വിണ്ണിലെ താരങ്ങളെയല്ല, പാടത്തും ചെളിയിലും പണിയെടുക്കുന്ന സാധാരണക്കാരന്‍റെ ജീവിതം പ്രമേയമാകുമ്പോൾ സൂപ്പർതാരങ്ങളും മണ്ണിലേക്കിറങ്ങും. 1994ലെ ദേശീയ പുരസ്‌കാരങ്ങൾ മലയാളസിനിമയിലേക്ക് എത്തിച്ച പൊന്തൻമാട ചിത്രീകരിക്കാൻ 40 ദിവസവും മമ്മൂട്ടി പാടത്തെ ചെളിയിലായിരുന്നു. സംവിധായകന് സിനിമ, കഥ പറയാനുളള മാധ്യമത്തിലേക്ക് ഒതുങ്ങാതെ, അത് കലയുടെയും കഴിവിന്‍റെയും പുതിയ തലങ്ങളിലേക്കും എത്തുമ്പോൾ ടി.വി ചന്ദ്രനെ പോലെ രാജ്യം ബഹുമാനിക്കുന്ന സംവിധായകന്മാർ ഇവിടെ ഒരു പ്രതിബിംബമാകും.
സംവിധായകനായും തിരക്കഥാകൃത്തായും നിർമാതാവായും അഭിനേതാവായും മലയാളസിനിമയിൽ അനുപമമായ സ്ഥാനം നേടിയ ടി.വി ചന്ദ്രന്‍റെ 70-ാം ജന്മദിനമാണിന്ന്. തലയെടുപ്പും ചങ്കുറപ്പുമുള്ള സംവിധായകൻ.... സിനിമയെ വിട്ടുവീഴ്‌ചകളോടെയല്ലാതെ സമീപിച്ച കലാകാരൻ... ടി.വി ചന്ദ്രൻ ഒരു പേര് മാത്രമാവാതെ, നാല് ദശകങ്ങൾ നീണ്ട സിനിമാനുഭവങ്ങളുടെ കാലഘട്ടം കൂടിയാകുമ്പോൾ ഭാഷകളുടെ പരിമിതി കടന്ന് ഇന്ത്യൻ സിനിമ മുഴുവൻ അദ്ദേഹത്തിൽ അഭിമാനിക്കുന്നുവെന്ന് പറയാം.
1950ൽ നാരായണൻ നമ്പ്യാർ- കാർത്ത്യായനി ദമ്പതികളുടെ മകനായി തലശ്ശേരിയിൽ ജനിച്ചു. കടമ്പൂർ, കതിരൂർ, പരിയാരം എന്നിവിടങ്ങളിലായി സ്‌കൂൾ വിദ്യാഭ്യാസം പൂർത്തിയാക്കി. ഇരിങ്ങാലക്കുട ക്രൈസ്റ്റ് കോളജിലും കോഴിക്കോട് ഫറൂഖ് കോളജിലുമായിരുന്നു ടി.വി ചന്ദ്രന്‍റെ കലാലയ വിദ്യാഭ്യാസം. നക്‌സലെറ്റ് ആശയങ്ങളെ പിന്തുടർന്ന ടി.വി ചന്ദ്രൻ, കലാലയജീവിതത്തിനിടെ കമ്മ്യൂണിസ്റ്റ് പാർട്ടിയിൽ ഭാഗമായിരുന്നു. ബാംഗ്ലൂരിലെ ഒരു സ്വകാര്യ ധനകാര്യസ്ഥാപനത്തിൽ ജോലി ചെയ്‌ത ശേഷം റിസർവ്വ് ബാങ്ക് ഉദ്യോഗസ്ഥനായും പ്രവർത്തിച്ചിട്ടുണ്ട്.
പിന്നീട്, സിനിമയിലേക്കുള്ള പ്രവേശനം. പ്രശസ്‌ത സംവിധായകൻ പി.എ ബക്കറുടെ കബനീനദി ചുവന്നപ്പോൾ സിനിമയിൽ സംവിധാനസഹായിയും അഭിനേതാവുമായാണ് അരങ്ങേറ്റം കുറിച്ചത്. പി.എ ബക്കറിനെ കൂടാതെ ജോൺ എബ്രഹാമിന് കീഴിലും അദ്ദേഹം പ്രവർത്തിച്ചു.
1981ൽ കൃഷ്‌ണൻകുട്ടി എന്ന ചിത്രത്തിലൂടെ സഹസംവിധായകനായി. എന്നാൽ, ആദ്യചിത്രം പുറത്തിറങ്ങിയില്ല. 1989ൽ ആലീസിന്‍റെ അന്വേഷണം എന്ന സിനിമ സംവിധാനം ചെയ്തു. 1994ൽ മികച്ച സംവിധായകനുള്ള ദേശീയ അവാർഡ് സ്വന്തമാക്കിയ പൊന്തൻമാടയിലൂടെ മലയാളസിനിമയിൽ ടി.വി ചന്ദ്രന് തന്‍റെ സ്ഥാനം കണ്ടെത്തി. പിന്നീട്, നിരൂപകശ്രദ്ധ പിടിച്ചുപറ്റിയ നിരവധി ചിത്രങ്ങളിലൂടെ വെള്ളിത്തിരയിൽ വേറിട്ടൊരു സഞ്ചാരപഥത്തിലൂടെയായി ടി.വി ചന്ദ്രന്‍റെ യാത്ര.
