Fan dies while watching RRR: ഏറെ നാളത്തെ കാത്തിരിപ്പിനൊടുവില്‍ എസ്‌.എസ്‌.രാജമൗലിയുടെ ബ്രഹ്‌മാണ്ഡ ചിത്രം 'രൗദ്രം രണം രുദിരം' (ആര്‍ആര്‍ആര്‍) ഇന്നാണ് തിയേറ്ററുകളില്‍ റിലീസിനെത്തിയത്‌. ആദ്യ ദിനം തന്നെ രാജ്യമൊട്ടാകെയുള്ള തിയേറ്ററുകളില്‍ മികച്ച സ്വീകരണമാണ് ചിത്രത്തിന് ലഭിച്ചത്‌. സന്തോഷ വാര്‍ത്തകള്‍ക്കിടെ 'ആര്‍ആര്‍ആറു'മായി ബന്ധപ്പെട്ട്‌ സങ്കടപ്പെടുത്തുന്ന ഒരു വാര്‍ത്തയാണ് പുറത്തുവരുന്നത്‌.
'ആര്‍ആര്‍ആര്‍' കണ്ടു കൊണ്ടിരിക്കെ ഒരു ആരാധകന്‍ ഹൃദയാഘാതത്തെ തുടര്‍ന്ന്‌ അന്തരിച്ചതായി റിപ്പോര്‍ട്ടുകള്‍. കുഴഞ്ഞുവീണ യുവാവിനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ലെന്നാണ് റിപ്പോര്‍ട്ടുകള്‍. 30 കാരനായ ആരാധകനാണ് മരിച്ചത്‌. ആന്ധ്രാപ്രദേശിലെ അനന്തപ‌ുര്‍ എസ്‌വി മാക്‌സില്‍ 'ആര്‍ആര്‍ആര്‍' പ്രദര്‍ശിപ്പിച്ചു കൊണ്ടിരിക്കെയായിരുന്നു സംഭവം.
RRR screaming: ആദ്യ ദിനം തിയേറ്ററുകളില്‍ വലിയ തിരക്കാണ് അനുഭവപ്പെട്ടത്‌. കേരളത്തില്‍ മാത്രം 500ലധികം സ്‌ക്രീനുകളിലാണ്‌ ചിത്രം റിലീസ്‌ ചെയ്‌തത്‌. ലോകത്താകമാനം 10,000 സ്‌ക്രീനുകളില്‍ 'ആര്‍ആര്‍ആര്‍' റിലീസ്‌ ചെയ്യുമെന്നായിരുന്നു റിപ്പോര്‍ട്ട്‌. തമിഴ്‌, തെലുങ്ക്‌, ഹിന്ദി, കന്നട, മലയാളം എന്നീ ഭാഷകള്‍ക്ക്‌ പുറമെ വിദേശ ഭാഷകളിലും ചിത്രം പ്രദര്‍ശനത്തിനെത്തിയിരുന്നു.
RRR pre booking records: പ്രീബുക്കിങിനോടനുബന്ധിച്ച്‌ റെക്കോഡ്‌ വേഗത്തില്‍ ചിത്രത്തിന്‍റെ ടിക്കറ്റുകള്‍ വിറ്റു തീര്‍ന്നിരുന്നു. ആദ്യ ദിനത്തില്‍ 'ആര്‍ആര്‍ആറി'ന്‍റെ ടിക്കറ്റ്‌ വിലയും ചര്‍ച്ചയായി. ഡല്‍ഹിയിലെ പിവിആര്‍ ഡയറക്‌ടേഴ്‌സ്‌ ഘട്ടില്‍ 'ആര്‍ആര്‍ആറി'ന്‍റെ 3ഡി പ്ലാറ്റിന ടിക്കറ്റിന് 1900 രൂപയും 3ഡി പ്ലാറ്റിന സുപ്പീരിയര്‍ ടിക്കറ്റിന് 2100 രൂപയുമാണ് വില.
RRR big budget: 'ബാഹുബലി'ക്ക്‌ ശേഷം രാജമൗലി ഒരുക്കുന്ന ബ്രഹ്‌മാണ്ഡ ചിത്രം 'ആര്‍ആര്‍ആര്‍' 650 കോടി ബഡ്‌ജറ്റിലാണ് ഒരുങ്ങിയത്‌. ചിത്രത്തില്‍ രാംചരണും ജൂനിയര്‍ എന്‍.ടി.ആറുമാണ് പ്രധാന വേഷത്തിലെത്തുന്നത്‌. 1920കളിലെ അല്ലൂരി സീതാരാമ രാജു, കോമരം ഭീം എന്നീ സ്വാതന്ത്യസമരസേനാനികളുടെ കഥയാണ് ചിത്രം പറയുന്നത്‌. അല്ലൂരി സീതാരാമ രാജു ആയി രാം ചരണും കോമരം ഭീം ആയി ജൂനിയര്‍ എന്‍.ടി.ആറുമാണ് വേഷമിടുന്നത്‌. സ്വാതന്ത്ര്യത്തിന് മുമ്പ്‌ തെലങ്കാനയിലെ ആദിവാസി പോരാട്ടങ്ങള്‍ക്ക്‌ നേതൃത്വം കൊടുത്തവരാണ് കോമരം ഭീമും അല്ലൂരി സീതാരാമ രാജുവും.
RRR cast and crew: രാം ചരണ്‍, ജൂനിയര്‍ എന്‍.ടി.ആര്‍ എന്നിവരെ കൂടാതെ ചിത്രത്തില്‍ ആലിയ ഭട്ട്‌, അജയ്‌ ദേവ്‌ഗണ്‍, സമുദ്രക്കനി, ശ്രീയ ശരണ്‍, ബ്രിട്ടീഷ്‌ നടി ഡെയ്‌സി എഡ്‌ജര്‍ ജോണ്‍സ്‌ എന്നിവരും സുപ്രധാന കഥാപാത്രങ്ങളെ അവതരിപ്പിക്കും. കെ.കെ സെന്തില്‍കുമാര്‍ ഛായാഗ്രഹണവും ശ്രീകര്‍ പ്രസാദ്‌ എഡിറ്റിങും നിര്‍വഹിക്കും. സാബു സിറില്‍ ആണ് പ്രൊഡക്ഷന്‍ ഡിസൈനര്‍. അച്ഛന്‍ കെ.വി വിജയേന്ദ്ര പ്രസാദിന്‍റെ കഥയ്‌ക്ക്‌ രാജമൗലി ആണ് തിരക്കഥ ഒരുക്കിയിരിക്കുന്നത്‌. കീരവാണി സംഗീതവും നിര്‍വഹിക്കും. വിഎഫ്‌എക്‌സ്‌ വി.ശ്രീനിവാസ്‌ മോഹനും നിര്‍വഹിക്കും. രാമ രാജമൗലി ആണ് കോസ്‌റ്റ്യൂം.
Also Read: 'ഹൃദയം' ബോളിവുഡിലേക്ക്‌... മറ്റ്‌ ഭാഷകളിലും റീമേക്കിനൊരുങ്ങുന്നു
