സാൻ ഫ്രാൻസിസ്‌കോ: കൂട്ട പിരിച്ചുവിടലുകൾക്ക് ശേഷം, അടുത്തഘട്ട പിരിച്ചുവിടലുമായി ട്വിറ്റർ. ട്വിറ്റർ ബ്ലൂ വെരിഫിക്കേഷൻ സബ്‌സ്‌ക്രിപ്‌ഷനും വരാനിരിക്കുന്ന പേയ്‌മെന്‍റ് പ്ലാറ്റ്‌ഫോമും ഉൾപ്പെടെ ട്വിറ്ററിലെ വിവിധ പ്രോജക്റ്റുകൾക്ക് നേതൃത്വം നൽകിയ ട്വിറ്റർ പ്രൊഡക്റ്റ് മാനേജർ എസ്‌തർ ക്രോഫോർഡിൻ ഉൾപ്പെടെ 50-ലധികം ജീവനക്കാരെയാണ് ഇത്തവണ പിരിച്ചുവിട്ടത്.
2021-ൽ ട്വിറ്റർ സ്വന്തമാക്കിയ റിവ്യൂ ന്യൂസ്‌ലെറ്റർ പ്ലാറ്റ്‌ഫോമിന്‍റെ സൃഷ്‌ടാവ് മാർട്ടിജൻ ഡി കുയ്‌പറും അക്കൂട്ടത്തിലുണ്ടെന്ന് ശ്രോതസുകളെ ഉദ്ധരിച്ച് ദി വെർജ് റിപ്പോർട്ട് ചെയ്യുന്നു. മൈക്രോ-ബ്ലോഗിംഗ് പ്ലാറ്റ്‌ഫോമിലെ 7,500 ജീവനക്കാരിൽ മൂന്നിൽ രണ്ട് വിഭാഗത്തെയും ബാധിച്ച കഴിഞ്ഞ വർഷം നവംബറിലെ കൂട്ട പിരിച്ചുവിടൽ പോലെയൊന്ന് ഇനിയുണ്ടാവില്ലെന്ന് ട്വിറ്റർ സിഇഒ ഇലോൺ മസ്‌ക് വാക്ക് നൽകിയിരുന്നെങ്കിലും അവയൊന്നും പാലിക്കപ്പെട്ടില്ല എന്ന വിമർശനം നിലനിൽക്കുന്നുണ്ട്.
ശനിയാഴ്‌ച ജോലി നഷ്‌ടപ്പെട്ട ജീവനക്കാർക്ക് ഇമെയിൽ വഴി നോട്ടിസ് ലഭിച്ചിരുന്നു. പരസ്യങ്ങളും ഇൻഫ്രാസ്ട്രക്‌ചർ എഞ്ചിനീയറിംഗും ഉൾപ്പെടെ നിരവധി വകുപ്പുകളിലെ ജീവനക്കാരെ അടുത്തിടെ വെട്ടിക്കുറച്ചിരുന്നു. ഇപ്പോൾ, കമ്പനിക്ക് 2,000 ൽ താഴെ മാത്രം ജീവനക്കാരാണുള്ളത്, മസ്‌ക് ട്വിറ്റർ ഏറ്റെടുക്കുമ്പോൾ ഇത് 7,500 ആയിരുന്നു.
ഈ മാസം ആദ്യം മസ്‌ക് സെയിൽസ്, എഞ്ചിനീയറിംഗ് വകുപ്പുകളിലായി ഡസൻ കണക്കിന് തൊഴിലാളികളെ പിരിച്ചുവിട്ടിരുന്നു. ട്വിറ്റർ സിഇഒയുടെ ദൗത്യത്തിന്‍റെ ഭാഗമായി ചെലവ് ചുരുക്കുന്ന ട്വിറ്റർ, അതിന്‍റെ ഇന്ത്യയിലെ മൂന്ന് ഓഫിസുകളിൽ രണ്ടെണ്ണം അടച്ചുപൂട്ടുകയും ജീവനക്കാരോട് വീട്ടിലിരുന്ന് ജോലി ചെയ്യാൻ നിർദേശിക്കുകയും ചെയ്‌തിരുന്നു.
