തമിഴകത്തിനും ബോളിവുഡിനും സുപരിചിതനായ ധനുഷ്, ദി ഗ്രേ മാൻ ചിത്രത്തിലൂടെ ഹോളിവുഡിൽ രണ്ടാമതും സാന്നിധ്യമറിയിച്ചു കഴിഞ്ഞു. അക്ഷയ് കുമാറിനും സാറാ അലി ഖാനുമൊപ്പമുള്ള അത്‌രംഗി രേ എന്ന ബോളിവുഡ് ചിത്രത്തിനായും ആകാംക്ഷയോടെ കാത്തിരിക്കുകയാണ് ധനുഷ് ആരാധകർ.
കൂടാതെ തമിഴ്, തെലുങ്ക്, ഹിന്ദി ഭാഷകളിൽ ധനുഷിന്‍റെ മറ്റൊരു ചിത്രം ഒരുങ്ങുന്നതായി അടുത്തിടെ പ്രഖ്യാപനം ഉണ്ടായിരുന്നു. ദേശീയ പുരസ്‌കാര ജേതാവായ തെന്നിന്ത്യൻ ചലച്ചിത്ര സംവിധായകൻ ശേഖര്‍ കമുലയാണ് ചിത്രം സംവിധാനം ചെയ്യുന്നത്.
സിനിമയുടെ ടൈറ്റിൽ വെളിപ്പെടുത്തിയിട്ടില്ലെങ്കിലും രണ്ട് ദേശീയ പുരസ്‌കാര ജേതാക്കള്‍ ഒന്നിക്കുന്ന ചിത്രത്തിന്‍റെ പുതിയ വിശേഷങ്ങൾക്കായി കാത്തിരിക്കുകയാണ് സിനിമാപ്രേമികളും. ശേഖര്‍ കമുല ഒരു മുൻനിര താരത്തെ ആദ്യമായി തന്‍റെ ചിത്രത്തിലെ നായകനാക്കുമ്പോൾ, നായിക ആരായിരിക്കുമെന്നും ആരാധകർ ആകാംക്ഷയിലാണ്.
ധനുഷിന്‍റെ നായിക പൂജ ഹെഗ്‌ഡെ
ബോളിവുഡിനും തെന്നിന്ത്യക്കും സുപരിചിതയായ താരസുന്ദരി പൂജ ഹെഗ്ഡെയാണ് ധനുഷിന്‍റെ നായികയായി എത്തുന്നതെന്നാണ് ഏറ്റവും പുതിയ റിപ്പോർട്ടുകൾ. എന്നാൽ, അണിയറപ്രവർത്തകർ ഇത് സംബന്ധിച്ച് ഔദ്യോഗിക സ്ഥിരീകരണം നൽകിയിട്ടില്ല.
More Read: ശേഖര്‍ കമുലയും ധനുഷും ഒന്നിക്കുന്നു, വരുന്നത് ത്രിഭാഷ ചിത്രം
അതേ സമയം, ധനുഷ് തന്‍റെ 43-ാം ചിത്രത്തിന്‍റെ ഷൂട്ടിങ് തിരക്കുകളുമായി ഹൈദരാബാദിലാണുള്ളത്. സിനിമ പൂർത്തിയാക്കിയ ശേഷം സെൽവരാഘവന്‍റെ നാനേ വരുവേൻ ചിത്രമാണ് നിർമാണത്തിനൊരുങ്ങുന്ന ധനുഷിന്‍റെ അടുത്ത ചിത്രം. വിജയ്‌യുടെ ബീസ്റ്റ് ചിത്രത്തിലെ നായികവേഷത്തിലൂടെ തമിഴിലേക്ക് അരങ്ങേറ്റം കുറിക്കാനൊരുങ്ങുകയാണ് പൂജ ഹെഗ്‌ഡെ.
