മുംബൈ: ക്രിക്കറ്റ് ലോകകപ്പ് എന്ന് കേള്‍ക്കുമ്പോള്‍ തന്നെ പലരുടെയും മനസിലേക്ക് ഓടിയെത്തുന്നതാണ് ഇന്ത്യ (India) - പാകിസ്ഥാന് (Pakistan) പോരാട്ടം. ചിരവൈരികളായ ഈ രണ്ട് ടീമും ലോകവേദിയില്‍ മുഖാമുഖം വരുമ്പോള്‍ ആവേശം മൈതാനത്തിന് പുറത്തേക്കും ഒഴുകാറുണ്ട്. ലോക ക്രിക്കറ്റിലെ തന്നെ ഏറ്റവും വാശിയേറിയ പോരാട്ടങ്ങളിലൊന്നായാണ് ഇന്ത്യ - പാക് പോരാട്ടങ്ങള്‍ പലപ്പോഴും വിശേഷിപ്പിക്കുപ്പെടുന്നത്.
ഇന്ത്യയില്‍ ഈ വര്‍ഷം നടക്കുന്ന ഏകദിന ലോകകപ്പിലെ (ODI World Cup) ഇന്ത്യ - പാക് പോരാട്ടത്തിനായി ആരാധകര്‍ ആവേശത്തോടെയാണ് കാത്തിരിക്കുന്നത്. ഓക്‌ടോബര്‍ 15ന് അഹമ്മദാബാദിലെ നരേന്ദ്രമോദി സ്റ്റേഡിയത്തില്‍ വച്ചാണ് ഈ മത്സരം നടക്കുന്നത്. മത്സരത്തിന് ഇനിയും ഒരുപാട് ദിവസങ്ങള്‍ ശേഷിക്കുന്നുണ്ടെങ്കിലും കായിക ലോകത്ത് ഇപ്പോള്‍ തന്നെ ഇന്ത്യ - പാക് പോരാട്ടത്തെ കുറിച്ചുള്ള ചര്‍ച്ചകള്‍ സജീവമായിട്ടുണ്ട്.
കഴിഞ്ഞ ദിവസം ഇന്ത്യ പാകിസ്ഥാന് മത്സരത്തെ കുറിച്ച് സംസാരിച്ചുകൊണ്ട് വെസ്റ്റ് ഇന്‍ഡീസ് മുന്‍ താരം ക്രിസ് ഗെയില്‍ (Chris Gayle) രംഗത്തെത്തിയിരുന്നു. ചിരവൈരികളായ ഇംഗ്ലണ്ടും ഓസ്‌ട്രേലിയയും നേര്‍ക്കുനേര്‍ വരുന്ന ആഷസ് (Ashes) പരമ്പരയേക്കാള്‍ വലുതാണ് ലോകകപ്പിലെ ഇന്ത്യ-പാക് പോര് എന്നാണ് അദ്ദേഹത്തിന്‍റെ അഭിപ്രായം. ഇന്ത്യയിലെ ഒരു ദേശീയ മാധ്യമത്തിന് നല്‍കിയ അഭിമുഖത്തിലായിരുന്നു ഗെയില്‍ ഇത്തരത്തിലൊരു പ്രതികരണം നടത്തിയത്.
'ആഷസിനേക്കാള്‍ വലിയ പോരാട്ടമാണ് ഇന്ത്യ-പാകിസ്ഥാന് മത്സരങ്ങള്‍. ഏറ്റവും വലിയ പോരാട്ടങ്ങളില്‍ ഒന്ന്. ലോക വേദിയില്‍ ഈ രണ്ട് ടീമും നേര്‍ക്കുനേര്‍ വരുമ്പോള്‍ കോടിക്കണക്കിന് ആളുകളാണ് ആ മത്സരം കാണുന്നത്. ഒക്‌ടോബര്‍ 15ന് എന്തായിരിക്കും സംഭവിക്കുക എന്ന് കാണാനായി ഞാനും കാത്തിരിക്കുകയാണ്' ക്രിസ് ഗെയില്‍ പറഞ്ഞു.
