ന്യൂഡല്‍ഹി : ഏകദിന ലോകകപ്പില്‍ ഇംഗ്ലണ്ടിനെതിരായ മിന്നും ജയത്തോടെ ലോകമെമ്പാടുമുള്ള ക്രിക്കറ്റ് ആരാധകരെ ഒന്നടങ്കം ഞെട്ടിച്ചിരിക്കുകയാണ് അഫ്‌ഗാനിസ്ഥാന്‍. ഇന്നലെ (ഒക്ടോബര്‍ 15) ഡല്‍ഹിയില്‍ നടന്ന മത്സരത്തില്‍ 69 റണ്‍സിന്‍റെ ജയമാണ് അഫ്‌ഗാനിസ്ഥാന്‍ നിലവിലെ ചാമ്പ്യന്മാരായ ഇംഗ്ലണ്ടിനെതിരെ സ്വന്തമാക്കിയത്. ലോകകപ്പ് ചരിത്രത്തില്‍ അവരുടെ രണ്ടാമത്തെ മാത്രം ജയമാണിത്.
ഈയൊരു തോല്‍വി ഇംഗ്ലണ്ടിന് അത്ര പുതുമയുള്ളതല്ല. മുന്‍പ് പല പ്രാവശ്യവും ക്രിക്കറ്റിലെ കുഞ്ഞന്മാരായ ടീമുകള്‍ ലോകകപ്പില്‍ ഇംഗ്ലണ്ട് ക്രിക്കറ്റ് ടീമിനെ തകര്‍ത്തിട്ടുണ്ട്. സിംബാബ്‌വെ, അയര്‍ലന്‍ഡ്, ബംഗ്ലാദേശ്. ആ പട്ടികയിലേക്കാണ് ഇപ്പോള്‍ അഫ്‌ഗാനിസ്ഥാനും പേര് ചേര്‍ത്തിരിക്കുന്നത്.
സിംബാബ്‌വെയോട് തോറ്റ ഇംഗ്ലണ്ട് : ലോകകപ്പ് ചരിത്രത്തില്‍ ഇംഗ്ലണ്ട് ആദ്യമായിട്ടൊരു ഞെട്ടിക്കുന്ന തോല്‍വി ഏറ്റുവാങ്ങിയത് 1992ല്‍ സിംബാബ്‌വെയ്‌ക്കെതിരെ ആയിരുന്നു. ഓസ്‌ട്രേലിയയിലെ ആല്‍ബറിയില്‍ നടന്ന മത്സരത്തില്‍ ടോസ് നേടി സിംബാബ്‌വെയെ ബാറ്റിങ്ങിന് വിട്ട ഇംഗ്ലണ്ടിന് അവരെ 134 റണ്‍സില്‍ എറിഞ്ഞൊതുക്കാന്‍ സാധിച്ചിരുന്നു. റിച്ചാര്‍ഡ് ഇല്ലിങ്‌വര്‍ത്തിന്‍റെയും ഇയാന്‍ ബോത്തമിന്‍റെയും തകര്‍പ്പന്‍ ബൗളിങ് പ്രകടനമായിരുന്നു ഇംഗ്ലീഷ് ആക്രമണങ്ങള്‍ക്ക് മത്സരത്തില്‍ കരുത്തായത്.
മറുപടി ബാറ്റിങ്ങില്‍ ബാറ്റിങ് തകര്‍ച്ച നേരിട്ട ഇംഗ്ലണ്ട് വിജയലക്ഷ്യത്തിന് 9 റണ്‍സ് അകലെ വീണു. 49.1 ഓവറില്‍ 125 റണ്‍സ് മാത്രമായിരുന്നു അന്ന് ഇംഗ്ലണ്ടിന് നേടാനായത്. പത്തോവറില്‍ 21 റണ്‍സ് വഴങ്ങി നാല് വിക്കറ്റ് വീഴ്‌ത്തിയ എഡോ ബ്രാൻഡസിന്‍റെ പ്രകടനമായിരുന്നു സിംബാബ്‌വെയ്‌ക്ക് സ്വപ്നതുല്യമായൊരു ജയമൊരുക്കി നല്‍കിയത്.
ഇംഗ്ലീഷ് പടയെ ഞെട്ടിച്ച കെവിന്‍ ഒബ്രിയന്‍ : ലോകകപ്പ് ക്രിക്കറ്റ് ചരിത്രത്തിലെ ഏറ്റവും വലിയ അട്ടിമറികളില്‍ ഒന്നിനായിരുന്നു 2011ല്‍ ബെംഗളൂരുവിലെ ചിന്നസ്വാമി സ്റ്റേഡിയം വേദിയായത്. അയല്‍ക്കാരായ അയര്‍ലന്‍ഡിനെതിരായ മത്സരത്തില്‍ ആദ്യം ബാറ്റ് ചെയ്‌ത ഇംഗ്ലണ്ട് എട്ട് വിക്കറ്റ് നഷ്‌ടത്തില്‍ 327 റണ്‍സാണ് അടിച്ചെടുത്തത്. കെവിന്‍ പീറ്റേഴ്‌സണ്‍, ഇയാന്‍ ബെല്‍, ജൊനാഥന്‍ ട്രോട്ട് എന്നിവരുടെ അര്‍ധസെഞ്ച്വറികളായിരുന്നു ഇംഗ്ലണ്ടിന് കൂറ്റന്‍ സ്കോര്‍ സമ്മാനിച്ചത്.
