ചെന്നൈ : ഐപിഎല്ലില്‍ രാജസ്ഥാന് റോയല്‍സിനെതിരെ അവസാന പന്ത് വരെ പൊരുതിയാണ് ചെന്നൈ സൂപ്പര്‍ കിങ്‌സ് മൂന്ന് റണ്‍സിന്‍റെ തോല്‍വി വഴങ്ങിയത്. ചെപ്പോക്കില്‍ നടന്ന മത്സരത്തില്‍ ആദ്യം ബാറ്റ് ചെയ്‌ത രാജസ്ഥാന് ബട്‌ലറിന്‍റെ അര്‍ധസെഞ്ച്വറിയുടെയും ദേവ്ദത്ത് പടിക്കല്‍, ആര്‍ അശ്വിന്‍, ഷിംറോണ്‍ ഹെറ്റ്‌മെയര്‍ എന്നിവരുടെ ബാറ്റിങ് പ്രകടനത്തിന്‍റെയും കരുത്തില്‍ 175 റണ്‍സ് നേടിയിരുന്നു. മറുപടി ബാറ്റിങ്ങിനിറങ്ങിയ ചെന്നൈക്ക് നായകന് എംഎസ് ധോണിയും സ്റ്റാര്‍ ഓള്‍റൗണ്ടര്‍ രവീന്ദ്ര ജഡേജയും ക്രീസില്‍ നില്‍ക്കെ നിശ്ചിത 20 ഓവറില്‍ 172 റണ്‍സെടുക്കാനേ സാധിച്ചുള്ളൂ.
നായകന് എംഎസ് ധോണിയുടെ വെടിക്കെട്ട് ബാറ്റിങ്ങായിരുന്നു മത്സരത്തില്‍ ചെന്നൈയുടെ തോല്‍വിഭാരം കുറച്ചത്. രാജസ്ഥാനെതിരെ 17 പന്ത് നേരിട്ട ധോണി 32 റണ്‍സായിരുന്നു അടിച്ചുകൂട്ടിയത്. മൂന്ന് സിക്‌സറും ഒരു ഫോറും താരം മത്സരത്തില്‍ പായിച്ചിരുന്നു.
മത്സരത്തില്‍ അര്‍ധ സെഞ്ച്വറി നേടിയ ചെന്നൈയുടെ ഓപ്പണര്‍ ഡെവോണ്‍ കോണ്‍വെ പുറത്തായതിന് പിന്നാലെ എട്ടാമനായാണ് ധോണി ക്രീസിലേക്കെത്തിയത്. രാജസ്ഥാന് വേണ്ടി മികച്ച രീതിയില്‍ പന്തെറിഞ്ഞുകൊണ്ടിരുന്ന യുസ്‌വേന്ദ്ര ചഹാലിനെയും രവിചന്ദ്ര അശ്വിനെയും ആക്രമിക്കാന്‍ ധോണി തയ്യാറായിരുന്നില്ല. ഇവരുടെ ഓവറുകളില്‍ സ്‌ട്രൈക്ക് റൊട്ടേഷനായിരുന്നു ചെന്നൈ നായകന് പ്രാധാന്യം നല്‍കിയത്.
അവസാന മൂന്നോവറിലേക്ക് മത്സരം നീങ്ങിയപ്പോള്‍ ചെന്നൈക്ക് ചെപ്പോക്കില്‍ ജയം നേടാന്‍ 18 പന്തില്‍ 54 റണ്‍സായിരുന്നു വേണ്ടിയിരുന്നത്. 18-ാം ഓവര്‍ എറിയാനെത്തിയ സാംപയെ ഫോറടിച്ച് വരവേറ്റ ധോണി ആ ഓവറില്‍ ഒരു സിക്‌സറും പായിച്ചിരുന്നു. പിന്നീട് സന്ദീപ് ശര്‍മയെറിഞ്ഞ അവസാന ഓവറില്‍ തുടര്‍ച്ചയായി രണ്ട് സിക്‌സുകള്‍ നേടാനും ധോണിക്ക് സാധിച്ചിരുന്നു.
എന്നാല്‍ അവസാന ഓവറിലെ അവസാന പന്ത് അതിര്‍ത്തി കടത്താന്‍ ചെന്നൈ നായകന് സാധിക്കാതെ വന്നതോടെ മത്സരം രാജസ്ഥാന് റോയല്‍സ് സ്വന്തമാക്കുകയായിരുന്നു. റോയല്‍സിനെതിരെ ധോണി മിന്നും പ്രകടനം കാഴ്‌ചവച്ചെങ്കിലും മത്സരശേഷം ആരാധകര്‍ക്ക് ആശങ്ക പകരുന്ന വാര്‍ത്തയുമായി ചെന്നൈ പരിശീലകന്‍ സ്റ്റീഫന്‍ ഫ്ലെമിങ് രംഗത്തെത്തിയിരുന്നു.
രാജസ്ഥാന് റോയല്‍സിനെതിരെ കാല്‍മുട്ടിനേറ്റ പരിക്കുമായാണ് എംഎസ് ധോണി കളിക്കാന്‍ ഇറങ്ങിയതെന്നാണ് ഫ്ലെമിങ് പറഞ്ഞത്. മത്സരശേഷമുള്ള പ്രസ് കോണ്‍ഫറന്‍സിലായിരുന്നു ചെന്നൈ പരിശീലകന്‍റെ വെളിപ്പെടുത്തല്‍.
'അദ്ദേഹത്തിന്‍റെ കാല്‍മുട്ടിന് പരിക്കേറ്റിട്ടുണ്ട്. മത്സരത്തില്‍ ചില ഭാഗങ്ങളില്‍ അത് വ്യക്തവുമായതാണ്. ഒരു പരിധിവരെ ആ പരിക്ക് അദ്ദേഹത്തെ ബുദ്ധിമുട്ടിക്കുന്നുണ്ട്.
Also Read: IPL 2023 | ആദ്യം പതറി, പിന്നെ തിരിച്ചുവന്നു ; അവസാന പന്തില്‍ 'തല'യെ പൂട്ടി സന്ദീപ് ശര്‍മ
ധോണിയുടെ ഫിറ്റ്‌നസ് എന്താണെന്ന് എല്ലാവര്‍ക്കും അറിയുന്ന കാര്യമാണ്. ടൂര്‍ണമെന്‍റ് ആരംഭിക്കുന്നതിന് ഒരു മാസം മുന്‍പായിരുന്നു അദ്ദേഹത്തിന്‍റെ വരവ്. മികച്ച കളിക്കാരനായ അദ്ദേഹത്തിന്‍റെ കഴിവില്‍ ഞങ്ങള്‍ക്ക് ഒരിക്കലും സംശയം ഇല്ല' - ഫ്ലെമിങ് പറഞ്ഞു.
അതേസമയം, കാല്‍മുട്ടിന് പരിക്ക് ഉണ്ടെങ്കിലും ചെന്നൈ സൂപ്പര്‍ കിങ്‌സിന്‍റെ വരാനിരിക്കുന്ന മത്സരങ്ങളിലും ധോണി ഉണ്ടാകാനാണ് സാധ്യത. ഇക്കാര്യവും ഫ്ലെമിങ് വ്യക്തമാക്കിയിരുന്നു.
