അഹമ്മദാബാദ്: ഇന്ത്യൻ പ്രീമിയർ ലീഗ് (ഐ‌പി‌എൽ) 2023ന്‍റെ സീസണിന്‍റെ ഉദ്‌ഘാടന മത്സരത്തില്‍ ഗുജറാത്ത് ടൈറ്റന്‍സിനെ നേരിടാനുള്ള ഒരുക്കത്തിലാണ് ചെന്നൈ സൂപ്പര്‍ കിങ്‌സ്. മത്സരത്തിനിറങ്ങുമ്പോള്‍ ഒരു വമ്പന്‍ റെക്കോഡ് ചെന്നൈ സൂപ്പര്‍ കിങ്‌സ് നായകന്‍ എംഎസ്‌ ധോണിയെ കാത്തിരിപ്പുണ്ട്. ഗുജാറാത്തിനെതിരെ 22 റണ്‍സ് നേടാന്‍ കഴിഞ്ഞാല്‍ ഐപിഎല്ലില്‍ 5000 റണ്‍സ് എന്ന നിര്‍ണായക നാഴികകല്ല് പിന്നിടാന്‍ 41കാരനായ ധോണിക്ക് കഴിയും.
ഇതോടെ ഐപിഎല്ലില്‍ ഈ നേട്ടം സ്വന്തമാക്കുന്ന ഏഴാമത്തെ മാത്രം കളിക്കാരനായും ധോണി മാറും. 2008-ൽ മുതല്‍ ഐപിഎല്ലിന്‍റെ കഴിഞ്ഞ സീസണുകളിലെല്ലാം കളിച്ച ധോണി ഇതേവരെ 4978 റണ്‍സാണ് അടിച്ച് കൂട്ടിയിട്ടുള്ളത്. 234 മത്സരങ്ങളില്‍ നിന്നും 135.20 സ്‌ട്രൈക്ക് റേറ്റില്‍ 24 അര്‍ധ സെഞ്ചുറികള്‍ ഉള്‍പ്പെടെയാണ് ചെന്നൈ നായകന്‍റെ പ്രകടനം.
ചെന്നൈക്ക് പുറമെ റൈസിങ് പൂനെ ജയന്‍റ്സിന്‍റെ കുപ്പായത്തിലും ധോണി കളിച്ചിട്ടുണ്ട്. കോഴ വിവാദത്തെ തുടര്‍ന്ന് 2013ല്‍ ചെന്നൈക്ക് വിലക്ക് ലഭിച്ചപ്പോഴായിരുന്നു ധോണി റൈസിങ് പൂനെ ജയന്‍റ്സിനായി കളിച്ചത്. പിന്നീട് 2018ല്‍ ചെന്നൈ തിരിച്ചെത്തിയപ്പോള്‍ ധോണിയും മടങ്ങിയെത്തി.
223 മത്സരങ്ങളില്‍ നിന്നും 6624 റണ്‍സ് നേടിയ റോയല്‍ ചലഞ്ചേഴ്‌സ് ബാറ്റര്‍ വിരാട് കോലിയാണ് ടൂര്‍ണമെന്‍റില്‍ ഏറ്റവും കൂടുതല്‍ റണ്‍സ് നേടിയ താരം. അഞ്ച് സെഞ്ചുറിയും 44 അര്‍ധ സെഞ്ചുറിയുമുള്‍പ്പെടെയാണ് കോലിയുടെ റണ്‍വേട്ട. 206 മത്സരങ്ങളില്‍ നിന്നും 6244 റണ്‍സ് അടിച്ച് കൂട്ടിയ ശിഖര്‍ ധവാനാണ് പട്ടികയില്‍ രണ്ടാം സ്ഥാനത്തുള്ളത്.
ഇവര്‍ രണ്ട് പേര്‍ മാത്രമാണ് ടൂര്‍ണമെന്‍റില്‍ 6000 റണ്‍സ് എന്ന നാഴികകല്ല് പിന്നിട്ട താരങ്ങള്‍. ഡേവിഡ് വാര്‍ണര്‍ (162 മത്സരങ്ങള്‍ നിന്നും 5881 റണ്‍സ്), രോഹിത് ശര്‍മ (227 മത്സരങ്ങളില്‍ നിന്നും 5879 റണ്‍സ്), സുരേഷ്‌ റെയ്‌ന (205 മത്സരങ്ങള്‍ നിന്നും 5528 റണ്‍സ്), എബി ഡിവില്ലിയേഴ്‌സ് (182 മത്സരങ്ങള്‍ നിന്നും 5162 റണ്‍സ്) എന്നിവരാണ് ധോണിക്ക് മുന്നെ ഈ നേട്ടം സ്വന്തമാക്കിയ മറ്റ് താരങ്ങള്‍.