ലോകകപ്പില്‍ ഇന്ത്യയ്ക്ക് വേണ്ടി മികച്ച പ്രകടനം നടത്താന്‍ സാധ്യതയുള്ള രണ്ട് താരങ്ങളെ കുറിച്ചും ഗെയില്‍ സംസാരിച്ചു. സ്റ്റാര്‍ പേസര്‍ ജസ്‌പ്രീത് ബുംറയും സൂര്യകുമാര്‍ യാദവും ആയിരിക്കും ഇന്ത്യന്‍ ടീമിന്‍റെ കീ പ്ലെയേഴ്‌സ് എന്നും വിന്‍ഡീസ് ഇതിഹാസം അഭിപ്രായപ്പെട്ടു.
ഓസ്‌ട്രേലിയ വേദിയായ ടി20 ലോകകപ്പില്‍ ആണ് ഇന്ത്യ പാകിസ്ഥാന് ടീമുകള്‍ ഏറ്റുമുട്ടിയത്. അന്ന്, പാകിസ്ഥാനെതിരെ ആവേശകരമായ ജയം ഇന്ത്യ സ്വന്തമാക്കിയിരുന്നു. മെല്‍ബണില്‍ നടന്ന മത്സരത്തില്‍ വിരാട് കോലിയുടെ തകര്‍പ്പന്‍ ബാറ്റിങ്ങിന്‍റെ കരുത്തില്‍ നാല് വിക്കറ്റിന്‍റെ ജയമാണ് ഇന്ത്യ നേടിയത്.
ഈ തോല്‍വിയുടെ കണക്ക് തീര്‍ക്കാന്‍ കൂടിയാകും ഇപ്രാവശ്യം പാകിസ്ഥാന്‍റെ വരവ്. എന്നാല്‍, പാക് പടയ്‌ക്ക് ആശ്വസിക്കാന്‍ തക്കതായ ചരിത്രമൊന്നും ഏകദിന ലോകകപ്പില്‍ ഇന്ത്യയ്‌ക്കെതിരെ ഇല്ല. ഏകദിന ലോകകപ്പില്‍ ഏഴ് പ്രാവശ്യം ഏറ്റുമുട്ടിയപ്പോഴും ഇന്ത്യയ്‌ക്കൊപ്പമായിരുന്നു ജയം.
കഴിഞ്ഞ ഏകദിന ലോകകപ്പില്‍ പാകിസ്ഥാനെതിരെ മഴ നിയമപ്രകാരം 89 റണ്‍സിന്‍റെ ജയമാണ് നേടിയത്. ഓള്‍ഡ് ട്രഫോര്‍ഡില്‍ നടന്ന മത്സരത്തില്‍ ആദ്യം ബാറ്റ് ചെയ്‌ത ഇന്ത്യ രോഹിത് ശര്‍മയുടെ സെഞ്ച്വറിക്കരുത്തില്‍ 336 റണ്‍സാണ് നേടിയത്. പിന്നാലെ മഴയെ തുടര്‍ന്ന് മത്സരം 40 ഓവറായി വെട്ടിച്ചുരുക്കുകയും 302 എന്ന വിജയലക്ഷ്യം പാകിസ്ഥാന് ലഭിക്കുകയും ചെയ്‌തു.
ഇത് പിന്തുടര്‍ന്നിറങ്ങിയ പാകിസ്ഥാന് നിശ്ചിത ഓവറില്‍ ആറ് വിക്കറ്റ് നഷ്‌ടത്തില്‍ 212 റണ്‍സ് മാത്രമാണ് നേടാനായത്. ഏകദേശം 273 ദശലക്ഷം കാഴ്‌ചക്കാരായിരുന്നു അന്ന് ഈ മത്സരം വീക്ഷിച്ചതെന്ന് പിന്നീട് റിപ്പോര്‍ട്ടുകള്‍ പുറത്തുവന്നിരുന്നു.
