മുംബൈ: ഐപിഎല്ലിലെ ആവേശപ്പോരില്‍ കൊല്‍ക്കത്ത നൈറ്റ് റൈഡേഴ്‌സിനെതിരെ ബാംഗ്ലൂര്‍ റോയല്‍ ചലഞ്ചേഴ്‌സിന് മൂന്ന് വിക്കറ്റ് ജയം. കൊല്‍ക്കത്ത ഉയര്‍ത്തിയ 129 റണ്‍സ് വിജയ ലക്ഷ്യം പിന്തുടര്‍ന്ന ബാംഗ്ലൂര്‍ നാല് പന്തുകള്‍ ബാക്കി നിര്‍ത്തിയാണ് വിജയം പിടിച്ചത്. സീസണില്‍ ബാംഗ്ലൂരിന്‍റെ ആദ്യ ജയവും കൊല്‍ക്കത്തയുടെ ആദ്യ തോല്‍വിയുമാണിത്.
സ്കോര്: കൊല്‍ക്കത്ത നൈറ്റ് റൈഡഴ്‌സ്- 128/10 (18.5), റോയല്‍ ചലഞ്ചേഴ്‌സ് ബാംഗ്ലൂര്‍- 132-7( 19.2). ചെറിയ സ്കോര് പിറന്ന മത്സരത്തില്‍ ഇരുടീമുകളുടെയും ബൗളര്‍മാര്‍ മികച്ച പ്രകടനം പുറത്തെടുത്തു. 40 പന്തില്‍ 28 റണ്‍സെടുത്ത റൂഥര്‍ഫോര്‍ഡാണ് ബാംഗ്ലൂരിന്‍റെ ടോപ് സ്കോറര്‍.
ഷഹബാസ് അഹമ്മദ് (20 പന്തില്‍ 27), ഡേവിഡ് വില്ലി (28 പന്തില്‍ 18) എന്നിങ്ങനെയാണ് മറ്റ് ഉയര്‍ന്ന സ്‌കോറുകള്‍. ദിനേഷ് കാര്‍ത്തിക് (7 പന്തില്‍ 14), ഹര്‍ഷാല്‍ പട്ടേല്‍ (6 പന്തില്‍ 10) എന്നിവരാണ് പുറത്താവാതെ നിന്ന് കൊല്‍ക്കത്തയുടെ വിജയം ഉറപ്പിച്ചത്. ഫാഫ് ഡുപ്ലെസിസ് (4 പന്തില്‍ 5), അനൂജ് റാവത്ത് (2 പന്തില്‍ 0), വിരാട് കോലി (7 പന്തില്‍ 12), വാനിന്ദു ഹസരങ്ക (3 പന്തില്‍ 4) എന്നിങ്ങനെയാണ് പുറത്തായ മറ്റ് താരങ്ങളുടെ സംഭാവന.
കൊല്‍ക്കത്തക്കായി ടിം സൗത്തി നാല് ഓവറില്‍ 20 റണ്‍സ് മാത്രം വഴങ്ങി മൂന്നും, ഉമേഷ് യാദവ് 16 റണ്‍സ് മാത്രം വഴങ്ങി രണ്ടും വിക്കറ്റെടുത്തു. നാല് ഓവറില്‍ 12 റണ്‍സ് മാത്രം വിട്ടുകൊടുത്ത സുനില്‍ നരെയ്ന് ഒരു വിക്കറ്റും സ്വന്തമാക്കി.
നേരത്തെ ടോസ് നഷ്‌ടപ്പെട്ട് ബാറ്റു ചെയ്യാനിറങ്ങിയ കൊല്‍ക്കത്തയെ നാല് വിക്കറ്റെടുത്ത ഹസരങ്കയും മൂന്ന് വിക്കറ്റെടുത്ത ആകാശ് ദീപും രണ്ട് വിക്കറ്റെടുത്ത ഹര്‍ഷല്‍ പട്ടേലുമാണ് 128 റണ്‍സില്‍ എറിഞ്ഞിട്ടത്. 18 പന്തില്‍ 25 റണ്‍സെടുത്ത ആന്ദ്രെ റസലാണ് കൊല്‍ക്കത്തയുടെ ടോപ് സ്കോറര്‍.
മൂന്ന് സിക്‌സും ഒരു ഫോറുമടക്കമാണ് റസല്‍ 25 റണ്‍സടിച്ചത്. അവസാന വിക്കറ്റില്‍ ഉമേഷ് യാദവ്-വരുണ്‍ ചക്രവര്‍ത്തി സഖ്യം 27 റണ്‍സടിച്ചതാണ് കൊല്‍ക്കത്തക്ക് ഭേദപ്പെട്ട സ്‌കോർ സമ്മാനിച്ചത്. കൊല്‍ക്കത്തയുടെ തുടക്കം തന്നെതകര്‍ച്ചയോടെയായിരുന്നു. മൂന്നാം ഓവറിലെ ആദ്യ പന്തില്‍ തന്നെ അപകടകാരിയായ ഓപ്പണര്‍ വെങ്കടേഷ് അയ്യരെ കൊല്‍ക്കത്തയ്ക്ക് നഷ്‌ടമായി.
also read: ലേസർ പ്രയോഗവും വംശീയാധിക്ഷേപവും ; സെനഗൽ ആരാധകർക്കെതിരെ പരാതിയുമായി ഈജിപ്‌ത്
അഞ്ചാം ഓവറില്‍ അജിങ്ക്യ രഹാനയെ മുഹമ്മദ് സിറാജും പവര്‍പ്ലേ പിന്നിടും മുൻപ് നിതീഷ് റാണയെ ആകാശ് ദീപും മടക്കിയതോടെ പവര്‍പ്ലേയില്‍ 46-3 എന്ന സ്കോറിലായി കൊല്‍ക്കത്ത.
ക്യാപ്റ്റന്‍ ശ്രേയസ് അയ്യരെ ( 13) വീഴ്ത്തി വിക്കറ്റ് വേട്ട തുടങ്ങിയ ഹസരങ്ക, സുനില്‍ നരെയ്ന്(12), ഷെല്‍ഡണ്‍ ജാക്‌സണ്‍(0), ടിം സൗത്തി(1) എന്നിവരെയും ഇരയാക്കി. പിടിച്ചുനില്‍ക്കാൻ ശ്രമിച്ച സാം ബില്ലിംഗ്‌സിനെയും(14) ആന്ദ്രെ റസലിനെയും ഹര്‍ഷല്‍ പട്ടേലുമാണ് വീഴ്‌ത്തിയത്.
