സിഡ്‌നി: ആദ്യ ഏകദിനത്തിന്‍റെ തനിയാവര്‍ത്തനമായിരുന്നു സിഡ്‌നിയിലും. ഇന്ത്യൻ ബൗളര്‍മാരെ നിലംപരിശാക്കി ഓസീസ് ബാറ്റ്‌സ്‌മാൻമാരുടെ തോരോട്ടം. ഇറങ്ങിയ ആറ് പേരില്‍ നാല് പേര്‍ അര്‍ധസെഞ്ച്വറിയും ഒരാള്‍ സെഞ്ച്വറിയും നേടിയപ്പോള്‍ 50 ഓവറില്‍ ഓസ്‌ട്രേലിയ അടിച്ചെടുത്തത് 389 റണ്‍സ്. നഷ്‌ടപ്പെടുത്തിയതാകട്ടെ നാല് വിക്കറ്റും. തുടര്‍ച്ചയായ രണ്ടാം മത്സരത്തിലും സെഞ്ച്വറി നേടിയ സ്റ്റീവ് സ്‌മിത്ത് (64 പന്തില്‍ 104) ടീമിനെ മുന്നില്‍ നിന്ന് നയിച്ചു.
ബാറ്റിങ് പിച്ചില്‍ ടോസ്‌ നേടി ബാറ്റിങ് തെരഞ്ഞെടുത്ത തീരുമാനം ശരിവയ്‌ക്കുന്ന പ്രകടനമാണ് ഓപ്പണര്‍മാരായ ഡേവിഡ് വാര്‍ണറും ക്യാപ്‌റ്റര്‍ ആരോണ്‍ ഫിഞ്ചും പുറത്തെടുത്തത്. ആദ്യ വിക്കറ്റില്‍ ഇരുവരും ചേര്‍ന്ന് 142 റണ്‍സ് കൂട്ടിച്ചേര്‍ക്കുമ്പോള്‍ 22.5 ഓവര്‍ മാത്രമേ കഴിഞ്ഞിരുന്നുള്ളു. 69 പന്തില്‍ 60 റണ്‍സെടുത്ത ക്യാപ്‌റ്റൻ ഫിഞ്ചിന്‍റെ വിക്കറ്റാണ് ആദ്യം നഷ്‌ടമായത്. ആദ്യ മത്സരത്തില്‍ ഇന്ത്യയ്‌ക്കായി ഭേദപ്പെട്ട പ്രകടനം കാഴ്‌ച വച്ച മുഹമ്മദ് ഷമിക്കായിരുന്നു വിക്കറ്റ്. പിന്നാലെ സ്‌കോര്‍ ബോര്‍ഡ് 156ല്‍ എത്തിയപ്പോഴേക്കും 77 പന്തില്‍ 83 റണ്‍സുമായി ഡേവിഡ് വാര്‍ണര്‍ പുറത്തായി.
പിന്നാലെയെത്തിയ സ്‌മിത്തും ലബുഷെയ്‌നും ചേര്‍ന്ന് ഓസീസ് സ്‌കോറിങ്ങിനെ പഴയ വേഗത്തിലേക്ക് തിരിച്ചെത്തു. 292 റണ്‍സ് കൂട്ടിച്ചേര്‍ത്ത് 42ആം ഓവറിലാണ് സഖ്യം പിരിഞ്ഞത്. സെഞ്ച്വറി നേടിയ സ്‌മിത്ത് പുറത്ത്. പിന്നാലെയെത്തിയ മാക്‌സ്‌വെല്ല് തകര്‍ത്തടിച്ചു. 29 പന്തില്‍ നാല് സിക്‌സും നാല് ഫോറും അടക്കം 63 റണ്‍സെടുത്ത മാക്‌സ്‌വെല്‍ അവസാന നിമിഷം സ്‌കോറിങ്ങിന് റോക്കറ്റ് വേഗം നല്‍കി. മറുവശത്ത് 61 പന്തില്‍ 70 റണ്‍സുമായി ലബുഷെയ്‌ൻ മികച്ച പിന്തുണ നല്‍കി. 49ആം ഓവറിന്‍റെ അവസാന പന്തിലാണ് ലബുഷെയ്‌ൻ പുറത്തായത്.
കഴിഞ്ഞ കളിയില്‍ കണക്കിന് തല്ലുകൊണ്ട സെയ്‌നി ഇത്തവണയും റണ്‍സ് വിട്ടുകൊടുത്തു. ഏഴ്‌ ഓവറില്‍ 70 റണ്‍സ് വിട്ടുകൊടുത്ത സെയ്‌നിക്ക് ഒരു വിക്കറ്റ് പോലും നേടാനായില്ല. ഇന്ത്യയ്‌ക്കായി ഷമി, ബുംറ, ഹാര്‍ദിക് പാണ്ഡ്യ എന്നിവര്‍ ഓരോ വിക്കറ്റ് വീഴ്‌ത്തി.
