മുംബൈ: ഇന്ത്യന്‍ ക്രിക്കറ്റ് ആരാധകര്‍ക്കിടയിലെ ഇപ്പോഴത്തെ ചൂടേറിയ ചര്‍ച്ചാവിഷയമാണ് മുന്‍ താരങ്ങളായ ഗൗതം ഗംഭീര്‍, ശ്രീശാന്ത് എന്നിവരുടെ കളികളത്തിനകത്തെയും പുറത്തെയും പോര് (Gautam Gambhir Sreesanth Altercation). ഡിസംബര്‍ ആറിന് ലെജന്‍ഡ്‌സ് ലീഗ് ക്രിക്കറ്റില്‍ (Legends League Cricket) ഇന്ത്യ കാപിറ്റല്‍സും (India Capitals) ഗുജറാത്ത് ജയന്‍റ്‌സും (Gujarat Giants) തമ്മിലേറ്റുമുട്ടിയ എലിമിനേറ്റര്‍ പോരാട്ടത്തിനിടെ ഗംഭീറും ശ്രീശാന്തും തമ്മില്‍ വാക്കേറ്റമുണ്ടായി. മത്സരശേഷം, ഗുജറാത്ത് ജയന്‍റ്‌സ് താരമായ ശ്രീശാന്ത് എന്താണ് സംഭവിച്ചതെന്ന് വ്യക്തത വരുത്താന്‍ തന്‍റെ ഇന്‍സ്റ്റഗ്രാം പേജില്‍ രണ്ട് വീഡിയോകളും പോസ്റ്റ് ചെയ്‌തിരുന്നു (Sreesanth About Gautam Gambhir).
ആദ്യം ശ്രീശാന്ത് പുറത്തുവിട്ട വീഡിയോയില്‍ പറയുന്നത് ഗംഭീര്‍ തന്നെ അനാവശ്യമായി പ്രകോപിപ്പിക്കാന്‍ ശ്രമിച്ചുവെന്നാണ്. കൂടാതെ, മുന്‍ ഇന്ത്യന്‍ താരത്തിനെതിരെ ഗുരുതര ആരോപണങ്ങളും ശ്രീശാന്ത് ഉന്നയിച്ചിരുന്നു. മത്സരം നടന്ന അതേ ദിവസമായിരുന്നു ശ്രീശാന്ത് ആദ്യത്തെ വീഡിയോ പോസ്റ്റ് ചെയ്‌തത്.
അടുത്ത ദിവസമാണ് താരം രണ്ടാമത്തെ വീഡിയോ പുറത്തുവിട്ടത്. ഈ വീഡിയോയില്‍ ഇരുവരും തമ്മിലുണ്ടായ വാക്കേറ്റത്തെ കുറിച്ചുള്ള കൂടുതല്‍ വിവരങ്ങളും ശ്രീശാന്ത് പറയുന്നുണ്ട്. മത്സരത്തിനിടെ ഗംഭീര്‍ തന്നെ 'ഫിക്‌സര്‍' എന്ന് വിളിച്ചിരുന്നുവെന്നും ശ്രീശാന്ത് ആരോപിച്ചിരുന്നു (Gautam Gambhir Sreesanth Fixer Controversy).
എന്നാല്‍, ഇപ്പോള്‍ ഈ സംഭവത്തില്‍ ശ്രീശാന്തിനെതിരെ നടപടിയുമായി രംഗത്തെത്തിയിരിക്കുകയാണ് ലെജന്‍ഡ്‌സ് ലീഗ് ക്രിക്കറ്റ് കമ്മീഷണര്‍. ശ്രീശാന്ത് താരങ്ങളുമായി ബന്ധപ്പെട്ട കരാര്‍ വ്യവസ്ഥ ലംഘിച്ചുവെന്നാണ് ലെജന്‍ഡ്‌സ് ലീഗ് ക്രിക്കറ്റ് കമ്മീഷണറുടെ കണ്ടെത്തല്‍. ഇക്കാര്യം വ്യക്തമാക്കിക്കൊണ്ട് ടൂര്‍ണമെന്‍റ് അധികൃതര്‍ താരത്തിന് വക്കീല്‍ നോട്ടിസ് അയച്ചിട്ടുണ്ട് (LLC Commissioner Legal Notice To Sreesanth).
ഗൗതം ഗംഭീറിനെതിരെ ശ്രീശാന്ത് സമൂഹമാധ്യമങ്ങളില്‍ പങ്കുവെച്ച വീഡിയോ ദൃശ്യങ്ങള്‍ നീക്കം ചെയ്യണമെന്നും നോട്ടിസില്‍ പറയുന്നു. ഇതിന് ശേഷം മാത്രമായിരിക്കും താരവുമായി ബന്ധപ്പെട്ട അധികൃതര്‍ വിഷയത്തില്‍ ചര്‍ച്ച നടത്തുക എന്നും കത്തില്‍ പറയുന്നതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ട്.
അതേസമയം, വിഷയത്തില്‍ മത്സരം നിയന്ത്രിച്ച അമ്പയര്‍മാരും റിപ്പോര്‍ട്ട് സമര്‍പ്പിച്ചിട്ടുണ്ട്. ഇവരുടെ റിപ്പോര്‍ട്ടിലും ഗംഭീര്‍ ശ്രീശാന്തിനെ 'ഫിക്‌സര്‍' എന്ന് വിളിച്ചതിനെ പരാമര്‍ശിക്കുന്നില്ലെന്നാണ് പുറത്തുവരുന്ന വിവരം (Umpires Report On Gautam Gambhir Sreesanth Altercation).
