ദുബായ്‌: ഇന്ത്യന്‍ ക്യാപ്റ്റന്‍ രോഹിത് ശര്‍മയുടെ ഫോമില്‍ ആശങ്ക പ്രകടിപ്പിച്ച് മുന്‍ താരവും കമന്‍റേറ്ററുമായ ആകാശ് ചോപ്ര. ഗ്രൂപ്പ് ഘട്ടത്തില്‍ പാകിസ്ഥാനെതിരായ മത്സരത്തിലെ ആദ്യ 15 പന്തുകളില്‍ നിന്നും വെറും അഞ്ച് റണ്‍സ് മാത്രമാണ് രോഹിത്തിന് കണ്ടെത്താന്‍ കഴിഞ്ഞത്. ഒരു അറ്റാക്കിങ് ബാറ്ററെ സംബന്ധിച്ച് ഇത് ആശങ്കയ്‌ക്ക് വകനല്‍കുന്നതാണെന്നും ചോപ്ര ഒരു ചാനല്‍ പരിപാടിയില്‍ പറഞ്ഞു.
"നല്ലതും ചീത്തയുമായ ഫോമിന് ഇടയിൽ വളരെ നേർത്ത രേഖയുള്ളതിനാലാണ് ഞാന്‍ ആശങ്കപ്പെടുന്നത്. നിങ്ങളുടെ ആത്മവിശ്വാസം കുറയുകയാണെങ്കില്‍, പെട്ടെന്ന് തന്നെ കഥ വ്യത്യസ്തമായി കാണപ്പെടും.
പാകിസ്ഥാൻ മത്സരത്തെക്കുറിച്ച് പറയുകയാണെങ്കിൽ, 15 പന്തിൽ അദ്ദേഹം അഞ്ച് റൺസ് നേടി. അദ്ദേഹത്തിന്‍റെ ബാറ്റ് പന്തിൽ നന്നായി തട്ടിയിട്ടില്ല എന്ന വസ്തുത മറച്ചുവയ്‌ക്കുന്നില്ല" ആകാശ് ചോപ്ര പറഞ്ഞു.
ഈ വര്‍ഷം ഒരു അര്‍ധ സെഞ്ചുറി മാത്രമാണ് രോഹിത്തിന് നേടാന്‍ കഴിഞ്ഞതെന്നും ചോപ്ര പറഞ്ഞു. നാഴികക്കല്ലുകൾ നേടുന്നതുമായി ബന്ധപ്പെട്ടല്ല അര്‍ധ സെഞ്ചുറിയെക്കുറിച്ച് സംസാരിക്കുന്നത്. ഒരു ഓപ്പണറെന്ന നിലയില്‍ ടീമിന്‍റെ പ്രകടനത്തില്‍ ഇംപാക്റ്റ് സൃഷ്ടിക്കാൻ കഴിയുമെന്നും ചോപ്ര കൂട്ടിച്ചേര്‍ത്തു.
പാകിസ്ഥാനെതിരായ മത്സരത്തില്‍ 18 പന്തില്‍ 12 റണ്‍സാണ് രോഹിത്തിന് നേടാന്‍ കഴിഞ്ഞത്. തുടര്‍ന്ന് ഹോങ്കോങ്ങിനെതിരെയും വലിയ ഇന്നിങ്‌സ് കളിക്കുന്നതില്‍ രോഹിത് പരാജയപ്പെട്ടിരുന്നു. 13 പന്തില്‍ 21റണ്‍സാണ് രോഹിത് ഹോങ്കോങ്ങിനെതിരെ നേടിയത്.