മികച്ച രീതിയില്‍ രണ്ടാം ഇന്നിങ്‌സ് തുടങ്ങിയെങ്കിലും പിന്നീട് ഐറിഷ് ബാറ്റര്‍ കെവിന്‍ ഒബ്രിയന്‍റെ ബാറ്റിങ്ങിന് മുന്നില്‍ ഇംഗ്ലീഷ് പട പതറിപ്പോവുകയായിരുന്നു. അന്ന്, ലോകകപ്പിലെ അതിവേഗ സെഞ്ച്വറി തന്‍റെ പേരിലാക്കിക്കൊണ്ടായിരുന്നു കെവിന്‍ ഒബ്രിയന്‍ അയര്‍ലന്‍ഡിന് ജയം സമ്മാനിച്ചത്. കെവിന്‍ ഒബ്രിയന്‍ 63 പന്തില്‍ 113 റണ്‍സ് അടിച്ച മത്സരത്തില്‍ മൂന്ന് വിക്കറ്റിനായിരുന്നു ഐറിഷ് പടയുടെ വിജയം.
2011ലെ ബംഗ്ലാപ്രഹരം : 2011ലെ ഏകദിന ലോകകപ്പില്‍ അയര്‍ലന്‍ഡിന് പിന്നാലെ ബംഗ്ലാദേശും ഇംഗ്ലണ്ടിനെ ഞെട്ടിച്ചിരുന്നു. ചിറ്റഗോങ്ങില്‍ നടന്ന മത്സരത്തില്‍ ബംഗ്ലാദേശ് 225 റണ്‍സിനാണ് ആദ്യം ബാറ്റ് ചെയ്‌ത ഇംഗ്ലീഷ് പടയെ എറിഞ്ഞൊതുക്കിയത്. ജൊനാഥന്‍ ട്രോട്ട്, ഒയിന്‍ മോര്‍ഗന്‍ എന്നിവരുടെ അര്‍ധസെഞ്ച്വറികളായിരുന്നു വമ്പന്‍ നാണക്കേടില്‍ നിന്നും അന്ന് ഇംഗ്ലീഷ് പടയെ രക്ഷിച്ചത്.
മറുപടി ബാറ്റിങ്ങില്‍ ഇമ്രുല്‍ കയ്‌സ് ബംഗ്ലാദേശിനായി അര്‍ധസെഞ്ച്വറി നേടി. ഷാക്കിബ് അല്‍ ഹസനും തമീം ഇക്ബാലും ബാറ്റ് കൊണ്ട് നിര്‍ണായക പ്രകടനം നടത്തിയ മത്സരത്തില്‍ രണ്ട് വിക്കറ്റിനായിരുന്നു ബംഗ്ലാദേശിന്‍റെ ജയം.
ബംഗ്ലാ കടുവകള്‍ക്ക് മുന്നില്‍ വീണ്ടും തകര്‍ന്ന ഇംഗ്ലണ്ട് : 2015ല്‍ ബംഗ്ലാദേശ് വീണ്ടും ഇംഗ്ലണ്ടിനെ മുട്ടുകുത്തിച്ചു. അഡ്‌ലെയ്‌ഡില്‍ നടന്ന മത്സരത്തില്‍ 15 റണ്‍സിനായിരുന്നു അന്ന് ബംഗ്ലാദേശിന്‍റെ ജയം. ആ മത്സരത്തില്‍ ആദ്യം ബാറ്റ് ചെയ്‌ത ബംഗ്ലാദേശ് മഹ്മദുള്ളയുടെ സെഞ്ച്വറിയുടെയും മുഷ്‌ഫിഖര്‍ റഹീം നേടിയ അര്‍ധസെഞ്ച്വറിയുടെയും കരുത്തില്‍ 275 റണ്‍സാണ് അടിച്ചെടുത്തത്.
മറുപടി ബാറ്റിങ്ങില്‍ ഭേദപ്പെട്ട തുടക്കം ലഭിച്ചെങ്കിലും ബംഗ്ലാ പേസര്‍ റൂബെല്‍ ഹൊസൈന്‍റെ മികവിന് മുന്നില്‍ ഇംഗ്ലീഷ് നിര തകര്‍ന്നടിയുകയായിരുന്നു. നാല് വിക്കറ്റുകളാണ് റൂബെല്‍ അന്ന് എറിഞ്ഞിട്ടത്.
