ചെന്നൈ: ഏകദിന ലോകകപ്പിലെ (Cricket World Cup 2023) ജീവന്‍ മരണപ്പോരാട്ടത്തില്‍ ദക്ഷിണാഫ്രിക്കയ്‌ക്ക് എതിരെ ഭേദപ്പെട്ട സ്‌കോര്‍ നേടി പാകിസ്ഥാന്. ആദ്യം ബാറ്റ് ചെയ്‌ത പാക് ടീം 46.4 ഓവറില്‍ 270 റണ്‍സിന് ഓള്‍ഔട്ടായി. തുടര്‍ച്ചയായ ഇടവേളകളില്‍ വിക്കറ്റ് നഷ്‌ടപ്പെട്ട പാകിസ്ഥാന് ക്യാപ്റ്റന്‍ ബാബര്‍ അസം (65 പന്തില്‍ 50), സൗദ് ഷക്കീല്‍ (52 പന്തില്‍ 52), ഷദാബ് ഖാന്‍ (36 പന്തില്‍ 43) എന്നിവരുടെ ഇന്നിങ്‌സുകള്‍ നിര്‍ണായകമായി.
പ്രോട്ടീസിനായി തബ്രിസ് ഷംസി നാല് വിക്കറ്റുകള്‍ വീഴ്‌ത്തി. മാര്‍ക്കോ ജാന്സന് മൂന്ന് വിക്കറ്റുണ്ട്. സ്‌കോര്‍ ബോര്‍ഡില്‍ 20 റണ്‍സ് മാത്രമുള്ളപ്പോള്‍ പാകിസ്ഥാന് ആദ്യ വിക്കറ്റ് നഷ്‌ടമായി. അബ്ദുള്ള ഷഫീഖിനെ (17 പന്തില്‍ 9) മാര്‍ക്കോ ജാന്‍സന്‍റെ പന്തില്‍ ലുങ്കി എൻഗിഡി പിടികൂടുകയായിരുന്നു.
തുടര്‍ന്നെത്തിയ ക്യാപ്റ്റന്‍ ബാബര്‍ അസമിനൊപ്പം ഇന്നിങ്‌സ് മുന്നോട്ട് നയിക്കുകയായിരുന്ന മറ്റൊരു ഓപ്പണറായ ഇമാം ഉൾ ഹഖിനേയും (18 പന്തില്‍ 12) മാര്‍ക്കോ ജാന്സന് മടക്കി. പിന്നീട് ഒന്നിച്ച മുഹമ്മദ് റിസ്‌വാന്‍ -ബാബര്‍ സഖ്യം 48 റണ്‍സ് കൂട്ടിച്ചേര്‍ത്തു. റിസ്‌വാനെ വിക്കറ്റ് കീപ്പര്‍ ക്വിന്‍റണ്‍ ഡി കോക്കിന്‍റെ കയ്യിലെത്തിച്ച് ജെറാൾഡ് കോറ്റ്‌സിയാണ് പ്രോട്ടീസിന് ബ്രേക്ക് ത്രൂ നല്‍കിയത്.
ഇഫ്തിഖർ അഹമ്മദ് (31 പന്തില്‍ 21) ഏറെ ക്ഷമയോടെ കളിച്ചുവെങ്കിലും തബ്രിസ് ഷംസിയുടെ പന്തില്‍ ഹെൻറിച്ച് ക്ലാസൻ കയ്യിലൊതുക്കി. അധികം വൈകാതെ ബാബറിന്‍റെ ചെറുത്ത് നില്‍പ്പ് ഷംസി അവസാനിപ്പിച്ചതോടെ പാകിസ്ഥാന് 27.5 ഓവറില്‍ അഞ്ചിന് 141 എന്ന നിലയിലേക്ക് വീണു.
എന്നാല്‍ പിന്നീട് ക്രീസില്‍ ഒത്തുചേര്‍ന്ന സൗദ് ഷക്കീലും ഷദാബ് ഖാനും ചേര്‍ന്ന് കൂട്ടത്തകര്‍ച്ച ഒഴിവാക്കി. ആറാം വിക്കറ്റില്‍ 84 റണ്‍സാണ് ഇരുവരും ചേര്‍ന്ന് കണ്ടെത്തിയത്. ജെറാൾഡ് കോറ്റ്‌സി എറിഞ്ഞ 40-ാം ഓവറിന്‍റെ നാലാം പന്തില്‍ ഷദാബിനെ കേശവ് മഹാരാജ് പിടികൂടിയതോടെയാണ് ഈ കൂട്ടുകെട്ട് പൊളിയുന്നത്. മൂന്ന് ഓവറുകള്‍ക്കപ്പുറം സൗദ് ഷക്കീലും മടങ്ങി. പിന്നീടുള്ളവരില്‍ മുഹമ്മദ് നവാസ് (24 പന്തില്‍ 24) മാത്രമാണ് രണ്ടക്കം തൊട്ടത്. ഷഹീൻ അഫ്രീദി (4 പന്തില്‍ 2), മുഹമ്മദ് വസീം ജൂനിയർ (9 പന്തില്‍ 7) എന്നിവര്‍ പുറത്തായപ്പോള്‍ ഹാരിസ് റൗഫ് (1 പന്തില്‍ 0) പുറത്താവാതെ നിന്നു.
പാകിസ്ഥാന് (പ്ലേയിങ് ഇലവന്‍): അബ്ദുള്ള ഷഫീഖ്, ഇമാം ഉൾ ഹഖ്, ബാബർ അസം(സി), മുഹമ്മദ് റിസ്വാൻ(ഡബ്ല്യു), സൗദ് ഷക്കീൽ, ഷദാബ് ഖാൻ, ഇഫ്തിഖർ അഹമ്മദ്, മുഹമ്മദ് നവാസ്, ഷഹീൻ അഫ്രീദി, മുഹമ്മദ് വസീം ജൂനിയർ, ഹാരിസ് റൗഫ്.
ദക്ഷിണാഫ്രിക്ക (പ്ലേയിങ് ഇലവന്‍): ക്വിന്‍റൺ ഡി കോക്ക് (ഡബ്ല്യു), ടെംബ ബാവുമ (സി), റാസി വാൻ ഡെർ ഡസ്സെൻ, എയ്ഡൻ മർക്രം, ഹെൻറിച്ച് ക്ലാസൻ, ഡേവിഡ് മില്ലർ, മാർക്കോ ജാൻസൻ, ജെറാൾഡ് കോറ്റ്‌സി, കേശവ് മഹാരാജ്, തബ്രിസ് ഷംസി, ലുങ്കി എൻഗിഡി
