അഹമ്മദാബാദ് : ഇന്ത്യൻ പ്രീമിയർ ലീഗിന്‍റെ 16-ാം സീസണിന്‍റെ ഉദ്‌ഘാടന മത്സരത്തിൽ ചരിത്രം സൃഷ്‌ടിച്ച് ചെന്നൈ സൂപ്പർ കിങ്‌സ് താരം തുഷാർ ദേശ്‌പാണ്ഡെ. ഐപിഎൽ ചരിത്രത്തിലെ ആദ്യ 'ഇംപാക്‌ട് പ്ലെയർ' എന്ന നേട്ടമാണ് തുഷാർ ദേശ്‌പാണ്ഡെ സ്വന്തമാക്കിയത്. അഹമ്മദാബാദ് നരേന്ദ്ര മോദി സ്റ്റേഡിയത്തിൽ ഗുജറാത്ത് ടൈറ്റൻസിനെതിരായ മത്സരത്തിൽ ബാറ്ററായ അമ്പാട്ടി റായിഡുവിന് പകരക്കാരായാണ് തുഷാർ ദേശ്‌പാണ്ഡെ കളത്തിലെത്തിയത്.
എന്നാൽ ചെന്നൈയുടെ ഇംപാക്‌ട് പ്ലെയറായി കളത്തിലെത്തിയ തുഷാർ ദേശ്‌പാണ്ഡെയുടെ പ്രകടനം യഥാർത്ഥത്തിൽ ഗുജറാത്തിനാണ് ഗുണം ചെയ്‌തത്. മത്സരത്തിൽ 2 നോബോളുകൾ എറിഞ്ഞ ദേശ്‌പാണ്ഡെ മറക്കാൻ ആഗ്രഹിക്കുന്ന രാത്രിയായിരിക്കുമത്. കാരണം മത്സരത്തിൽ 3.2 ഓവർ മാത്രം പന്തെറിഞ്ഞ ദേശ്‌പാണ്ഡെ 51 റൺസാണ് വഴങ്ങിയത്.
നിലവിലെ ജേതാക്കളായ ഗുജറാത്ത് ടൈറ്റൻസും മത്സരത്തിൽ ഇംപാക്‌ട് പ്ലെയർ നിയമം ഉപയോഗപ്പെടുത്തിയിരുന്നു. ഫീൽഡിങ്ങിനിടെ പരിക്കേറ്റ കിവീസ് താരം കെയ്‌ൻ വില്യംസണ് പകരം സായ് സുദർശനെയാണ് കളത്തിലിറക്കിയത്. ഡീപ് സ്‌ക്വയർ ലെഗിൽ ചെന്നൈ ബാറ്റർ റുതുരാജ് ഗെയ്‌ക്‌വാദിന്‍റെ ഒരു ഷോട്ട് തടയാൻ വായുവിലേക്ക് ഉയർന്നു ചാടിയ താരത്തിന്‍റെ വലത് കാൽമുട്ടിനാണ് പരിക്കേറ്റത്.
തുഷാർ ദേശ്‌പാണ്ഡെ, സുബ്രാൻഷു സേനാപതി, ഷെയ്‌ഖ് റഷീദ്, അജിങ്ക്യ രഹാനെ, നിശാന്ത് സിന്ധു എന്നിവരായിരുന്നു മത്സരത്തിന് മുന്നോടിയായി ചെന്നൈ ടീമിൽ ഇടംനേടിയ അഞ്ച് പകരക്കാർ. ബി സായ് സുദർശൻ, ജയന്ത് യാദവ്, മോഹിത് ശർമ, അഭിനവ് മനോഹർ, കെഎസ് ഭരത് എന്നിവരെയാണ് ഗുജറാത്ത് പകരക്കാരായി ഉൾപ്പെടുത്തിയിരുന്നത്. ടോസിന്‍റെ സമയത്താണ് ടീം നായകൻ പകരക്കാരുടെ പട്ടിക മാച്ച് റഫറിക്ക് നൽകേണ്ടത്.
ഇന്ത്യയിൽ ആദ്യമായി സയ്യിദ് മുഷ്‌താഖ് അലി ട്രോഫിയിലാണ് ഈ നിയമം പരീക്ഷിച്ചിരുന്നത്. ഡൽഹി താരം ഹൃതിക് ഷോകീനാണ് ഇന്ത്യൻ ടി20 ചരിത്രത്തിലെ ആദ്യ ഇംപാക്‌ട് പ്ലെയറായി കളത്തിലിറങ്ങിയ താരം. ബിഗ്‌ ബാഷ് ലീഗിൽ 'എക്‌സ് ഫാക്‌ടര്‍ പ്ലെയര്‍' എന്ന പേരിലാണ് ഈ രീതി നടപ്പിലാക്കുന്നത്.
എന്താണ് 'ഇംപാക്‌ട് പ്ലെയർ' നിയമം; മത്സരത്തിന്‍റെ ഗതിക്കനുസരിച്ച് ടീമിലെ ഏത് താരത്തെയും പിൻവലിച്ച് മത്സരത്തിന് മുൻപായി പകരക്കായി നിശ്ചയിച്ച താരങ്ങളിൽ നിന്നും ഒരാളെ ഇംപാക്‌ട് പ്ലെയർ നിയമം അനുസരിച്ച് കളത്തിലിറക്കാം. ഇതിനായി ടോസിന്‍റെ സമയത്ത് അഞ്ച് പേരുൾപ്പെട്ട പകരക്കാരുടെ പട്ടിക അതാത് ടീം നായകൻമാർ മാച്ച് റഫറിക്ക് നൽകണം. മത്സരത്തിന്‍റെ ഏത് സാഹചര്യത്തിലും ഒരു താരത്തെ പകരമിറക്കാൻ ഈ നിയമം അനുവദിക്കുന്നു. ഇംപാക്‌ട് പ്ലെയർ റോളിലെത്തുന്ന താരത്തിന് മത്സരത്തിൽ ബാറ്റിങ്ങിനും ബോളിങ്ങിനും അവസരമുണ്ടായിരിക്കും. എന്നാൽ നായകനായി ടീമിനെ നയിക്കാൻ ഈ നിയമം അനുവദിക്കുന്നില്ല.
ഇംപാക്‌ട് പ്ലെയർ നിയമത്തിന് പുറമെ കൂടുതൽ മാറ്റങ്ങളുമായി 2023 എഡിഷന് തുടക്കമായത്. ടോസിന് മുമ്പ് മാച്ച് റഫറിമാർക്ക് ടീം ലിസ്റ്റ് നൽകുന്നതിൽ നിന്നും വ്യത്യസ്‌തമായി ഇത്തവണ ടോസ് ലഭിക്കുന്നതിന് അനുസരിച്ച് അന്തിമ ഇലവൻ തെരഞ്ഞെടുക്കാനകും. ഇതിനായി ടോസിനെത്തുന്ന നായകൻമാർക്ക് രണ്ട് ടീം ഷീറ്റുകൾ കയ്യിൽ കരുതാനാകും.
വൈഡിനും നോ-ബോളിനും ഡിആര്‍എസ് എടുക്കാനും അവസരമുണ്ട്. ഔട്ട്, നോട്ട് ഔട്ട് എന്നിവ പരിശോധിക്കാനായി ഉപയോഗിച്ചിരുന്ന ഡിആര്‍എസ് സംവിധാനമുപയോഗിച്ച നോ-ബോള്‍, വൈഡ് എന്നിവ പുനഃപരിശോധനയ്‌ക്ക് വിധേയമാക്കാം.
