കൊല്‍ക്കത്ത : ഏകദിന ലോകകപ്പിലെ തന്നെ ഏറ്റവും ആവേശകരമായ മത്സരമായ ഇന്ത്യ-ദക്ഷിണാഫ്രിക്ക പോരാട്ടം ഞായറാഴ്‌ച (05.11.2023) ഈഡന്‍ ഗാര്‍ഡനില്‍ നടക്കാനിരിക്കെ ഒപ്പം ഉയര്‍ന്ന് തട്ടിപ്പ് ആരോപണങ്ങളും. മത്സരത്തിന്‍റെ ടിക്കറ്റുകള്‍ നിയന്ത്രണാതീതമായി പുറത്തെത്തിയെന്നും ഇത് കരിഞ്ചന്തക്കാരുടെ കൈവശമെത്തിയെന്നുമാണ് ആരോപണം. ഇത്രയധികം ടിക്കറ്റുകള്‍ എങ്ങനെയാണ് കരിഞ്ചന്തക്കാരുടെ പക്കല്‍ എത്തിയതെന്ന് കണ്ടെത്താന്‍ ബംഗാള്‍ ക്രിക്കറ്റ് അസോസിയേഷന്‍ പ്രസിഡന്‍റും, മുന്‍ ഇന്ത്യന്‍ ക്യാപ്‌റ്റനും ഇതിഹാസ താരവുമായ സൗരവ് ഗാംഗുലിയുടെ ജേഷ്‌ഠനുമായ സ്‌നേഹാഷിസ് ഗംഗോപാധ്യായയ്‌ക്ക് കൊല്‍ക്കത്ത പൊലീസ് നോട്ടിസ് അയച്ചിട്ടുണ്ട്.
ചോര്‍ന്ന ഇടം തേടി പൊലീസ് : സംഭവത്തില്‍ സൗരവ് ഗാംഗുലിയും രേഖാമൂലം വിവരം തേടിയിരുന്നു. ഇതിന്‍റെ അടിസ്ഥാനത്തില്‍ ടിക്കറ്റ് ബുക്കിങ് പ്ളാറ്റ്‌ഫോമായ 'ബുക്ക് മൈ ഷോ'യുടെ ഉദ്യോഗസ്ഥരെ മൈദാന്‍ പൊലീസ് സ്‌റ്റേഷനിലേക്ക് ചോദ്യം ചെയ്യലിനായി വിളിപ്പിച്ചിരുന്നു. മാത്രമല്ല സംഭവത്തിന്‍റെ ഗൗരവം കണക്കിലെടുത്ത് കൊല്‍ക്കത്ത പൊലീസ് സൗത്ത് ഡെപ്യൂട്ടി കമ്മിഷണര്‍ പ്രിയബ്രത റോയ്‌, ആന്‍റി റൗഡി സ്‌ക്വാഡിലെ അംഗങ്ങളുമായി മൈദാന്‍ പൊലീസ് സ്‌റ്റേഷനില്‍ എത്തിയിരുന്നു.
ലോകകപ്പ് മത്സരങ്ങളുടെ ടിക്കറ്റുകൾ ഓൺലൈനിൽ നിന്നും ആരാണ് വാങ്ങിയതെന്നും അവർ എങ്ങനെയാണ് ആ ടിക്കറ്റുകൾ കരിഞ്ചന്തയിലേക്ക് എത്തിച്ചതെന്നും കണ്ടെത്തുന്നതിനുള്ള ശ്രമത്തിലാണ് അന്വേഷണ ഉദ്യോഗസ്ഥർ. അതേസമയം സംഭവത്തെ തുടര്‍ന്നുള്ള അന്വേഷണത്തിൽ വിവിധ സ്ഥലങ്ങളിൽ നിന്നായി ഇതിനോടകം ഏഴുപേരെ അറസ്‌റ്റ് ചെയ്തിട്ടുണ്ട്.
പ്രതിഷേധിച്ച് കായികപ്രേമികള്‍ : സംഭവം പുറത്തുവന്നതിന് പിന്നാലെ വ്യാഴാഴ്‌ച രാവിലെ മുതൽ ഈഡൻ ഗാർഡൻ സ്‌റ്റേഡിയത്തിന്‍റെ പരിസരത്ത് ടിക്കറ്റ് വിൽപനക്കാരും കായിക പ്രേമികളുമായുള്ള തര്‍ക്കങ്ങളും അരങ്ങേറിയിരുന്നു. ഓൺലൈനിൽ ടിക്കറ്റ് ബുക്ക് ചെയ്‌തവരില്‍ ചിലര്‍ ഇത് കരിഞ്ചന്തയില്‍ വില്‍പ്പനയ്‌ക്ക് വയ്‌ക്കുന്നുവെന്നാണ് ഇവരുടെ ആരോപണം. മാത്രമല്ല 2,500 രൂപ വില വരുന്ന ടിക്കറ്റുകള്‍ക്ക് ഇത്തരക്കാര്‍ 11,000 മുതല്‍ 15,000 രൂപയോളം വാങ്ങിയാണ് വില്‍പന നടത്തുന്നതെന്നും ഇവര്‍ ആരോപിക്കുന്നു. അതുകൊണ്ടുതന്നെ കരിഞ്ചന്ത വില്‍പന തടയാൻ നടപടി സ്വീകരിക്കണമെന്നാണ് കായികപ്രേമികളുടെ ആവശ്യം.
നിലവില്‍ സ്ഥിതിഗതികൾ നിയന്ത്രണ വിധേയമാക്കുന്നതിനാണ് കൊൽക്കത്ത പൊലീസ് ശ്രമിക്കുന്നത്. ഇതിന്‍റെ ഭാഗമായി മൈദാൻ പൊലീസ് സ്‌റ്റേഷനിലെയും സമീപത്തുള്ള മറ്റ് പൊലീസ് സ്‌റ്റേഷനുകളിലേയും ഉയർന്ന ഉദ്യോഗസ്ഥര്‍ ഉള്‍പ്പടെ വെള്ളിയാഴ്ച (03.11.2023) രാവിലെ മുതൽ ഈഡൻ ഗാർഡന്‍സിന് സമീപം നിരീക്ഷണം ശക്തമാക്കിയിട്ടുണ്ട്.
