പ്രശസ്‌ത കന്നഡ നടൻ ചിരഞ്ജീവി സര്‍ജ (39) അന്തരിച്ചു. ബെംഗലൂരുവിലെ സ്വകാര്യ ആശുപത്രിയിൽ വച്ച് ഹൃദയാഘാതം മൂലമാണ് അന്ത്യം. കന്നഡയിലെ പ്രമുഖ അഭിനേതാവ് ശക്തി പ്രസാദിന്‍റെ ചെറുമകനും ധ്രുവ് സർജയുടെ സഹോദരനുമാണ് ചിരഞ്ജീവി. ചിരു എന്നറിയപ്പെടുന്ന താരം 20ഓളം കന്നഡ സിനിമകളിൽ അഭിനയിച്ചിട്ടുണ്ട്.
ബെംഗലൂരുവിലെ പഠനത്തിന് ശേഷം അമ്മാവനും നടനുമായ അർജുൻ സർജയോടൊപ്പം സഹസംവിധായകനായി നാലു വർഷം പ്രവർത്തിച്ചു. 2009ൽ വായുപുത്ര എന്ന ചിത്രത്തിലൂടെയാണ് താരം അഭിനയജീവിതത്തിലേക്ക് കടക്കുന്നത്. പിന്നീട്, ചിരു, വിസിൽ, അമ്മ ഐ ലവ് യു, കാക്കി, ശിവാർജുന, സംഹാര സിനിമകളിലൂടെ ശ്രദ്ധേയനായി. 2018 മെയ് രണ്ടിന് തെന്നിന്ത്യന്‍ നടി മേഘ്‌ന രാജും ചിരഞ്ജീവിയും വിവാഹിതരായി. രണം, ഏപ്രിൽ, രാജമാർത്താണ്ഡ എന്നിവയാണ് താരത്തിന്‍റേതായി പുറത്തിറങ്ങാനിരിക്കുന്ന ചിത്രങ്ങൾ.
