മുംബൈ: പ്രമുഖ ബോളിവുഡ് നടൻ അർമാൻ കോലി എൻസിബി അറസ്റ്റിൽ. താരത്തിന്‍റെ പക്കൽ നിന്നും നിരോധിത മയക്കുമരുന്നുകൾ കണ്ടെത്തിയതിനെ തുടർന്ന് ശനിയാഴ്‌ച നടനെ എൻസിബി (നാർകോട്ടിക്‌സ് കൺട്രോൾ ബ്യൂറോ) ചോദ്യം ചെയ്‌തിരുന്നു. മണിക്കൂറുകൾ നീണ്ട ചോദ്യം ചെയ്യലിനൊടുവിൽ അന്വേഷണസംഘം അർമാൻ കോലിയുടെ അറസ്റ്റ് രേഖപ്പെടുത്തി.
ശനിയാഴ്‌ച ഉച്ചയ്ക്ക് ശേഷം നടന്‍റെ വീട്ടില്‍ എൻസിബി റെയ്‌ഡ് നടത്തി. ഈ പരിശോധനയിലാണ് മയക്കുമരുന്ന് കണ്ടെത്തിയത്. തുടർന്ന് കേസ് രജിസ്റ്റർ ചെയ്യുകയും വൈകിട്ടോടെ നടനെ ചോദ്യം ചെയ്യാനായി സൗത്ത് മുംബൈയിലെ എൻസിബി ഓഫിസിലേക്ക് വിളിച്ചുവരുത്തുകയുമായിരുന്നു. അജയ് രാജു സിംഗ് എന്ന ലഹരിമരുന്ന് വിൽപ്പനക്കാരനെയും കേസിൽ അറസ്റ്റ് ചെയ്‌തിട്ടുണ്ട്.
Also Read: മയക്കുമരുന്ന് കേസിൽ കൂടുതൽ താരങ്ങൾ പിടിയിലാകും; അജാസ് ഖാനെ എൻസിബി ചോദ്യം ചെയ്യുന്നു
ബോളിവുഡ് സംവിധായകന്‍ രാജ്‍കുമാര്‍ കോലിയുടെ മകനായ അര്‍മാന്‍ കോലി ബാലതാരമായാണ് അഭിനയരംഗത്ത് എത്തുന്നത്. പിന്നീട് പ്രേം രതന്‍ ധന്‍ പായോ, എല്‍ഒസി: കാര്‍ഗില്‍, ദുഷ്‍മന്‍ കെ ഖൂന്‍ പാനി ഹ എന്നിങ്ങനെ നിരവധി ചിത്രങ്ങളില്‍ ശ്രദ്ധേയ വേഷം ചെയ്‌തു. ബിഗ് ബോസ് ഏഴാം സീസൺ മത്സരാര്‍ഥിയുമായിരുന്നു താരം.
