കുടുംബത്തെ ബന്ധിപ്പിക്കാനും കുടുംബാംഗങ്ങളുടെ സുരക്ഷയ്‌ക്കുമായി പുതിയ അപ്‌ഡേഷന്‍സുമായി ഗൂഗിള്‍. അടുത്ത ഏതാനും ആഴ്‌ചയ്‌ക്കുള്ളില്‍ 'ഫാമിലി ലിങ്ക്' എന്ന പുത്തൻ ആപ്പിന്‍റെ അവസാന ഘട്ടവും പൂര്‍ത്തിയാകുമെന്നാണ് റിപ്പോര്‍ട്ട്. 'ലൊക്കേഷന്‍ ടാബ്' എന്ന ഓപ്‌ഷനില്‍ വന്ന പുതിയ അപ്‌ഡേഷന്‍സ് അനുസരിച്ച് മാതാപിതാക്കള്‍ക്ക് തങ്ങളുടെ വ്യക്തിഗത ഉപകരണങ്ങളിലൂടെ കുട്ടികളുടെ ഉപകരണങ്ങളിലെ ലൊക്കേഷന്‍ കൃത്യമായി കാണാന്‍ സാധിക്കും.
കൂടാതെ കുട്ടികള്‍ എത്തിച്ചേരേണ്ട സ്ഥലങ്ങളില്‍ കൃത്യമായി എത്തിയില്ല എങ്കില്‍ മാതാപിതാക്കളുടെ ഉപകരണത്തിലേക്ക് നോട്ടിഫിക്കേഷന്‍ വരുമെന്ന് ബ്ലോഗിലൂടെ കമ്പനി വ്യക്തമാക്കി. ഇതിനു പുറമേ ഹൈലൈറ്റ് ടാബ് എന്ന ഓപ്‌ഷന്‍ വഴി കുട്ടികള്‍ എത്ര സമയം ഫോണ്‍ ഉപയോഗിക്കുന്നുവെന്നും പുതുതായി ഇന്‍സ്‌റ്റാള്‍ ചെയ്‌ത ആപ്പുകള്‍ ഏതാണെന്നുമുള്ള വിവരങ്ങളും ലഭിക്കുന്നു.
വീട്ടിലിരുന്ന് ഓൺലൈൻ സുരക്ഷയുമായി ബന്ധപ്പെട്ട സംഭാഷണങ്ങൾ നാവിഗേറ്റ് ചെയ്യാൻ രക്ഷിതാക്കളെ സഹായിക്കുന്നതിന് കോമൺ സെൻസ് മീഡിയ, കണക്റ്റ് സേഫ്‌ലി, ഫാമിലി ഓൺലൈൻ സേഫ്റ്റി ഇൻസ്റ്റിറ്റ്യൂട്ട് തുടങ്ങിയ കമ്പനിയുടെ പങ്കാളികളിൽ നിന്നുള്ള ഉറവിടങ്ങളും പുതിയ അപ്‌ഡേഷനില്‍ ചേര്‍ക്കുന്നു. ഇത്തരം സവിശേഷതകള്‍ 'ഫാമിലി ലിങ്ക്' വെബില്‍ നിന്നും ലഭ്യമാണെന്ന് കമ്പനി അറിയിച്ചു. രക്ഷിതാക്കളുടെ ഫോണ്‍ അവരുടെ സമീപമില്ലെങ്കിലും പുതിയ ഫീച്ചറുകള്‍ ആക്‌സസ് ചെയ്യാന്‍ സാധിക്കും.
പുതിയ ഫീച്ചര്‍ മാതാപിതാക്കളുടെ നിയന്ത്രണത്തിന്‍റെ പ്രധാന്യത്തെ കുറിച്ച് കൃത്യമായി മനസിലാക്കുവാന്‍ കുട്ടികള്‍ക്ക് സാധിക്കും. കൂടാതെ, 'കണ്‍ട്രോള്‍ ടാബ്' ഓപ്‌ഷന്‍ ഉപയോഗിച്ച് കുട്ടികളുടെ വ്യക്തിഗത ഉപകരണങ്ങൾക്കോ ആപ്പുകള്‍ക്കോ മാതാപിതാക്കള്‍ക്ക് സമയപരിധി നിശ്ചയിക്കാനും സാധിക്കും.
