ലണ്ടന്‍: ഏകദിന ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ച് ഇംഗ്ലണ്ട് ടെസ്റ്റ് ടീം ക്യാപ്‌റ്റൻ ബെന്‍ സ്റ്റോക്സ്. ദക്ഷിണാഫ്രിക്കക്കെതിരായ ഏകദിന പരമ്പരയിലെ ഡർഹാമിൽ നടക്കുന്ന ആദ്യ മത്സരത്തിന് ശേഷം വിരമിക്കുമെന്നാണ് താരം അറിയിച്ചത്. ഇന്ത്യക്കെതിരായ ഏകദിന പരമ്പരയിലെ അവസാന മത്സരത്തിന് ശേഷമാണ് 31-കാരനായ സ്റ്റോക്സിന്റെ വിരമിക്കൽ പ്രഖ്യാപനം.
-
❤️🏴 pic.twitter.com/xTS5oNfN2j
— Ben Stokes (@benstokes38) July 18, 2022 " class="align-text-top noRightClick twitterSection" data="
">❤️🏴 pic.twitter.com/xTS5oNfN2j
— Ben Stokes (@benstokes38) July 18, 2022❤️🏴 pic.twitter.com/xTS5oNfN2j
— Ben Stokes (@benstokes38) July 18, 2022
'ഇംഗ്ലണ്ടിനായി ഞാൻ ചൊവ്വാഴ്‌ച്ച ഡർഹാമിൽ എന്‍റെ അവസാന ഏകദിന മത്സരം കളിക്കും. ഈ ഫോർമാറ്റിൽ നിന്ന് വിരമിക്കാൻ ഞാൻ തീരുമാനിച്ചു. ഇത് അവിശ്വസനീയമാംവിധം കഠിനമായ തീരുമാനമാണ്. ഇംഗ്ലണ്ടിനായി സഹതാരങ്ങൾക്കൊപ്പം കളിക്കുന്ന ഓരോ മിനിറ്റും ഞാൻ ഇഷ്‌ടപ്പെട്ടു' - സ്റ്റോക്സ് പറഞ്ഞു.
അന്താരാഷ്‌ട്ര ക്രിക്കറ്റിൽ മൂന്ന് ഫോർമാറ്റുകൾ കളിക്കുന്നതിന്‍റെ ബുദ്ധിമുട്ടും താൻ വിരമിച്ചാൽ ഒരു യുവതാരത്തിന് ടീമിൽ അവസരം നൽകാനാകുമെന്നതും വിരമിക്കുന്നതിന് കാരണമായി സ്റ്റോക്സ് ചൂണ്ടിക്കാട്ടി. 'ഡർഹാമിൽ എന്‍റെ ഹോം ഗ്രൗണ്ടിൽ അവസാന ഏകദിന മത്സരം കളിക്കുന്നത് അതിശയകരമായി തോന്നുന്നു. എല്ലായ്‌പ്പോഴും ഇംഗ്ലണ്ട് ആരാധകർ എനിക്ക് ഒപ്പം ഉണ്ടായിരുന്നു. നിങ്ങൾ ലോകത്തിലെ ഏറ്റവും മികച്ച ആരാധകരാണ്. ജയത്തോടെ ദക്ഷിണാഫ്രിക്കയ്‌ക്കെതിരായ പരമ്പരയ്‌ക്ക് മികച്ച രീതിയിൽ തുടക്കം കുറിക്കാൻ കഴിയുമെന്ന് ഞാൻ പ്രതീക്ഷിക്കുന്നു' - സ്റ്റോക്സ് കൂട്ടിച്ചേർത്തു.
2011ല്‍ അയര്‍ലന്‍ഡിനെതിരെയായിരുന്നു സ്റ്റോക്സിന്റെ ഏകദിന അരങ്ങേറ്റം. 104 ഏകദിനങ്ങളില്‍ ഇംഗ്ലണ്ടിനായി കളിച്ച സ്റ്റോക്സ് 39.45 ശരാശരിയില്‍ 2919 റണ്‍സ് നേടി. മൂന്ന് സെഞ്ചുറികളും 21 അര്‍ധസെഞ്ചുറികളും ഏകദിനങ്ങളില്‍ സ്റ്റോക്സിന്റെ പേരിലുണ്ട്. ഓള്‍ റൗണ്ടര്‍ കൂടിയായ സ്റ്റോക്സ് ഏകദിനങ്ങളില്‍ 74 വിക്കറ്റും സ്വന്തമാക്കി. 61 റണ്‍സ് വഴങ്ങി അഞ്ച് വിക്കറ്റെടുത്തതാണ് ഏറ്റവും മികച്ച ബോളിങ് പ്രകടനം.
2019ലെ ഏകദിന ലോകകപ്പ് ഫൈനലില്‍ ഇംഗ്ലണ്ടിന് കിരീടം സമ്മാനിക്കുന്നതില്‍ സ്റ്റോക്സ് നിര്‍ണായക പങ്കുവഹിച്ചു. രണ്ടാം റണ്‍ ഓടുന്നതിനിടെ സ്റ്റോക്സിന്റെ ബാറ്റില്‍ തട്ടി ബൗണ്ടറി കടന്ന പന്തിലാണ് ഫൈനലില്‍ ന്യൂസിലന്‍ഡിനെതിരെ ഇംഗ്ലണ്ട് മത്സരം ടൈ ആക്കിയത്. പിന്നീട് സൂപ്പര്‍ ഓവറിലും മത്സരം ടൈ ആയപ്പോള്‍ കൂടുതല്‍ ബൗണ്ടറികള്‍ നേടിയ ടീമെന്ന നിലയില്‍ ഇംഗ്ലണ്ട് ആദ്യമായി ലോക ചാമ്പ്യന്‍മാരാവുകയായിരുന്നു.
അടുത്തിടെ ജോ റൂട്ടിന് പകരം ഇംഗ്ലണ്ടിന്‍റെ ടെസ്റ്റ് ടീം നായകനായി സ്റ്റോക്‌സിനെ തെരഞ്ഞെടുക്കപ്പെട്ടിരുന്നു. ന്യൂസിലന്‍ഡിനെതിരായ പരമ്പരയില്‍ ക്യാപ്‌റ്റനായി അരങ്ങേറിയ സ്റ്റോക്സ് മൂന്ന് മത്സര പരമ്പര 3-0ന് തൂത്തുവാരി. പിന്നീട് ഇന്ത്യക്കെതിരെ നടന്ന എഡ്‌ജ്‌ബാസ്റ്റൺ ടെസ്റ്റിലെ ജയത്തോടെ പരമ്പര സമനിലയിലാക്കി.
