അറുപതുകളിൽ ഹോളിവുഡ് ഇളക്കി മറിച്ച അഭിനയപ്രതിഭ ഡോറിസ് ഡേ അന്തരിച്ചു. കാലിഫോർണിയയിലെ കാർമൽ വാലിയിലെ ഔദ്യോഗിക വസതിയിൽ ആയിരുന്നു അന്ത്യം. ന്യുമോണിയ ബാധിച്ച് ചികിത്സയിലായിരുന്നു. 97 വയസ്സായിരുന്നു പ്രായം. അഭിനേത്രി എന്നതിലുപരി ലോകമറിയുന്ന പാട്ടുകാരിയും മൃഗ സംരക്ഷണ പ്രവർത്തകയും കൂടിയായിരുന്നു ഡോറിസ്. 1939ൽ ബിഗ് ബാൻഡ് ഗായികയായിട്ടായിരുന്നു ഡോറിസ് ഹോളിവുഡിലേക്ക് ചുവടുവച്ചത്. 1945ൽ പുറത്തിറങ്ങിയ സെന്‍റിമെന്‍റല്‍ ജേർണി എന്ന ഒരൊറ്റ ആൽബത്തിലൂടെ ഡോറിസ് സംഗീത പ്രിയരുടെ ഹൃദയത്തില്‍ ചേക്കേറി. 1947-67 കാലയളവിൽ 650 ഓളം ഗാനങ്ങളാണ് ഡോറിസ് ആലപിച്ചത്.
ഇരുപതാം നൂറ്റാണ്ടിലെ ഏറ്റവും പ്രശസ്തയായ ഗായികയായിരുന്നു ഡോറിസ്. 40 ഹോളിവുഡ് ചിത്രങ്ങളിലാണ് ഡോറിസ് അഭിനയിച്ചത്. ബെഡ്റൂം ഫോഴ്സ്, പില്ലോ ടോക്ക്, കേരി ഗ്രാന്റ്, റോക്ക് ഹുഡ്സൺ, ജയിംസ് ഗാർണർ എന്നിവയാണ് ഡോറിസ് അഭിനയിച്ച മികച്ച ചിത്രങ്ങൾ. ഇതിൽ പില്ലോ ടോക്ക് ഓസ്ക്കർ നോമിഷന് തെരഞ്ഞെടുക്കപ്പെട്ടിരുന്നു.
