൊണ്ടായിരുന്നു സഹീര്‍ ഖാന് ഇഷാന്തിന്‍റെ കഥയ്‌ക്ക് മറുപടി നല്‍കിയത്. "ഇഷാന്ത് പറഞ്ഞതുപോലെ ഞാന്‍ പറഞ്ഞിട്ടേയില്ല. സത്യത്തില്‍ ഇതുപോലെ കിരൺ മോറ ഒരു ക്യാച്ച് കൈവിട്ടതിനാല്‍ ഗ്രഹാം ഗൂച്ച് 300 റണ്‍സ് നേടിയതിനെക്കുറിച്ചാണ് ഞാന്‍ അവനോട് പറഞ്ഞത്. അത്തരത്തില്‍ ഒരു നിര്‍ണായക ക്യാച്ച് കൈവിടുന്ന രണ്ടാമത്തെ താരം മാത്രമാണ് കോലിയെന്നും ഞാന്‍ പറഞ്ഞു.
അപ്പോള്‍ അങ്ങനെ സംസാരിക്കരുത് എന്നായിരുന്നു അവന്‍ എന്നോട് പറഞ്ഞത്. സ്വാഭാവികമായും, അവനെ സങ്കടപ്പെടുത്തുന്ന കാര്യമാവുമത്. ക്യാച്ച് നഷ്‌ടപ്പെട്ടതിനാല്‍ ഏറെ റണ്‍സും സ്‌കോര്‍ ചെയ്യപ്പെട്ടിരുന്നുവല്ലോ" സഹീര്‍ ഖാന് പറഞ്ഞു നിര്‍ത്തി.
അതേസമയം പരിക്കും മോശം ഫോമും വലച്ചതിനെ തുടര്‍ന്ന് ഏറെ നാളായി ഇന്ത്യന്‍ ടീമിന് പുറത്തായിരുന്നു വെറ്ററന്‍ പേസര്‍ ഇഷാന്ത് ശര്‍മയുടെ സ്ഥാനം. ഇന്ത്യയുടെ വെസ്റ്റ് ഇന്‍ഡീസ് പര്യടനത്തിനിടെ കമന്‍ററി രംഗത്ത് ഇഷാന്ത് ശര്‍മ അരങ്ങേറ്റം നടത്തിയിരുന്നു. നിലവില്‍ വിവിധ ചര്‍ച്ചകളില്‍ സജീവമാണ് താരം.