തീഷ്‌ണമായ കഥാ സന്ദർഭങ്ങളിലൂടെ കാഴ്‌ചക്കാരനെ പലവട്ടം അയാൾ കൂട്ടിക്കൊണ്ട് പോയിട്ടുണ്ട്. ഗോപിയും സാഹിറയും ഷാഹിനയുമൊക്കെ സമൂഹത്തിൽ നമുക്ക് പരിചയമുള്ള ജീവിതമുഖങ്ങളായപ്പോൾ, ആസ്വാദകന്‍റെയും ഹൃദയം വേദനിച്ചു.
വാണിജ്യസിനിമകളേക്കാൾ കലാമൂല്യമുള്ള ചലച്ചിത്രങ്ങളിലൂടെയാണ് ടി.വി ചന്ദ്രൻ പ്രശസ്‌തനായത്. സ്‌ത്രീ വിരുദ്ധത അദ്ദേഹത്തിന്‍റെ സൃഷ്‌ടികളിൽ പ്രകടമായിരുന്നില്ല. അതായത്, സ്ത്രീസ്വാതന്ത്ര്യവും രാഷ്‌ട്രീയവും ചരിത്രവുമെല്ലാം തന്‍റെ സിനിമകളിൽ അടയാളപ്പെടുത്താൻ സംവിധായകന് സാധിച്ചിരുന്നു.
പാഠം ഒന്ന് ഒരു വിലാപം, മോഹവലയം, പെങ്ങളില, ഡാനി, സൂസന്ന, മങ്കമ്മ തുടങ്ങി പതിനാറ് ചിത്രങ്ങൾ അദ്ദേഹം സംഭാവന ചെയ്തു. ഒരു വ്യക്തിയുടെ ജീവിതവും അതിന് സമാന്തരമായി ചരിത്രസംഭവങ്ങളും ഇടകലർത്തിയാണ് മമ്മൂട്ടിയെ നായകനാക്കി സംവിധായകൻ ഡാനി എന്ന ചിത്രം നിർമിച്ചത്. ബാബറി പള്ളി കര്‍സേവകര്‍ തകര്‍ക്കുന്ന ദൃശ്യം കാണിച്ച ഫീച്ചര്‍ സിനിമ ഒരുപക്ഷേ ഡാനി മാത്രമായിരിക്കുമെന്നും ടി.വി ചന്ദ്രൻ തന്നെ പറഞ്ഞിട്ടുണ്ട്.
കാലം കടന്നും സഞ്ചരിക്കുന്ന കഥാവശേഷൻ ചിത്രത്തിന് തിരക്കഥ രചിച്ചതും സംവിധായകന് ടി.വി ചന്ദ്രൻ തന്നെയായിരുന്നു. സമകാലിക സംഭവങ്ങളോടും ചുറ്റുപാടുകളിലെ യാഥാർഥ്യങ്ങളോടും കടുപ്പമേറുന്തോറും കഥാവശേഷനും ചിത്രത്തിലെ ഗോപിയും കൂടുതൽ പ്രസക്തമാകുന്നു. സാമൂഹികഅക്രമങ്ങളോട് പൊരുത്തപ്പെടാനാവാതെ സ്വയം ജീവനവസാനിപ്പിച്ച ആ യുവാവ്... ആസിഫയും നിർഭയയും ഹത്രസ് പീഡനവുമൊക്കെ വാർത്തകളിൽ തലക്കെട്ടായി ആവർത്തിച്ചുകൊണ്ടേയിരിക്കുമ്പോൾ, കഥാവശേഷൻ അവശേഷിപ്പിച്ചതും കാലികപ്രസക്തിയുള്ള കഥകളായിരുന്നു, ഓരോ പ്രേക്ഷകന്‍റെയും ഉള്ളിൽ.
സാമൂഹിക പ്രതിബന്ധതയുള്ള ചിത്രങ്ങളിൽ ചന്ദ്രന്‍റെ കഥാവശേഷൻ മാത്രമല്ല, വിലാപങ്ങള്‍ക്കപ്പുറം, ഭൂമിയുടെ അവകാശികള്‍ എന്നീ ചിത്രങ്ങളും ഗുജറാത്ത് കലാപത്തെ അവതരിപ്പിച്ചിട്ടുണ്ട്. അങ്ങനെ, മലയാള സിനിമയിലും സാംസ്കാരിക, സാമൂഹ്യ രംഗത്തും വേറിട്ട ശബ്‌ദമുയർത്തിയ അസാമാന്യ കലാകാരനാണ് ടി.വി ചന്ദ്രൻ.