അതേസമയം ഗുജറാത്തിനെതിരായ മത്സരത്തിന് മുമ്പായി ധോണിയുടെ ഫിറ്റ്‌നസ് സംബന്ധിച്ച് അൽപ്പം ആശങ്ക നിലനില്‍ക്കുന്നുണ്ട്. പരിശീലനത്തിനിടെ ധോണിയുടെ കാൽമുട്ടിന് പരിക്കേറ്റിരുന്നു. എന്നാല്‍ ധോണിക്ക് അഹമ്മദാബാദിൽ ഗുജറാത്തിനെതിരെ കളിക്കാനാവുമെന്നാണ് ഫ്രാഞ്ചൈസി പ്രതീക്ഷിക്കുന്നത്.
നിലവിലെ ചാമ്പ്യന്മാരായ ഗുജറാത്തിനെ തോല്‍പ്പിച്ച് സീസണില്‍ വിജയത്തുടക്കമാണ് ചെന്നൈയുടെ മനസിലെന്നത് വ്യക്തം. കഴിഞ്ഞ സീസണില്‍ അരങ്ങേറ്റക്കാരായ ഗുജറാത്തിനോട് രണ്ട് തവണ ഏറ്റുമുട്ടിയപ്പോഴും ചെന്നൈ തോല്‍വി വഴങ്ങിയിരുന്നു. ഇത്തവണ ഈ കണക്ക് ധോണിയ്‌ക്കും സംഘത്തിനും തീര്‍ക്കേണ്ടതുണ്ട്.
ഗുജറാത്ത് ടൈറ്റന്‍സ് സ്ക്വാഡ്: ഹാർദിക് പാണ്ഡ്യ (ക്യാപ്റ്റന്‍), ശുഭ്മാൻ ഗിൽ, ഡേവിഡ് മില്ലർ, അഭിനവ് മനോഹർ, സായ് സുദർശൻ, യാഷ് ദയാൽ, പ്രദീപ് സാങ്‌വാൻ, ദർശൻ നൽകണ്ടെ, വൃദ്ധിമാൻ സാഹ,മാത്യു വെയ്ഡ്, റാഷിദ് ഖാൻ, രാഹുൽ തെവാട്ടിയ, വിജയ് ശങ്കർ, മുഹമ്മദ് ഷമി, അൽസാരി ജോസഫ്, ജയന്ത് യാദവ്, ആർ സായ് കിഷോർ, നൂർ അഹമ്മദ്, കെയ്ൻ വില്യംസൺ, ഒഡെയ്‌ൻ സ്മിത്ത്, കെഎസ് ഭാരത്, ശിവം മാവി, ഉർവിൽ പട്ടേൽ, ജോഷ്വ ലിറ്റിൽ, മോഹിത് ശർമ്മ.
ചെന്നൈ സൂപ്പര്‍ കിങ്‌സ് സ്ക്വാഡ്: എം എസ് ധോണി (ക്യാപ്‌റ്റൻ), റിതുരാജ് ഗെയ്‌ക്‌വാദ്, ഡെവൺ കോൺവേ, മൊയിൻ അലി, അമ്പാട്ടി റായുഡു, രവീന്ദ്ര ജഡേജ, ശിവം ദുബെ, ബെൻ സ്റ്റോക്‌സ്, സുബ്രംശു സേനാപതി, അജിങ്ക്യ രഹാനെ, രാജ്‌വർധൻ ഹംഗാർഗേക്കർ, ഡ്വെയ്‌ൻ പ്രിട്ടോറിയസ്, മിച്ചൽ സാന്‍റ്നർ, മഹേഷ് തീക്ഷണ, പ്രശാന്ത് സോളങ്കി, ദീപക് ചഹാർ, മുകേഷ് ചൗധരി, സിമർജീത് സിങ്, തുഷാർ ദേശ്‌പാണ്ഡെ, മതീശ പതിരണ, ഷെയ്‌ക് റഷീദ്, സിസന്ദ മഗല, നിഷാന്ത് സിന്ധു, അജയ് മണ്ഡല്‍, ഭഗത് വർമ.
ALSO READ: സഞ്‌ജുവിന്‍റെ രാജസ്ഥാന്‍ റോയല്‍സ്..!; വമ്പന്‍ പ്രവചനവുമായി മൈക്കൽ വോൺ
