അന്ന് ചേട്ടനോടൊപ്പം, ഇന്ന് അനിയന് വേണ്ടി; മലർവാടി ടീം വീണ്ടും ഒന്നിക്കുന്നു

മലർവാടി താരങ്ങൾക്കൊപ്പം ഉർവശിയും ചിത്രത്തിൽ​ ഒരു പ്രധാന വേഷത്തിലെത്തുന്നുണ്ട്. ചിത്രത്തിന്‍റെ രണ്ടാം ഷെഡ്യൂളിന്‍റെ ചിത്രീകരണം പുരോഗമിച്ച് കൊണ്ടിരിക്കുകയാണ്.

സ്വന്തമായി രചനയും സംവിധാനവും നിർവ്വഹിച്ച് മലർവാടി ആർട്ട്സ് ക്ലബ് എന്ന ചിത്രത്തിലൂടെ വിനീത് ശ്രീനിവാസൻ സ്വതന്ത്രസംവിധായകനായപ്പോൾ നിവിൻ പോളി, ശ്രാവൺ, ഹരികൃഷ്ണൻ, ഭഗത്, അജു വർഗ്ഗീസ് എന്നിങ്ങനെ അഞ്ച് ചെറുപ്പക്കാരെ കൂടിയാണ് മലയാളസിനിമയിലേക്ക് കൈപ്പിടിച്ച് കയറ്റിയത്. ഒമ്പത് വർഷത്തെ ഇടവേളയ്ക്ക് ശേഷം മലർവാടിയിലെ ആ പഴയ കൂട്ടുകാർ വീണ്ടുമൊന്നിക്കുകയാണ് ധ്യാൻ ശ്രീനിവാസന്‍റെ ‘ലവ് ആക്ഷൻ ഡ്രാമ’യിൽ.

നിവിൻ, അജു വർഗ്ഗീസ്, ഹരികൃഷ്ണൻ, ഭഗത് എന്നിവർ ‘ലവ് ആക്ഷൻ ഡ്രാമ’യുടെ ലൊക്കേഷനിൽ നിന്നെടുത്ത ചിത്രമാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്. ചിത്രത്തിൽ ശ്രാവൺ ഇല്ല, അധികം വൈകാതെ ശ്രാവണും ഞങ്ങൾക്കൊപ്പം ചേരുമെന്നാണ് ഇവർ പറയുന്നത്. ഒരു നാട്ടിൻപ്പുറത്തുള്ള മലർ‌വാടി എന്ന ആർട്സ് ക്ലബ്ബിന്‍റെയും അതിലെ അംഗങ്ങളായ അഞ്ച് സുഹൃത്തുക്കളുടെയും സുഹൃത്ത് ബന്ധത്തിന്‍റെ കഥ പറഞ്ഞ ചിത്രമായിരുന്നു ‘മലർവാടി ആർട്സ് ആൻഡ് സ്പോർട്സ് ക്ലബ്ബ്’.

മലർവാടി ടീം

ശ്രീനിവാസനും പാർവ്വതിയും അഭിനയിച്ച ‘വടക്കുനോക്കി യന്ത്രം’ എന്ന ചിത്രത്തിലെ കഥാപാത്രങ്ങളുടെ പേരാണ് പുതിയ ചിത്രത്തിൽ കഥാപാത്രങ്ങൾക്ക് ധ്യാൻ നൽകിയിരിക്കുന്നത്. ദിനേശൻ ആയി നിവിൻ പോളിയായെത്തുമ്പോൾ ശോഭയായാണ് നയൻതാര എത്തുന്നത്. അജു വര്‍ഗീസും വിശാഖ് സുബ്രഹമണ്യവും ചേര്‍ന്നാണ് ചിത്രം നിര്‍മ്മിക്കുന്നത്. ധ്യാൻ തന്നെയാണ് ചിത്രത്തിന്‍റെ തിരക്കഥ ഒരുക്കിയിരിക്കുന്നത്.