സിഡ്‌നി: ഇന്ത്യയ്‌ക്കെതിരായ ബോര്‍ഡര്‍-ഗവാസ്‌കര്‍ ട്രോഫി പരമ്പരയിലെ കഴിഞ്ഞ രണ്ട് മത്സരങ്ങളിലും ഓസ്‌ട്രേലിയ പരാജയപ്പെട്ടിരുന്നു. ഇന്ത്യയുടെ സ്‌പിൻ ജോഡിയായ രവീന്ദ്ര ജഡേജയ്‌ക്കും ആര്‍ അശ്വിനും മുന്നില്‍ പേരുകേട്ട ഓസീസിന്‍റെ ബാറ്റിങ് നിര ദയനീയമായി പരാജയപ്പെട്ടതാണ് സംഘത്തിന് തിരിച്ചടിയായത്. ബോർഡർ- ഗവാസ്‌കർ ട്രോഫിയിൽ രണ്ട് മത്സരങ്ങളിലായുള്ള ഓസീസിന്‍റെ 40 വിക്കറ്റുകളില്‍ 31എണ്ണവും അശ്വിനും ജഡേജയും ചേര്‍ന്നാണ് വീഴ്‌ത്തിയത്.
മറുവശത്ത് ഓസ്‌ട്രേലിയൻ സ്‌പിന്നർമാരായ നഥാൻ ലിയോൺ, ടോഡ് മർഫി, മാത്യൂ കുഹ്നെമാൻ എന്നിവർക്ക് ഇതേ സ്വാധീനം സൃഷ്‌ടിക്കാൻ കഴിഞ്ഞില്ല. ഇതിന് പിന്നാലെ ഓസീസ് സ്‌പിന്നര്‍മാര്‍ക്ക് ഉപദേശവുമായി രംഗത്തെത്തിയിരിക്കുകയാണ് മുന്‍ നായകന്‍ ഇയാൻ ചാപ്പൽ. അശ്വിനെയും ജഡേജയേയും അനുകരിക്കാന്‍ ശ്രമിക്കരുതെന്നാണ് ചാപ്പല്‍ ഓസീസ് താരങ്ങളോട് പറയുന്നത്. ഇരുവരുടെയും കഴിവ് പകര്‍ത്താന്‍ കഴിയില്ലെന്നും ചാപ്പല്‍ പറഞ്ഞു.
"അശ്വിനെക്കുറിച്ചും ജഡേജയെക്കുറിച്ചും സംസാരിക്കുമ്പോൾ... ഇന്ത്യയിൽ എന്തുചെയ്യണമെന്ന് അവർക്ക് കൃത്യമായി അറിയാം. അശ്വിൻ ഒരു മികച്ച ബോളറാണ്, മിന്നുന്ന പ്രകടനം നടത്താന്‍ എവിടെയെന്നത് താരത്തിന് പ്രശ്‌നമല്ല. അശ്വിന്‍ ഓസ്‌ട്രേലിയയിൽ പന്തെറിയുന്നത് ഞാൻ കണ്ടിട്ടുണ്ട്.
അവൻ വളരെ മിടുക്കനാണ്. താന്‍ ചെയ്യേണ്ട കാര്യങ്ങള്‍ കൃത്യമായാണ് അവന്‍ ചെയ്യുന്നത്. കുറച്ച് കാര്യങ്ങൾ പഠിച്ച് മെച്ചപ്പെടുത്തിയെങ്കിലും ജഡേജയുടെ ബോളിങ്ങില്‍ വളരെയധികം വ്യത്യാസമില്ല. എന്നാല്‍ ഇന്ത്യക്ക് അനുയോജ്യമായ കഴിവുകളാണ് ജഡേജയ്‌ക്കുള്ളത്. അശ്വിനും ജഡേജയും ചേര്‍ന്ന് മികച്ച രീതിയിലാണ് പന്തെറിയുന്നത്", ചാപ്പല്‍ പറഞ്ഞു.
അശ്വിനെപ്പോലെ പന്തെറിയാൻ ശ്രമിക്കാതെ നഥാൻ ലിയോൺ സ്വന്തം നിലയില്‍ വിജയം കണ്ടെത്തണമെന്നും ചാപ്പല്‍ കൂട്ടിച്ചേര്‍ത്തു. "നഥാൻ ലിയോൺ, ആർ അശ്വിൻ അല്ല. അവര്‍ ചെയ്യുന്ന കാര്യം നിങ്ങള്‍ക്ക് ആവര്‍ത്തിക്കാനാവുമെന്ന് എനിക്ക് തോന്നുന്നില്ല. സ്വന്തം വഴിയിൽ വിജയം കണ്ടെത്താനാണ് ലിയോണ്‍ ശ്രമിക്കേണ്ടത്", ചാപ്പൽ പറഞ്ഞു നിര്‍ത്തി.
