തിരുവനന്തപുരം: ഏറെ പ്രതീക്ഷകളോടെയാണ് 38 -ാമത് ദേശീയ ഗെയിംസിന് കേരളം കളത്തിലിറങ്ങുന്നത്. വിവിധയിനങ്ങളിൽ മികച്ച താരങ്ങളെയാണ് കേരളം അണിനിരത്തുന്നത്. കേരളത്തിന് വേണ്ടി മെഡല്‍ നേടാന്‍ ഉത്തരാഖണ്ഡിലിറങ്ങുന്ന ചിലരെ പരിചയപ്പെടാം.
അത്ലറ്റിക്‌സ്
ഓട്ടം, ചാട്ടം അടക്കമുള്ള മത്സരങ്ങളുള്ള അത്‌ലറ്റിക്‌സില്‍ കേരളത്തിന് ഏറെ പ്രതീക്ഷകളുണ്ട്. മീറ്റ് റെക്കോര്‍ഡുകളടക്കം സ്വന്തമാക്കി കേരളത്തിന്‍റെ ചുണക്കുട്ടികള്‍ തിരികെ എത്തുമെന്നാണ് പ്രതീക്ഷ. അത്ലറ്റിക്‌സിൽ വനിതകളുടെ ട്രിപ്പിൾ ജംപ് കേരളം ഉറച്ച പ്രതീക്ഷ വെച്ചു പുലര്‍ത്തുന്ന ഇനമാണ്. കഴിഞ്ഞ തവണത്തെ ചാമ്പ്യന്‍ എൻ വി ഷീന, സാന്ദ്ര ബാബു, ഗായത്രി ശിവകുമാര്‍ എന്നിവര്‍ ഉറച്ച മെഡല്‍ പ്രതീക്ഷയാണ്. കാലങ്ങളായി കേരള താരങ്ങള്‍ ആധിപത്യം പുലര്‍ത്തുന്ന ലോങ്ങ് ജമ്പിലും കേരളത്തിന് പ്രതീക്ഷയുണ്ട്. പുരുഷ വിഭാഗത്തില്‍ അനുരാഗ് സിവിയും വനിതാ വിഭാഗത്തില്‍ സാന്ദ്രാ ബാബുവുമാണ് മല്‍സരിക്കുന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ഒളിമ്പ്യന്‍ അബ്‌ദുള്ള അബൂബക്കർ ഉത്തരാഖണ്ഡില്‍ കേരളത്തിനു വേണ്ടി ഇറങ്ങില്ലെങ്കിലും പുരുഷ ട്രിപ്പിൾ ജംപിൽ സെബാസ്‌റ്റ്യന്‍ വി എസും മുഹമ്മദ് മുഹസിനുമാണ് പിറ്റിലിറങ്ങുന്നത്. വനിതകളുടെ 400 മീറ്ററില്‍ ജിസ്ന മാത്യുവും സ്നേഹ കെയും 400 മീറ്റര്‍ ഹര്‍ഡില്‍സില്‍ അനു രാഘവനും ഡെല്‍നാ ഫിലിപ്പും 800 മീറ്ററില്‍ പ്രിസില്ല ഡാനിയേലും ഹൈജംപില്‍ ആതിരാ സോമരാജനും പോള്‍വാള്‍ട്ടില്‍ മറിയാ ജെയ്‌സനും നാഷണല്‍ ഓപ്പണ്‍ മീറ്റിലെ വെള്ളിമെഡല്‍ ജേതാവ് കൃഷ്‌ണ രചനും വനിതാ വിഭാഗത്തില്‍ പ്രതീക്ഷ പകരുന്നവരാണ്.
നീന്തല്‍
ദേശീയ ഗെയിംസില്‍ മിന്നിക്കണമെങ്കില്‍ നീന്തല്‍ക്കുളത്തില്‍ നിന്ന് പൊന്നു വാരണം. ആ ദൗത്യവുമായാണ് പരിചയ സമ്പന്നനായ ഒളിമ്പ്യന്‍ സജ്ജന്‍ പ്രകാശിന്‍റെ നേതൃത്വത്തില്‍ കേരളത്തിന്‍റെ 44 അംഗ നീന്തല്‍ ടീം ഹല്‍ദ്വാനിയിലെത്തുന്നത്. ഹൽദ്വാനിയിലെ നീന്തൽക്കുളത്തില്‍ ജനുവരി 29 മുതല്‍ ഫെബ്രുവരി നാലു വരെയാണ് നീന്തല്‍ മല്‍സരങ്ങള്‍.
