കരള്‍ രോഗം ബാധിച്ച് ചികിത്സയില്‍ കഴിയുന്ന മുതിര്‍ന്ന നടി കെപിഎസി ലളിതയെ (KPAC Lalitha) പിന്തുണച്ച് കെബി ഗണേഷ്‌ കുമാര്‍ എംഎല്‍എ (KB Ganesh Kumar MLA). സര്‍ക്കാര്‍ അനുവദിച്ച ചികിത്സാസഹായത്തിന് കെപിഎസി ലളിത (Government takes over KPAC Lalitha treatment) അര്‍ഹയാണെന്ന്‌ ഗണേഷ്‌ കുമാര്‍ പറഞ്ഞു. ഒരാപത്ത് വരുമ്പോള്‍ വീട്ടില്‍ കാശുണ്ടോ എന്ന് അന്വേഷിക്കുന്നത് മര്യാദക്കേടാണെന്നും അദ്ദേഹം പറഞ്ഞു.
കെപിഎസി ലളിതയ്‌ക്ക് ചികിത്സ നല്‍കുന്നതിനെ രാഷ്‌ട്രീയവത്ക്കരിക്കുന്നതും അധിക്ഷേപിക്കുന്നതും ശരിയായ പ്രവണതയല്ലെന്നും പ്രതിഷേധങ്ങള്‍ സംസ്‌കാര ശൂന്യമാണെന്നും ഗണേഷ്‌ കുമാര്‍ വ്യക്തമാക്കി. 'ഒരു കലാകാരിയാണവര്‍, അവര്‍ക്ക് ഒരുപാട് സാമ്പത്തിക ബാധ്യതയുണ്ട്. നിലവില്‍ സംഗീത നാടക അക്കാദമിയുടെ ചെയര്‍മാന്‍റെ പദവി വഹിക്കുന്ന കെപിഎസി ലളിത, സര്‍ക്കാര്‍ ചികിത്സാസഹായം ലഭിക്കാന്‍ യോഗ്യയാണ്.
Also Read: 'ലളിത ചേച്ചിയുടെ കയ്യില്‍ പണമില്ലെന്ന് പറഞ്ഞാല്‍ വിശ്വസിക്കാന്‍ പ്രയാസമില്ല' : ശാരദക്കുട്ടി
ജഗതിക്കും (Jagathy Sreekumar) തിലകനും (Thilakan) ഉള്‍പ്പടെ നിരവധി കലാകാരന്മാര്‍ക്ക് മുമ്പ് ധനസഹായം നല്‍കിയിട്ടുണ്ട്. നമ്മള്‍ ആദരിക്കുന്നവരും സ്‌നേഹിക്കുന്നവരുമാണ് കലാകാരന്മാര്‍. അവര്‍ക്ക് ഒരാപത്ത് വരുമ്പോള്‍ വീട്ടില്‍ കാശുണ്ടോ എന്ന് അന്വേഷിക്കുന്നത് മര്യാദക്കേടാണ്. ചികിത്സാസഹായം നല്‍കുന്നതിനെ എതിര്‍ക്കുന്നത് ഇടുങ്ങിയ ചിന്താഗതിക്കാരന്‍റെ വക്ര ബുദ്ധിയാണ്.' -ഗണേഷ്‌ കുമാര്‍ പറഞ്ഞു.
നിലവില്‍ ചികിത്സയില്‍ കഴിയുന്ന നടിയുടെ ആരോഗ്യ നിലയില്‍ പുരോഗതിയുണ്ട്. കൊച്ചിയിലെ സ്വകാര്യ ആശുപത്രിയില്‍ ചികിത്സയില്‍ കഴിയുകയാണ് ലളിത.
നടിയുടെ ചികിത്സാചെലവ് സര്‍ക്കാര്‍ ഏറ്റെടുത്തതിനെ അനുകൂലിച്ചും പ്രതികൂലിച്ചും നിരവധി പേര്‍ രംഗത്തത്തിയിരുന്നു. സുരേഷ് ഗോപി (Suresh Gopi), മന്ത്രി വി.അബ്‌ദുറഹ്മാന്‍ (V Abdurahiman), എംഎല്‍എ പിടി തോമസ് (PT Thomas MLA), എഴുത്തുകാരി ശാരദക്കുട്ടി (Saradakutty Bharathikutty) തുടങ്ങി നിരവധി പ്രമുഖര്‍ വിഷയത്തില്‍ അഭിപ്രായം രേഖപ്പെടുത്തിയിരുന്നു.
