ചെന്നൈ : ന്യൂസിലാന്‍ഡ് എയ്‌ക്കെതിരായ ഏകദിന പരമ്പര സ്വന്തമാക്കി ഇന്ത്യ എ. ചെന്നൈ ചിദംബരം സ്റ്റേഡിയത്തിൽ നടന്ന രണ്ടാം ഏകദിനത്തില്‍ നാല് വിക്കറ്റിന്‍റെ ജയമാണ് സഞ്ജു സാംസണ്‍ നയിക്കുന്ന ഇന്ത്യ എ നേടിയത്. ആദ്യം ബാറ്റ് ചെയ്‌ത ന്യൂസിലാന്‍ഡ് എ 219 റണ്‍സെടുത്തപ്പോള്‍ ഇന്ത്യ 34 ഓവറില്‍ ആറ് വിക്കറ്റ് നഷ്‌ടത്തില്‍ ലക്ഷ്യത്തിലെത്തി.
48 പന്തിൽ 11 ഫോറും മൂന്ന് സിക്‌സും സഹിതം 77 റൺസെടുത്ത പൃഥ്വി ഷാ, 35 പന്തില്‍ നാല് ഫോറും രണ്ട് സിക്‌സും ഉള്‍പ്പടെ 37 റണ്‍സെടുത്ത സഞ്ജു സാംസണ്‍ എന്നിവരണ് ഇന്ത്യക്ക് ജയമൊരുക്കിയത്. ഹാട്രിക്കടക്കം 4 വിക്കറ്റുമായി കുല്‍ദീപ് യാദവ് ബോളിങ്ങിലും മികവ് കാട്ടി. സ്കോര്‍: ന്യൂസിലാന്‍ഡ്- 219(47), ഇന്ത്യ 222-6(34).
കിവീസിന്‍റെ 220 റൺസ് പിന്തുടർന്ന ഇന്ത്യയ്ക്ക് ഓപ്പണര്‍മാരായ പൃഥ്വി ഷായും ഋതുരാജ് ഗെയ്‌ക്വാദും ചേർന്ന് മികച്ച തുടക്കമാണ് നൽകിയത്. ഓപ്പണിങ് വിക്കറ്റിൽ 82 റൺസാണ് ഇരുവരും കൂട്ടിച്ചേർത്തത്. 34 പന്തില്‍ 30 റണ്‍സ് നേടിയ ഗെയ്‌ക്വാദാണ് ആദ്യം പുറത്തായത്.
രണ്ടാം വിക്കറ്റില്‍ രജത് പടിദാറിനെ കൂട്ടുപിടിച്ച് ടീമിനെ മുന്നോട്ടുനയിച്ച പൃഥ്വി ഷാ അര്‍ധസെഞ്ച്വറി നേടിയത്. പടിദാര്‍ 17 പന്തില്‍ 20 ഉം തിലക് വര്‍മ ഗോള്‍ഡന്‍ ഡക്കായും അടുത്തടുത്ത ഓവറുകളില്‍ പുറത്തായി. ആദ്യ ഏകദിനത്തിലെ മികവ് തുടർന്ന നായകൻ സഞ്ജു സാംസണ്‍ 35 പന്തില്‍ 37 റണ്‍സെടുത്തു.
തൊട്ടുപിന്നാലെ യുവതാരം രാജ് ബാവയും(0) മടങ്ങി. പിന്നീട് ക്രീസിൽ ഒത്തുചേർന്ന ഋഷി ധവാനും(43 പന്തില്‍ 22*), ഷര്‍ദ്ദുല്‍ ഠാക്കൂറും(25 പന്തില്‍ 25*) 34-ാം ഓവറില്‍ ഇന്ത്യയെ വിജയത്തിലെത്തിച്ചു.
കറക്കി വീഴ്‌ത്തി കുൽദീപ് : നേരത്തെ ടോസ് നേടി ബാറ്റിങ്ങിനിറങ്ങിയ ന്യൂസിലാന്‍ഡ് എ കുൽദീപിന് മുന്നിൽ തകർന്നടിയുകയായിരുന്നു. ഹാട്രിക്കടക്കം നാല് വിക്കറ്റാണ് കുൽദീപ് സ്വന്തമാക്കിയത്. 47-ാം ഓവറില്‍ വാന്‍ ബീക്ക്, വോക്കര്‍, ഡഫ്ഫി എന്നിവരെ പുറത്താക്കിയായിരുന്നു കുല്‍ദീപിന്‍റെ ഹാട്രിക്. അർദ്ധ സെഞ്ച്വറി നേടിയ ജോ കാര്‍ട്ടര്‍ (72), രചിന്‍ രവീന്ദ്ര (61) എന്നിവരാണ് ന്യൂസിലാന്‍ഡിനെ 200 കടത്തിയത്.
