WCC on actress attack case: ആക്രമിക്കപ്പെട്ട നടിക്ക്‌ സിനിമ മേഖലയില്‍ നിന്നും ആവശ്യമായ സമയത്ത് പിന്തുണ ലഭിച്ചിരുന്നില്ലെന്ന്‌ വുമണ്‍ ഇന്‍ സിനിമാ കളക്‌ടീവ്‌. ആക്രമിക്കപ്പെട്ട നടിയുടെ അതിജീവനത്തെയും അഭിമാന പോരാട്ടത്തെയും അഭിനന്ദിച്ചാണ് ഡബ്യുസിസി രംഗത്തെത്തിയത്.
Attacked actress post: ഫേസ്‌ബുക്കിലൂടെയാണ് വിമണ്‍ ഇന്‍ സിനിമ കളക്‌ടീവിന്‍റെ പ്രതികരണം. നടിക്ക്‌ വേണ്ട പിന്തുണ നല്‍കാന്‍ പൊതുസമഹൂത്തിനും സിനിമ പ്രവര്‍ത്തകര്‍ക്കും കഴിഞ്ഞോ എന്നതടക്കമുള്ള നിരവധി ചോദ്യങ്ങളും ഡബ്യുസിസി ഉന്നയിക്കുന്നുണ്ട്‌. ഇരയാക്കപ്പെടലില്‍ നിന്നും അതിജീവനത്തിലേയ്‌ക്കുള്ള തന്‍റെ യാത്രയെ കുറിച്ച് നടി ഇന്‍സ്‌റ്റഗ്രാമിലൂടെ കഴിഞ്ഞ ദിവസം പോസ്‌റ്റ്‌ പങ്കുവച്ചിരുന്നു. നിമിഷ നേരം കൊണ്ട്‌ നടിയുടെ കുറിപ്പ് വിവിധ സോഷ്യല്‍ മീഡിയ പ്ലാറ്റ്‌ഫോമുകളില്‍ വൈറലായിരുന്നു.
Actors support attacked actress: ഇതിന് പിന്നാലെ നടിയെ പിന്തുണച്ച്‌ സിനിമാ മേഖലയിലുള്ളവര്‍ ഒന്നടങ്കം രംഗത്തെത്തിയിരുന്നു. ആക്രമിക്കപ്പെട്ട നടി പങ്കുവച്ച പോസ്‌റ്റുമായി മമ്മൂട്ടി, മോഹന്‍ലാല്‍, പൃഥ്വിരാജ്‌, ദുല്‍ഖര്‍ സല്‍മാന്‍, മഞ്ജു വാര്യര്‍ തുടങ്ങീ മലയാള സിനിമ മേഖലയിലെ നിരവധി പ്രമുഖര്‍ മുന്നോട്ടുവന്നു. ഈ സാഹചര്യത്തിലാണ് ഡബ്യുസിസിയുടെ പ്രതികരണം.
- " class="align-text-top noRightClick twitterSection" data="">
WCC facebook post on actress attack case: 'നമുക്ക് ചുറ്റുമുള്ളവർ ഭയത്താൽ തലതാഴ്ത്തി നിൽക്കുമ്പോഴും, നമുക്ക് തല ഉയർത്തി പിടിച്ച് തന്നെ നിൽക്കാൻ സാധിക്കുന്നത്, തികച്ചും നമ്മുടെ ആത്മാഭിമാനത്തെയാണ് സൂചിപ്പിക്കുന്നത്. അസാധാരണവും, അത്യധികവുമായ മാനസിക സംഘർഷങ്ങളിലൂടെ കടന്നുപോയ ഈ അഞ്ചുവർഷ കാലഘട്ടത്തിലും നമ്മുടെ സഹോദരി, അതിജീവിച്ചവൾ, കാണിച്ച ആത്മവിശ്വാസവും ധൈര്യവും തികച്ചും അഭിനന്ദനീയവും മാതൃകാപരവുമാണ്. മലയാള സിനിമയിൽ നിന്നും, അന്യഭാഷാ സിനിമാ രംഗത്തു നിന്നും, മറ്റ് മേഖലകളിൽ നിന്നും ഇന്നലെ നമ്മുടെ സഹോദരിയുടെ വാക്കുകൾക്ക് ലഭിച്ച വിപുലമായ പിന്തുണ സ്‌തുത്യർഹമാണ്. എങ്കിലും അതിജീവനത്തിന്‍റെ പാതയിൽ, വേണ്ടിയിരുന്ന സമയത്ത്, വേണ്ടിയിരുന്ന രീതിയിൽ പിന്തുണ ലഭിച്ചിരുന്നില്ല എന്നതിലുള്ള നിരാശയും പറയാതെ വയ്യ.
