മുംബൈ: ലഖ്‌നൗവിനെതിരായ മത്സരത്തില്‍ 12 റൺസിന്‍റെ തോല്‍വി വഴങ്ങിയെങ്കിലും പവർപ്ലേയിലെ ബോളർമാരുടെ പ്രകടനത്തില്‍ സംതൃപ്‌തനാണെന്ന് ഹൈദരാബാദ് നായകൻ കെയ്ൻ വില്യംസൺ. ഭാഗ്യനിർഭാഗ്യങ്ങൾ മാറിമറിഞ്ഞ മത്സരത്തിൽ നാല് വിക്കറ്റ് വീഴ്ത്തിയ ആവേശ് ഖാന്‍റെയും 68 റൺസെടുത്ത കെ എൽ രാഹുലിന്‍റെയും മികവിലാണ് ലഖ്‌നൗ ഹൈദരാബാദിനെ 12 റൺസിന് പരാജയപ്പെടുത്തിയത്.
'രാജസ്ഥാനെതിരായ അവസാന മത്സരത്തിൽ നിന്നും വ്യത്യസ്‌തമായി വളരെ മികച്ച പ്രകടനമാണ് ടീം കാഴ്‌ചവെച്ചത്. പവർപ്ലേയിൽ മൂന്ന് വിക്കറ്റ് വീഴ്ത്തിയ ബോളർമാർ മികവ് കാട്ടി. ബോളർമാർ അവരുടം ജോലി ഭംഗിയാക്കി. എങ്കിലും കെഎൽ രാഹുൽ - ദീപക് ഹൂഡ സഖ്യത്തെ പെട്ടെന്ന് പുറത്താക്കാനാകാഞ്ഞത് തിരിച്ചടിയായി, ഈ കൂട്ടുകെട്ടാണ് അവരെ ഭേദപ്പെട്ട സ്‌കോറിലെത്തിച്ചത്' മത്സര ശേഷം വില്യംസൺ പറഞ്ഞു.
ALSO READ: സഞ്‌ജുവിന്‍റെ ക്യാപ്റ്റന്‍സിയില്‍ ആസ്വദിച്ച് കളിക്കുന്നു : ജോസ് ബട്‌ലര്‍
രാജസ്ഥാനെതിരായ മത്സരത്തിലെ മോശം ബൗളിങ്ങില്‍ നിന്ന് ശക്തമായ തിരിച്ചുവരവാണ് ഹൈദരാബാദ് ബൗളര്‍മാര്‍ നടത്തിയത്. ഹൈദരാബാദിനായി ഭുവനേശ്വര്‍ കുമാര്‍, റൊമാരിയോ ഷിഫേര്‍ഡ്, ടി നടരാജന്‍ എന്നിവര്‍ രണ്ട് വിക്കറ്റ് വീതം പങ്കിട്ടു.
