ബാംഗ്ലൂര്‍: അന്തരിച്ച പ്രമുഖ കന്നഡ താരം പുനീത് രാജ്‌കുമാറിന്‍റെ പാത പിന്തുടര്‍ന്ന് ആരാധകര്‍. നൂറോളം ആരാധകരാണ് തങ്ങളുടെ പ്രിയ നടന്‍റെ പാത പിന്തുടര്‍ന്ന് കണ്ണുകള്‍ ദാനം ചെയാനൊരുങ്ങി രംഗത്തെത്തിയിരിക്കുന്നത്. സിറ്റിയിലെ നാരായണ നേത്രാലയ കണ്ണാശുപത്രി ഇപ്പോള്‍ പുനീത് ആരാധകരെ കൊണ്ട് നിറഞ്ഞിരിക്കുകയാണ്.
ഇതിനോടകം തന്നെ നൂറോളം ആരാധകരാണ് കണ്ണുകള്‍ ദാനം ചെയ്യുന്നതിനായി പേരുകള്‍ രജിസ്‌റ്റര്‍ ചെയ്‌തിരിക്കുന്നത്. പുനീതിന്‍റെ സ്‌മൃതിമണ്ഡപം സന്ദര്‍ശിച്ച ശേഷം കണ്ണുകള്‍ ദാനം ചെയ്യുന്നതിനായി നിരവധി പേര്‍ നേരെ തന്നെ നാരായണ നേത്രാലയ ആശുപത്രിയില്‍ എത്തുകയായിരുന്നുവെന്ന് ഡോ.ബുജംഗ ഷെട്ടി പറഞ്ഞു.
നേരത്തെ മൂന്നോ നാലോ പേരായിരുന്നുവെങ്കില്‍ ഇപ്പോള്‍ നേത്ര ദാനം ചെയ്യുന്നവരുടെ എണ്ണം ഉയര്‍ന്നിരിക്കുകയാണ്. നിലവില്‍ 200 ലധികം പേരാണ് നേത്രദാനം ചെയ്യുന്നതിനായി മുന്നിട്ടു വന്നിരിക്കുന്നത്. കണ്ണുകള്‍ ദാനം ചെയ്യാനുള്ള പുനീതിന്‍റെ തീരുമാനത്തിന് പിന്നാലെ 30 പേര്‍ക്കാണ് നേത്ര ശസ്‌ത്രക്രിയ നടത്തിയത്.
കൂടാതെ അടുത്തിടെ മരണപ്പെടുന്നവരുടെ ബന്ധക്കളും ഞങ്ങളെ ബന്ധപ്പെടുകയാണെന്ന് ആശുപത്രി അധികൃതർ പറയുന്നു. പുനീത് രാജ്‌കുമാറിന്‍റെ പിതാവ് ഡോ.രാജ്‌കുമാറിന്‍റെ മരണസമയത്തും സമാനാനുഭവമായിരുന്നു. അദ്ദേഹവും മരണാനന്തരം അദ്ദേഹത്തിന്‍റെ കണ്ണുകള്‍ ദാനം ചെയ്‌തിരുന്നു.
ഇതിന് പിന്നാലെ ആരാധകരും രംഗത്തെത്തിയിരുന്നു. ഇത് തന്നെയാണ് പുനീതിന്‍റെ മരണാനന്തരവും നടന്നിരിക്കുന്നത്.
Also Read: ' വാപ്പച്ചിയുടെ ഫോണ്‍ അടിച്ചുമാറ്റി പോസ്‌റ്റ് ഇട്ടത് ഞാന്‍ തന്നെ'; വെളിപ്പെടുത്തലുമായി ദുല്‍ഖര്‍
