മുംബൈ: ഇന്ത്യയുടെ ഏകദിന ലോകകപ്പ് ടീമിലേക്ക് അവകാശവാദം ഉന്നയിക്കാന്‍ മലയാളി ബാറ്റര്‍ സഞ്ജു സാംസണ് മുന്നിലുള്ള അവസരമാണ് വെസ്റ്റ് ഇന്‍ഡീസിനെതിരായ പരമ്പര. റിഷഭ്‌ പന്തിന്‍റെ പങ്കാളിത്തം ചോദ്യചിഹ്നമായിരിക്കെ വെസ്റ്റ് ഇന്‍ഡീസിനെതിരെ മിന്നും പ്രകടനം നടത്താന്‍ കഴിഞ്ഞാല്‍ സഞ്‌ജുവിന്‍റെ ഭാവിയ്‌ക്ക് ഗുണം ചെയ്യുമെന്നുറപ്പാണ്. 2022 നവംബറിന് ശേഷം ആദ്യമായാണ് 28-കാരനായ സഞ്ജു സാംസണ് ഇന്ത്യന്‍ ടീമിലേക്ക് വീണ്ടും വിളിയെത്തുന്നത്.
ഇപ്പോഴിതാ താരത്തെ ക്യാപ്റ്റന്‍ രോഹിത് ശര്‍മയ്‌ക്ക് ഒപ്പം ഓപ്പണറാക്കണമെന്ന് അഭിപ്രായപ്പെട്ടിരിക്കുകയാണ് ഇന്ത്യയുടെ മുന്‍ സെലക്‌ടര്‍ എംഎസ്‌കെ പ്രസാദ്. സൂര്യകുമാർ യാദവ് മധ്യനിരയിൽ കളിക്കുന്നതിനാലാണ് പ്രസാദ് സഞ്ജുവിനെ ഓപ്പറായി ഇറക്കണമെന്ന നിലപാടിലേക്ക് എത്തിയിരിക്കുന്നത്. "ഇതിനകം തന്നെ സൂര്യകുമാർ യാദവ് ടീമിലുണ്ട്. സഞ്ജുവും സൂര്യകുമാര്‍ യാദവും തമ്മില്‍ ഒരു മത്സരം ഉണ്ടെന്ന് എനിക്കു തോന്നുന്നേയില്ല.
സഞ്ജു ഒരു ടോപ് ഓർഡർ ബാറ്ററാണ്. സൂര്യകുമാര്‍ യാദവ് ഒരു മിഡില്‍ ഓര്‍ഡര്‍ ബാറ്ററാണ്. നാലാമതോ, അഞ്ചാമതോ ഒക്കെ കളിക്കാം. രോഹിത് ശർമയ്‌ക്കൊപ്പം സഞ്ജു ഓപ്പണ്‍ ചെയ്യില്ലെന്ന് നമുക്ക് പറയാന്‍ കഴിയില്ല. അതില്‍ തന്നെ സഞ്ജുവും സൂര്യയും തമ്മില്‍ പ്ലേയിങ് ഇലവനിലേക്ക് എത്താന്‍ ഒരു മത്സരവുമില്ല. സഞ്ജുവും ഒരു വിക്കറ്റ് കീപ്പര്‍ ബാറ്ററും തമ്മിലാണ് മത്സരമുള്ളത്", എംഎസ്‌കെ പ്രസാദ് പറഞ്ഞു.
നിലവില്‍ രോഹിത്തിനൊപ്പം ശുഭ്‌മാൻ ഗില്ലാണ് ഇന്ത്യയ്‌ക്കായി ഇന്നിങ്‌സ് ഓപ്പണ്‍ ചെയ്യാന്‍ ഇറങ്ങുന്നത്. കൂടാതെ ഓപ്പണര്‍മാരായി കളിക്കുന്ന ഇഷാന്‍ കിഷന്‍, റിതുരാജ് ഗെയ്‌ക്‌വാദ് എന്നിവരും വെസ്റ്റ് ഇൻഡീസിനെതിരായ ഏകദിന ടീമിലുണ്ട്. ഇതോടെ ഓപ്പണിങ് സ്ഥാനത്തേക്ക് സഞ്ജുവിനെ പരിഗണിക്കാന്‍ സാധ്യത കുറവാണ്.
ഇന്ത്യയ്‌ക്കായി ഏകദിന ക്രിക്കറ്റില്‍ ലഭിച്ച അവസരങ്ങളില്‍ മികച്ച പ്രകടനം നടത്തിയ താരമാണ് സഞ്ജു സാംസണ്. ഇതേവരെ കളിച്ച 11 ഏകദിനങ്ങളില്‍ നിന്നായി 66.00 ശരാശരിയിൽ 330 റൺസാണ് താരം നേടിയിട്ടുള്ളത്. 2015-ല്‍ സിംബാബ്‌വെക്കെതിരായ ടി20 പരമ്പരയിലൂടെ അന്താരാഷ്‌ട്ര അരങ്ങേറ്റം നടത്തിയ സഞ്‌ജുവിന് അവസരങ്ങള്‍ക്കായി ഏറെ കാത്തിരിക്കേണ്ടി വന്നിരുന്നു.
ALSO READ: IND vs WI | രോഹിത്, കോലി, രഹാനെ... ? വിന്‍ഡീസ് പരീക്ഷ നാളെ തുടങ്ങും
ഇന്ത്യയുടെ വെസ്റ്റ് ഇന്‍ഡീസ് പര്യടനത്തില്‍ രണ്ട് ടെസ്റ്റുകളും മൂന്ന് ഏകദിനങ്ങളും അഞ്ച് ടി20 മത്സരങ്ങളുമാണ് അടങ്ങിയിട്ടുള്ളത്. ഏകദിനത്തിന് പുറമെ ടി20 സ്‌ക്വാഡിലും സഞ്ജു ഉള്‍പ്പെട്ടിട്ടുണ്ട്. ടെസ്റ്റിലും ഏകദിനത്തിലും ഇന്ത്യയെ രോഹിത് ശര്‍മ നയിക്കുമ്പോള്‍ ഹാര്‍ദിക് പാണ്ഡ്യയ്‌ക്ക് കീഴിലാണ് ടീം ടി20 കളിക്കുന്നത്.
സഞ്ജുവിനെ ടെസ്റ്റ് ടീമിലും ഉള്‍പ്പെടുത്താമായിരുന്നുവെന്ന് ഇന്ത്യയുടെ ഇതിഹാസ താരം സുനില്‍ ഗവാസ്‌കര്‍ അഭിപ്രായപ്പെട്ടിരുന്നു. മികച്ച പ്രതിഭയുള്ള സഞ്ജു ഏകദിന ടീമിലേക്ക് തിരിച്ചെത്തിയതില്‍ ഏറെ സന്തോഷമുണ്ട്. ടെസ്റ്റ് ടീമില്‍ താരത്തെ ഉള്‍പ്പെടുത്താനുള്ള അവസരമാണ് സെലക്‌ടര്‍മാര്‍ നഷ്‌ടപ്പെടുത്തിയതെന്നുമായിരുന്നു ഗവാസ്‌കറുടെ വാക്കുകള്‍.
ALSO READ: IND W vs BAN W| മുത്തുമണിയായി മിന്നുവും ഷഫാലിയും; ബംഗ്ലാദേശിനെതിരെ ഇന്ത്യയ്‌ക്ക് നാടകീയ വിജയം