ഉത്തരാഖണ്ഡിലെ കൊടും ശൈത്യത്തോട് പടവെട്ടി മുന്നേറിയാല്‍ നീന്തല്‍ക്കുളത്തിലെ കേരളത്തിന്‍റെ സുവര്‍ണ്ണ കുമാരന്മാര്‍ക്ക് എതിരിടാനുള്ളത് അയല്‍പക്കത്തെ കര്‍ണാടകത്തില്‍ നിന്നും മഹാരാഷ്‌ട്രയില്‍ നിന്നുമെത്തുന്ന നീന്തല്‍ക്കാരെയാണ്. ഒപ്പം കരുത്തരായ സര്‍വീസസുകാരും.
ബെല്ലാരിയിലുള്ള ഇൻസ്‌പയർ ഇൻസ്‌റ്റിറ്റ്യൂട്ട്‌ ഓഫ്‌ സ്‌പോർട്‌സില്‍ പരിശീലനമൊക്കെ കഴിഞ്ഞാണ് സജ്ജന്‍ പ്രകാശ് തന്‍റെ നാലാമത് ദേശീയ ഗെയിംസിന് എത്തുന്നത്. രണ്ട് തവണ ദേശീയ ഗെയിംസിലെ മികച്ച പുരുഷതാരമായി തെരഞ്ഞെടുക്കപ്പെട്ട അപൂര്‍വ ബഹുമതിയും സജ്ജന്‍ പ്രകാശിന് സ്വന്തം.
സജ്ജന്‍ പ്രകാശ് ഉത്തരാഖണ്ഡില്‍ 13 നീന്തല്‍ ഇനങ്ങളില്‍ മല്‍സരിക്കുന്നുണ്ട്. 400 മീറ്റര്‍ ഫ്രീസ്‌റ്റൈല്‍, 400 മീറ്റര്‍ വ്യക്തിഗത മെഡ്‌ലേ, 200 മീറ്റര്‍ വ്യക്തിഗത മെഡ്‌ലേ, 200 മീറ്റര്‍ ഫ്രീസ്‌റ്റൈല്‍, 200 മീറ്റര്‍ ബട്ടര്‍ ഫ്ലൈ, 100 മീറ്റര്‍ ബട്ടര്‍ ഫ്ലൈ, 50 മീറ്റര്‍ ബട്ടര്‍ ഫ്ലൈ, 100 മീറ്റര്‍ ബാക്ക് സ്ട്രോക്ക് എന്നീ ഇനങ്ങള്‍ക്ക് പുറമേ 4x100 മീറ്റര്‍ മിക്‌സഡ് മെഡ്‌ലേ റിലേയിലും, 4x100 മീറ്റര്‍ ഫ്രീസ്‌റ്റൈല്‍ മിക്‌സഡ് റിലേയിലും, 4x200 മീറ്റര്‍ പുരുഷ വിഭാഗം ഫ്രീസ്‌റ്റൈല്‍ റിലേയിലും, പുരുഷ വിഭാഗം 4x100 മീറ്റര്‍ മെഡ്‌ലേ റിലേയിലും, 4x100 മീറ്റര്‍ പുരുഷ വിഭാഗം ഫ്രീസ്‌റ്റൈല്‍ റിലേയിലും സജ്ജന്‍ ഇറങ്ങും. ദേശീയ ഗെയിംസില്‍ കേരളത്തിന് വേണ്ടി ഏറ്റവും കൂടുതല്‍ മെഡല്‍ നേടിയ താരവും സജ്ജന്‍ പ്രകാശ് ആണ്. 26 മെഡലുകള്‍.
വനിതകളുടെ 50, 100, 200 മീറ്റര്‍ ബ്രസ്‌റ്റ് സ്ട്രോക്ക് ഇനങ്ങളിലും, 200 മീറ്റര്‍ ഇന്‍ഡിവിജ്വല്‍ മെഡ്‌ലേയിലും, രണ്ട് റിലേ ഇനങ്ങളിലും മല്‍സരിക്കുന്ന ഹര്‍ഷിത ജയറാമും പ്രതീക്ഷ പകരുന്ന താരമാണ്. ഗോവയിൽ നടന്ന ദേശീയ ഗെയിംസില്‍ രണ്ട് സ്വർണമടക്കം മൂന്ന് മെഡലുകള്‍ നേടിയ ഹര്‍ഷിത ജയറാമും പ്രതീക്ഷയിലാണ്. കര്‍ണാടകയില്‍ പരിശീലനത്തിനു ശേഷമാണ് ഹർഷിത കേരള ടീമിനൊപ്പം ചേരുന്നത്.