ഇപ്പോൾ നൽകുന്നു എന്നു പറയുന്ന ഈ പിന്തുണയും ബഹുമാനവും ഏതു രീതിയിലാണ് വ്യാഖ്യാനിക്കപ്പെടേണ്ടത്, എന്നു ചോദിക്കാൻ ഞങ്ങൾ ഈയവസരത്തിൽ നിർബന്ധിതരാവുകയാണ്. സമൂഹ മാധ്യമങ്ങളിൽ പോസ്‌റ്റ്‌ ഷെയർ ചെയ്യുകയല്ലാതെ, തങ്ങളുടെ തൊഴിലിടങ്ങളിൽ POSH മാർഗ്ഗനിർദ്ദേശങ്ങൾ പ്രായോഗികമാക്കാൻ, മലയാള സിനിമ നിർമ്മാതാക്കൾ തയ്യാറാകുന്നുണ്ടോ! സംഘടനകളും, കൂട്ടായ്‌മകളും തൊഴിലിടങ്ങളിൽ സ്‌ത്രീകൾക്ക് തുല്യമായ അവസരങ്ങൾ ലഭിക്കുന്നതിനും, സമത്വം ഉറപ്പുവരുത്തുന്നതിനും എന്തെങ്കിലും ചെയ്യുന്നുണ്ടോ!
നമ്മുടെ പുരുഷ സഹപ്രവർത്തകർ, നിലവിൽ അവർക്കുള്ള നിർണായകമായ സ്വാധീനവും അധികാരവും ഉപയോഗിച്ചുകൊണ്ട്, സ്‌ത്രീകൾക്ക് ന്യായവും ആരോഗ്യകരവും സുരക്ഷിതവുമായ പ്രവർത്തനാന്തരീക്ഷം ഉണ്ടെന്നും, അവർ പാർശ്വവൽക്കരിക്കപ്പെടുന്നില്ല എന്നും ഉറപ്പുവരുത്തുന്നതിനായി, സ്ഥിരവും ശാശ്വതവുമായ സഖ്യം ചേരലുകൾക്ക് തയ്യാറാകുന്നുണ്ടോ! ഇതാണ് ഞങ്ങൾക്ക് വേണ്ട പിന്തുണ. ഇത്തരത്തിലുള്ള പരിഗണനയാണ് ഞങ്ങൾ അർഹിക്കുന്നത്. ഈ കാലയളവിൽ, അതിജീവിച്ചവൾക്കൊപ്പവും, WCCക്കൊപ്പവും നിന്നുകൊണ്ട്, ആത്മാർത്ഥമായി നിസ്വാർത്ഥമായി പ്രവർത്തിച്ച ഓരോരുത്തരോടുമുള്ള സ്നേഹവും കൃതജ്ഞതയും വളരെ വലുതാണ്. മലയാള സിനിമാ രംഗത്ത് പുരോഗമനപരവും വ്യവസ്ഥാനുസൃതവുമായ മാറ്റങ്ങൾ കൊണ്ടുവരുന്നതിനായുള്ള ഞങ്ങളുടെ പ്രയത്നത്തിൽ നിന്നും ഒരുതരത്തിലും പിന്നോട്ടു പോകാൻ ഞങ്ങൾ ഉദ്ദേശിച്ചിട്ടില്ല. ഈ ഒരു യാത്രയിൽ ഉള്ള നിങ്ങളുടെ ഓരോരുത്തരുടെയും പിന്തുണ വളരെ വിലപ്പെട്ടതാണ്.
പക്ഷപാതപരമല്ലാത്ത, ന്യായമായ സമത്വത്തിലൂന്നി നിൽക്കുന്ന, സുരക്ഷിതമായ ഒരു പ്രവർത്തനാന്തരീക്ഷത്തിനായുള്ള, ഞങ്ങളുടെ ഈ പോരാട്ടത്തിൽ, ഇനിയും ഒരുപാട് പേർക്ക് പങ്കുചേരാൻ സാധിക്കട്ടെ എന്ന് ആത്മാർത്ഥമായി ആഗ്രഹിക്കുന്നു, പ്രതീക്ഷിക്കുന്നു.' -ഇപ്രകാരമായിരുന്നു വിമണ്‍ ഇന്‍ സിനിമാ കളക്‌ടീവിന്‍റെ ഫേസ്‌ബുക്ക്‌ പോസ്‌റ്റ്‌.
Also Read: ഉറിയുടെ ഓര്‍മ പുതുക്കി വിക്കിയും യാമിയും
