മുന്നൂറോളം സിനിമകളില്‍ ആയിരത്തിലേറെ ചലച്ചിത്ര ഗാനങ്ങള്‍........ എന്നും മൂളിപ്പാട്ടായി മലയാളിയുടെ ചുണ്ടിൻ തുമ്പത്ത് വരികള്‍....... പാതിയിൽ പൊലിഞ്ഞുപോയ പാട്ടെഴുത്തുകാരൻ ഗിരീഷ് പുത്തഞ്ചേരി ഓര്‍മയായിട്ട് ഇന്നേക്ക് പത്ത് വര്‍ഷങ്ങള്‍. വിരഹവും ഏകാന്തതയും സന്ദേഹങ്ങളും നൊമ്പരങ്ങളും സന്തോഷങ്ങളും ആഘോഷങ്ങളും ഒരുപോലെ വരികളിൽ കൊരുത്തുവച്ച രചയിതാവ്. 2010 ഫെബ്രുവരി പത്തിനായിരുന്നു 48 -ാം വയസില്‍ അദ്ദേഹത്തിന്‍റെ മരണം.
ദേവാസുരത്തിലെ സൂര്യകിരീടം വീണുടഞ്ഞു, കൃഷ്ണഗുഡിയില്‍ ഒരു പ്രണയകാലത്തിലെ പിന്നെയും പിന്നെയും ആരോ, പ്രണയവര്‍ണ്ണങ്ങളിലെ ആരോ വിരൽ മീട്ടി, കഥാവശേഷനിലെ കണ്ണുനട്ട് കാത്തിരുന്നിട്ടും, രാവണപ്രഭുവിലെ ആകാശദീപങ്ങള്‍ സാക്ഷി, ബാലേട്ടനിലെ ഇന്നലെ എന്‍റെ നെഞ്ചിലെ, അഗ്നിദേവനിലെ നിലാവിന്‍റെ നീലഭസ്മക്കുറിയണിഞ്ഞവളേ, പുനരധിവാസത്തിലെ കനകമുന്തിരികള്‍, സമ്മര്‍ ഇൻ ബെത്‌ലഹേമിലെ ഒരു രാത്രികൂടി വിടവാങ്ങവേ, ഈ പുഴയും കടന്നിലെ രാത്തിങ്കള്‍ പൂത്താലി, മാടമ്പിയിലെ അമ്മ മഴക്കാറിന്, മായാ മയൂരത്തിലെ കൈക്കുടന്ന നിറയെ, മിന്നാരത്തിലെ നിലാമേ മായുമോ, ആറാം തമ്പുരാനിലെ ഹരിമുരളീരവം, ജോണി വാക്കറിലെ ശാന്തമീ രാത്രിയിൽ തുടങ്ങി എത്രയെത്ര ഗാനങ്ങളാണ് അദ്ദേഹത്തിന്‍റെ തൂലിക തുമ്പിൽ നിന്ന് പിറവിയെടുത്തത്. ചക്രവാളത്തിനപ്പുറം എന്ന സിനിമ മുതൽ ഹാപ്പീ ഹസ്ബന്‍റ്സ് വരെയുള്ളതായിരുന്നു അദ്ദേഹത്തിന്‍റെ ചലച്ചിത്രകാലം.
മികച്ച ഗാനരചയിതാവിനുള്ള സംസ്ഥാന സര്‍ക്കാരിന്‍റെ പുരസ്‌കാരം ഏഴുതവണ അദ്ദേഹത്തെ തേടിയെത്തിയിരുന്നു. 2001 മുതല്‍ തുടര്‍ച്ചയായി നാലുതവണ പുരസ്‌കാരം ഗിരീഷ് സ്വന്തമാക്കിയിട്ടുണ്ട്. മലയാള സിനിമകള്‍ക്ക് ഗിരീഷ് കഥയും തിരക്കഥയും ഒരുക്കിയിട്ടുമുണ്ട്. മേലേപ്പറമ്പില്‍ ആണ്‍വീട്, കിന്നരിപ്പുഴയോരം, കേരളാ ഹൗസ് ഉടന്‍ വില്‍പ്പനയക്ക് തുടങ്ങിയ സിനിമകളുടെ കഥയും ബ്രഹ്മരക്ഷസ്, പല്ലാവൂര്‍ ദേവനാരായണന്‍, വടക്കുംനാഥന്‍ എന്നീ ശ്രദ്ധേയമായ ചലച്ചിത്രങ്ങളുടെ തിരക്കഥയും അദ്ദേഹത്തിന്‍റേതായിരുന്നു.
മോഹൻലാലിനെ നായകനാക്കി ഒരു ചിത്രം സംവിധാനം ചെയ്യുമെന്ന് പലതവണ പുത്തഞ്ചേരി പറഞ്ഞിട്ടുണ്ടായിരുന്നു. ആ മോഹം സഫലമാകുന്നതിന് മുമ്പേ അദ്ദേഹം നമ്മെ വിട്ട് പിരിഞ്ഞു. ഫെബ്രുവരി പത്തുകൾ ഇനിയും വരും... അതൊന്നുമോർക്കാതെ അപ്പോഴും മലയാളി പുത്തഞ്ചേരിയുടെ വരികൾ പാടിക്കൊണ്ടിരിക്കും....
