അര്‍ജുന്‍ റെഡ്ഡിയുടെ ഹിന്ദി പതിപ്പായ കബീര്‍ സിംഗ് റിലീസിങ്ങിനൊരുങ്ങുന്നു. വിജയ് ദേവരകൊണ്ടയ്ക്ക് പകരം ബോളിവുഡില്‍ ഷാഹിദ് കപൂറാണ് നായകവേഷത്തില്‍ എത്തുന്നത്. കബീര്‍ സിംഗിന്‍റെ ട്രെയിലര്‍ ആരാധകര്‍ ഏറ്റെടുത്ത് കഴിഞ്ഞു. ഷാഹിദ് കപൂറിന്‍റെ പ്രകടനം തന്നെയാണ് ട്രെയിലറിന്‍റെ മുഖ്യ ആകര്‍ഷണം. കബീര്‍ സിങ്ങായി വേറിട്ട ഗെറ്റപ്പുകളില്‍ നടന്‍ എത്തുന്നുണ്ട്. തെലുങ്ക് പതിപ്പിനോട് നീതി പുലര്‍ത്തുന്ന തരത്തിലുളള ട്രെയിലറാണ് പുറത്തുവന്നിരിക്കുന്നത്.
ലസ്റ്റ് സ്റ്റോറി, മഹേന്ദ്രസിംഗ് ധോണി ദ അണ്‍ടോള്‍ഡ് സ്റ്റോറി എന്നീ സിനിമകളിലൂടെ ശ്രദ്ധേയയായ കിയാര അദ്വാനിയാണ് ചിത്രത്തില്‍ നായികാവേഷത്തില്‍ എത്തുന്നത്. സന്ദീപ് വാങ്കേയാണ് കബീര്‍ സിങ്ങിന്‍റെ സംവിധായകന്‍. ചിത്രത്തില്‍ ഡോ.കബീര്‍ രാജ് ദേവ് സിങ് എന്നാണ് ഷാഹിദ് കപൂറിന്‍റെ കഥാപാത്രത്തിന്‍റെ പേര്. ജൂണ്‍ 21നാണ് കബീര്‍ സിങ് ലോകമെമ്പാടുമുളള തിയേറ്ററുകളിലേക്ക് എത്തുന്നത്.