നീന്തല്‍ക്കുളത്തില്‍ നിന്ന് ദിനിധി ദേശിങ്കുവും സംഘവും നേടിയെടുത്ത സ്വര്‍ണങ്ങളുടെ മികവില്‍ 19 സ്വര്‍ണമടക്കം 39 മെഡലുകള്‍ നേടി കര്‍ണാടകയായിരുന്നു നീന്തല്‍ക്കുളത്തില്‍ ആധിപത്യം പുലര്‍ത്തിയത്. കേരളത്തിന് നേടാനായത് വനിതാ വാട്ടര്‍ പോളോയിലേതടക്കം 6 സ്വര്‍ണമായിരുന്നു. ഒപ്പം നാല് വെള്ളിയും മൂന്ന് വെങ്കലവും.
ഫുട് ബോള്‍
ദേശീയ ഗെയിംസ് ഫുട്ബോളില്‍ നിലവിൽ വെങ്കല ജേതാക്കളായ കേരളം കിരീടം ലക്ഷ്യമിട്ടാണ് ഉത്തരാഖണ്ഡിലേക്ക് വണ്ടി കയറുന്നത്. തലനാരിഴയ്ക്ക് സന്തോഷ് ട്രേഫി കിരീടം നഷ്‌ടമായതിന്‍റെ വേദന മറക്കാന്‍ പുത്തന്‍ താര നിരയുമായാണ് കേരള ഫുട് ബോള്‍ ടീം ഉത്തരാഖണ്ഡിലേക്ക് എത്തുന്നത്. ടീമിലെ 22 പേരില്‍ 19 പേരും ആദ്യമായി കേരളത്തിന്‍റെ കുപ്പായമണിയുന്നവരാണ്. സൂപ്പർ ലീഗിൽ നിന്ന് മൂന്ന് പേരും, കെപിഎല്ലിൽ നിന്ന് ഏഴ് കളിക്കാരും ടീമിൽ ഇടം കണ്ടു.
വയനാട്ടിൽ കഠിന പരിശീലനത്തിലാണ് ടീം ഇപ്പോഴള്ളത്. 27 നാണ് ടീം ഉത്തരാഖണ്ഡിലേക്ക് പുറപ്പെടുന്നത്. ഹൽദ്വാനിയിലെ ഇന്ദിരാഗാന്ധി സ്‌പോർട്‌സ് കോംപ്ലക്‌സിലാണ് മത്സരങ്ങൾ. ബി ഗ്രൂപ്പിൽ 30 ന് മണിപ്പൂരുമായാണ് ആദ്യ കളി. ഫെബ്രുവരി ഒന്നിന് ഡൽഹിയെയും മൂന്നിന് നിലവിലെ ചാംപ്യൻമാരായ സർവീസസിനെയും കേരളം നേരിടും. ഗ്രൂപ്പിലെ ആദ്യ രണ്ട് സ്ഥാനക്കാർ സെമിയിലെത്തും.
ഗോൾകീപ്പർമാർ: അൽകേഷ് രാജ്, കെ.വി അഭിനവ്, മുഹമ്മദ് ഇഖ്ബാൽ.
പ്രതിരോധം: സച്ചിൻ സുനിൽ, യാഷിൻ മാലിക്, അജയ് അലക്‌സ്, എസ്. ഷിനു, ജിധു കെ റോബി, ടി എൻ അഫ്‌നാസ്, എസ് സന്ദീപ്.
മധ്യനിര: ബിജേഷ് ബാലൻ, പി ആദിൽ, ബിബിൻ ബോബൻ, ജേക്കബ് സി ക്രിസ്‌തുദാസൻ, സൽമാൻ ഫാരിസ്, എസ് സെബാസ്‌റ്റ്യൻ.
മുന്നേറ്റം: റിസ്‌വാൻ ഷൗക്കത്ത്, ഗോകുൽ സന്തോഷ്, യു ജ്യോതിഷ്, പി പി മുഹമ്മദ് ഷാദിൽ.
