ജയ്‌പൂര്‍: രാജസ്ഥാന് റോയല്‍സിനെ എറിഞ്ഞൊതുക്കിയായിരുന്നു ഗുജറാത്ത് ടൈറ്റന്‍സ് ജയം പിടിച്ചത്. മത്സരത്തില്‍ ടോസ് നേടി ആദ്യം ബാറ്റ് ചെയ്യാനിറങ്ങിയ രാജസ്ഥാന് തുടക്കം മുതല്‍ തന്നെ പിഴച്ചു. ഹാര്‍ദിക് പാണ്ഡ്യയായിരുന്നു രാജസ്ഥാന്‍റെ ആദ്യ വിക്കറ്റ് വീഴ്‌ത്തിയത്.
പിന്നാലെ പന്തെറിയാനെത്തിയവരില്‍ മോഹിത് ശര്‍മ്മ ഒഴികെയുള്ളവരെല്ലാം ഗുജറാത്ത് നിരയില്‍ വിക്കറ്റ് നേടി. അഫ്‌ഗാനിസ്ഥാന്‍ സ്‌പിന്‍ ജോഡികളായ റാഷിദ് ഖാനും നൂര്‍ അഹമ്മദുമായിരുന്നു രാജസ്ഥാനെ തകര്‍ത്തത്. ഇരുവരും ചേര്‍ന്ന് 5 വിക്കറ്റാണ് മത്സരത്തില്‍ വീഴ്‌ത്തിയത്.
നാലോവര്‍ പന്തെറിഞ്ഞ റാഷിദ് ഖാന്‍ 14 റണ്‍സ് വിട്ടുകൊടുത്താണ് 3 വിക്കറ്റ് സ്വന്തമാക്കിയത്. നൂര്‍ അഹമ്മദ് രണ്ട് വിക്കറ്റായിരുന്നു വീഴ്‌ത്തിയത്. മൂന്നോവറില്‍ 25 റണ്‍സ് വഴങ്ങിയായിരുന്നു 18 കാരന്‍റെ രണ്ട് വിക്കറ്റ് പ്രകടനം.
ഐപിഎല്‍ പതിനാറാം പതിപ്പിലും ഇരു താരങ്ങളും മിന്നും പ്രകടനമാണ് തുടരുന്നത്. ഗുജറാത്തിന്‍റെ ഈ സ്‌പിന്‍ ജോഡികള്‍ ഇതുവരെ 28 വിക്കറ്റാണ് സ്വന്തമാക്കിയിട്ടുള്ളത്. ലോകക്രിക്കറ്റ് ആരാധകര്‍ഡക്ക് സുപരിചിതനാണ് റാഷിദ് ഖാന്‍.
Also Read : IPL 2023 | വരവ് ചെറുരാജ്യങ്ങളിൽ നിന്നായിരിക്കാം; എന്നാൽ ഇവർ ചില്ലറക്കാരല്ല
ഗുജറാത്ത് ടൈറ്റന്‍സിനായി തകര്‍പ്പന്‍ പ്രകടനം നടത്തുന്ന നൂര്‍ അഹമ്മദിനെ ക്രിക്കറ്റ് ആസ്വാദകര്‍ക്ക് കൂടുതലറിയാന്‍ വഴിയില്ല. എന്നാല്‍ ഇപ്പോള്‍ ഈ അഫ്‌ഗാന്‍ യുവതാരം എങ്ങനെയാണ് ഐപിഎല്ലിലേക്ക് എത്തിയത് എന്നുള്‍പ്പടെയുള്ള കാര്യങ്ങള്‍ വ്യക്തമാക്കിയിരിക്കുകയാണ് ഗുജറാത്ത് അസിസ്റ്റന്‍റ് കോച്ച് ആശിഷ് കപൂര്‍.
18കാരനായ നൂര്‍ അഹമ്മദിന്‍റെ ആദ്യ ഐപിഎല്‍ സീസണാണ് ഇത്. 6 മത്സരങ്ങളിലാണ് താരത്തിന് ഇതുവരെ അവസരം ലഭിച്ചത്. അതില്‍ 10 വിക്കറ്റുകളാണ് താരം ഇതുവരെ നേടിയത്.
'2022 ഐപിഎല്ലിന് മുന്‍പ് നൂര്‍ അഹമ്മദിന്‍റെ പേര് ഞാന്‍ ധാരാളം ടീമുകള്‍ക്ക് നല്‍കിയിരുന്നു. സഹീര്‍ ഖാന്‍, വിവിഎസ് ലക്ഷ്‌മണ്‍ ഉള്‍പ്പടെയുള്ളവരോടും അവനെകുറിച്ച് പറഞ്ഞിരുന്നു. എന്നാല്‍ 17 വയസുകാരനായ അവനെ ടീമിലേക്ക് എത്തിക്കാന്‍ അവരാരും ആഗ്രഹിച്ചിരുന്നില്ല.
പിന്നീടായിരുന്നു അവനെ ഗുജറാത്ത് ടൈറ്റന്‍സിലേക്ക് പരിഗണിക്കുന്നത്. പലര്‍ക്കും അവനെ കുറിച്ച് കൂടുതല്‍ കാര്യങ്ങള്‍ അറിയുമായിരുന്നില്ല. എന്നാല്‍ എനിക്ക് അവനൊരു ഇടം കയ്യനായ റാഷിദ് ഖാന്‍ ആയിരുന്നു.' ആശിഷ് കപൂര്‍ അഭിപ്രായപ്പെട്ടു.
നൂര്‍ അഹമ്മദിന്‍റെ പ്രകടനം മെച്ചപ്പെടുത്താന്‍ നടത്തിയ യാത്ര അത്ര എളുപ്പമുള്ളതായിരുന്നില്ലെന്നും ആശിഷ് പറഞ്ഞു. 'റാഷിദ് ഖാനെപ്പോലെ പന്തെറിയാനായിരുന്നു നൂര്‍ അഹമ്മദ് ആഗ്രഹിച്ചിരുന്നു. ഈ മാനസികാവസ്ഥ മാറ്റിയെടുക്കാനായി റാഷിദ് അവനോട് സംസാരിച്ചിരുന്നു.
മറ്റൊരാളെപ്പോലെ പന്തെറിയാതെ, നീ നിന്നെപ്പോലെ പന്തെറിയണം. നമ്മള്‍ രണ്ട് പേരുടെയും ബൗളിങ് ആക്ഷനുകള്‍ വ്യത്യസ്‌തമാണ് എന്നെല്ലാം റാഷിദ് നൂര്‍ അഹമ്മദിനോട് പറഞ്ഞിരുന്നു. ഇതിന് പിന്നാലെയാണ് നൂര്‍ അഹമ്മദിന്‍റെ പ്രകടനത്തിലും മാറ്റം സംഭവിച്ചത്.'
