പൂനെ : ഏകദിന ലോകകപ്പില്‍ (Cricket World Cup 2023 ) ഓസ്‌ട്രേലിയയ്‌ക്കെതിരെ മികച്ച സ്‌കോര്‍ നേടി ബംഗ്ലാദേശ്. ടോസ് നഷ്‌ടപ്പെട്ട് ആദ്യം ബാറ്റ് ചെയ്യാന്‍ ഇറങ്ങിയ ബംഗ്ലാദേശ് നിശ്ചിത 50 ഓവറിൽ എട്ട് വിക്കറ്റ് നഷ്‌ടത്തിൽ 306 റൺസാണ് അടിച്ചത് (Australia vs Bangladesh Score Updates). 79 പന്തുകളില്‍ നിന്നും 74 റൺസെടുത്ത തൗഹീദ് ഹൃദോയ് (Towhid Hridoy) ആണ് ടീമിന്‍റെ ടോപ് സ്കോറർ.
ഓസ്‌ട്രേലിയയ്‌ക്കായി സീന്‍ ആബോട്ട്, ആദം സാംപ എന്നിവര്‍ രണ്ട് വിക്കറ്റുകള്‍ വീതം വീഴ്‌ത്തി. ആദ്യ വിക്കറ്റില്‍ 76 റണ്‍സ് ചേര്‍ത്ത് ഓപ്പണര്‍മാരായ തൻസിദ് ഹസനും ലിറ്റണ്‍ ദാസും മികച്ച തുടക്കമാണ് ബംഗ്ലാദേശിന് നല്‍കിയത്. 12-ാം ഓവറിന്‍റെ രണ്ടാം പന്തില്‍ തൻസിദ് ഹസനെ (34 പന്തില്‍ 36) മടക്കിയ സീന്‍ ആബോട്ടാണ് ആദ്യ വിക്കറ്റ് വീഴ്‌ത്തിയത്.
ക്യാപ്റ്റന് നജ്‌മുള്‍ ഹുസൈൻ ഷാന്‍റോയ്‌ക്കൊപ്പം 30 റണ്‍സ് ചേര്‍ത്തതിന് ശേഷം ലിറ്റണ്‍ ദാസും (45 പന്തില്‍ 36) വീണു. ആദം സാംപയ്‌ക്കായിരുന്നു വിക്കറ്റ്. തുടര്‍ന്നെത്തിയ തൗഹീദ് ഹൃദോയ്‌ക്കൊപ്പം മികച്ച രീതിയിലാണ് നജ്‌മുള്‍ ഹുസൈൻ ഷാന്‍റോ കളിച്ചത്.
എന്നാല്‍ 28-ാം ഓവറിന്‍റെ അഞ്ചാം പന്തില്‍ ഷാന്‍റോ (57 പന്തില്‍ 45) റണ്ണൗട്ടായി. പിന്നീടെത്തിയവര്‍ക്കൊപ്പം നല്ല കൂട്ടുകെട്ട് തീര്‍ക്കാന്‍ തൗഹീദ് ഹൃദോയ്ക്ക് കഴിഞ്ഞതാണ് ബംഗ്ലാദേശിനെ മികച്ച നിലയിലേക്ക് നയിച്ചത്. മഹ്മൂദുള്ളയ്‌ക്കൊപ്പം 44 റണ്‍സും, മുഷ്‌ഫിഖര്‍ റഹീമിനൊപ്പം 37 റണ്‍സും മെഹിദി ഹസൻ മിറാസിനൊപ്പം 35 റണ്‍സും ബംഗ്ലാ ടോട്ടലില്‍ ചേര്‍ത്താണ് തൗഹീദ് ഹൃദോയ് തിരികെ കയറിയത്.
മഹ്മൂദുള്ള (28 പന്തില്‍ 32), റണ്ണൗട്ടായപ്പോള്‍ മുഷ്‌ഫിഖര്‍ റഹീമിനെ (24 പന്തില്‍ 21) ആദം സാംപ പാറ്റ് കമ്മിന്‍സിന്‍റെ കയ്യിലെത്തിച്ചു. പിന്നീട് മാർകസ് സ്റ്റോയിനിസിന്‍റെ മുന്നില്‍ തൗഹീദ് ഹൃദോയിയുടെ ചെറുത്ത് നില്‍പ്പ് അവസാനിക്കുമ്പോള്‍ 46.3 ഓവറില്‍ ആറിന് 286 എന്ന നിലയിലായിരുന്നു ബംഗ്ലാദേശ്. ടീമിനെ 300 കടത്തിയതിന് പിന്നാലെ മെഹിദി ഹസൻ മിറാസിനെ (20 പന്തില്‍ 29) സീന്‍ ആബോട്ടും തിരിച്ചുകയറ്റി. അവസാന ഓവറില്‍ നസും അഹമ്മദ് (11 പന്തില്‍ 7) റണ്ണൗട്ടായി.
ALSO READ: പാകിസ്ഥാന് പുറത്തേക്കുള്ള വാതില്‍ തുറന്ന് ഇംഗ്ലണ്ട്, സെമിയില്‍ ഇന്ത്യ-ന്യൂസിലന്‍ഡ് പോരാട്ടം
ഓസ്‌ട്രേലിയ പ്ലെയിങ് ഇലവൻ (Australia Playing XI): ട്രാവിസ് ഹെഡ്, ഡേവിഡ് വാർണർ, മിച്ചൽ മാർഷ്, സ്റ്റീവ് സ്‌മിത്ത്, മാർനസ് ലബുഷെയ്‌ന്‍, ജോഷ് ഇംഗ്ലിസ്, മാർകസ് സ്റ്റോയിനിസ്, പാറ്റ് കമ്മിൻസ് (സി), സീന്‍ ആബോട്ട്, ആദം സാംപ, ജോഷ് ഹേസൽവുഡ്.
ബംഗ്ലാദേശ് പ്ലെയിങ് ഇലവൻ (Bangladesh Playing XI): തൻസീദ് ഹസൻ, ലിറ്റൺ ദാസ്, നജ്‌മുള്‍ ഹൊസൈൻ ഷാന്‍റോ (ക്യാപ്റ്റന്), മുഷ്‌ഫിഖുർ റഹീം, മഹ്മൂദുള്ള, തൗഹിദ് ഹൃദോയ്, മെഹിദി ഹസൻ മിറാസ്, നാസും അഹമ്മദ്, തൻസിം ഹസൻ സാക്കിബ്, ടസ്‌കിൻ അഹമ്മദ്, ഷോറിഫുൾ ഇസ്ലാം.
