ദുബായ്: ഇംഗ്ലണ്ടിനെതിരായ ടെസ്റ്റ് പരമ്പരയുടെ ഭാഗമായിരുന്ന ഇന്ത്യൻ താരങ്ങളെ ദുബായിലെത്തിച്ചതായി ഡൽഹി ക്യാപിറ്റൽസ് അറിയിച്ചു. റിഷഭ് പന്ത്, രവിചന്ദ്രൻ അശ്വിൻ, അജിങ്ക്യ രഹാനെ, ഇഷാന്ത് ശർമ്മ, അക്സർ പട്ടേൽ, പൃഥ്വി ഷാ, ഉമേഷ് യാദവ് എന്നിവരെയാണ് ഫ്രാഞ്ചൈസി ദുബായിലെത്തിച്ചത്.
ആറു ദിവസത്തെ ക്വാറന്‍റൈന് ശേഷമേ ഇവര്‍ക്ക് ടീമിനൊപ്പം ചേരാനാവൂ. സെപ്റ്റംബർ 19 മുതലാണ് ഐപിഎല്ലിന്‍റെ രണ്ടാം പാദ മത്സരങ്ങള്‍ യുഎഇയിൽ നടക്കുക. ഫൈനലടക്കം 31 മത്സരങ്ങളാണ് സീസണില്‍ ഇനി അവശേഷിക്കുന്നത്.
ഒക്ടോബർ 15 നാണ് ഫൈനൽ. ആറ് കളിക്കാര്‍ക്കും രണ്ട് സ്റ്റാഫിനും കൊവിഡ് സ്ഥിരീകരിച്ചതോടെ മെയ് നാലിനാണ് ബിസിസിഐ ടൂര്‍ണമെന്‍റ് നിര്‍ത്തിവച്ചത്. ഇതിന് മുന്‍പേ സീസണിൽ 29 മത്സരങ്ങൾ മാത്രമാണ് പൂര്‍ത്തിയായത്.
also read: ഐപിഎല്‍ : ഇംഗ്ലണ്ടിലായിരുന്ന മുംബൈ ഇന്ത്യൻസ് താരങ്ങള്‍ അബുദാബിയിലെത്തി
നിലവിലെ പോയിന്‍റ് പട്ടികയിൽ ഡൽഹി ക്യാപിറ്റല്‍സാണ് ഒന്നാം സ്ഥാനത്തുള്ളത്. ചെന്നൈ സൂപ്പര്‍ കിങ്സ് രണ്ടാം സ്ഥാനത്തും, റോയല്‍ ചലഞ്ചേഴ്‌സ് ബാംഗ്ലൂര്‍ മൂന്നാം സ്ഥാനത്തും, മുംബൈ ഇന്ത്യന്‍സ് നാലാം സ്ഥാനത്തുമാണുള്ളത്.
