ലണ്ടന്‍ : മങ്കിപോക്‌സ് രോഗത്തെ എംപോക്‌സ് എന്ന് പുനര്‍നാമകരണം ചെയ്‌ത് ലോകാരോഗ്യ സംഘടന. മങ്കിപോക്‌സ് എന്ന പേര് വംശീയമെന്നും, വിവേചനപരം എന്നും വ്യാഖ്യാനിക്കപ്പെടാന്‍ സാധ്യതയുള്ളതുകൊണ്ടാണ് നടപടിയെന്ന് ലോകാരോഗ്യ സംഘടന വ്യക്തമാക്കി.
അടുത്തവര്‍ഷം വരെ മങ്കിപോക്‌സ് എന്നും എംപോക്‌സ് എന്നും ഉപയോഗിക്കും. മങ്കിപോക്‌സ് എന്നതിന്‍റെ ഉപയോഗം കുറച്ച്, പിന്നാലെ പൂര്‍ണമായും ഇല്ലാതാക്കുകയാണ് ലോകാരോഗ്യ സംഘടന ലക്ഷ്യംവയ്ക്കുന്നത്. ഈ വര്‍ഷം നൂറിലധികം രാജ്യങ്ങളില്‍ എംപോക്‌സ് വ്യാപിച്ചിരുന്നു. എന്നാല്‍ വംശീയ ചുവയോടെ ഒരു വിഭാഗത്തെ കളങ്കപ്പെടുത്തുന്നതിനായി മങ്കിപോക്‌സ് എന്ന വാക്ക് ഉപയോഗിക്കപ്പെടാം എന്നതില്‍ ആശങ്കയുണ്ടെന്ന് ലോകാരോഗ്യ സംഘടന പറയുന്നു.
മങ്കിപോക്‌സ് 100ലധികം രാജ്യങ്ങളില്‍ വ്യാപിച്ചതിന് ശേഷം ഉയര്‍ന്നുവന്ന വംശീയവും കളങ്കപ്പെടുത്തുന്നതുമായ പ്രയോഗങ്ങളില്‍ ആശങ്കയുണ്ടെന്ന് ലോകാരോഗ്യ സംഘടന പറഞ്ഞു. പല രാജ്യങ്ങളും വ്യക്തികളും മങ്കിപോക്‌സ് എന്നുള്ള പേര് മാറ്റണമെന്ന് തങ്ങളോട് ആവശ്യപ്പെട്ടിട്ടുണ്ടെന്നും ലോകാരോഗ്യ സംഘടന വ്യക്തമാക്കി. മങ്കിപോക്‌സിന്‍റെ സാഹചര്യത്തെ ആഗോള അടിയന്തരാവസ്ഥയായി ലോകാരോഗ്യ സംഘടന പ്രഖ്യാപിച്ചത് മുതല്‍ തന്നെ പേര് മാറ്റത്തെ കുറിച്ച് വിദഗ്‌ധരുമായി അവര്‍ ചര്‍ച്ച ചെയ്‌തിരുന്നു.
ഇതിന് മുമ്പ് മങ്കിപോക്‌സ് വ്യാപനം ഉണ്ടാകാത്ത പല രാജ്യങ്ങളിലുമായി 80,000ത്തിലധികം കേസുകള്‍ ഈ വര്‍ഷം റിപ്പോര്‍ട്ട് ചെയ്‌തു. പശ്ചിമ മധ്യ ആഫ്രിക്കയ്ക്ക് പുറത്ത് മങ്കിപോക്‌സ് രോഗം വലിയ രീതിയില്‍ വ്യാപിച്ചിരുന്നില്ല.
സ്വവര്‍ഗ അനുരാഗികള്‍ സൂക്ഷിക്കണം : ആഫ്രിക്കയ്ക്ക് പുറത്ത് മങ്കിപോക്‌സ് വന്നവരില്‍ ഏതാണ്ട് എല്ലാവരും സ്വവര്‍ഗ അനുരാഗികളായ പുരുഷന്‍മാരാണ്. ബെല്‍ജിയത്തിലും സ്‌പെയിനിലുമായി നടന്ന രണ്ട് സെക്‌സ് പാര്‍ട്ടികളില്‍ നിന്നാണ് പശ്ചിമ യൂറോപ്പില്‍ മങ്കിപോക്‌സ് രോഗം വ്യാപിച്ചതെന്നാണ് ഗവേഷകര്‍ വിലയിരുത്തിയത്. വാക്‌സിനേഷനും രോഗം നിയന്ത്രിക്കാനായി രോഗവ്യാപന സ്രോതസുകളില്‍ നടത്തിയ ഇടപെടലും മങ്കിപോക്‌സിനെ യൂറോപ്പില്‍ നിലവില്‍ ഏതാണ്ട് നിയന്ത്രണവിധേയമാക്കിയിട്ടുണ്ട്.
രോഗം പിടിപെട്ട അണ്ണാന്‍, എലി തുടങ്ങിയവയുടെ സാമീപ്യത്തില്‍ നിന്നാണ് ആഫ്രിക്കയില്‍ ഈ രോഗം പിടിപെടുന്നത്. വാക്‌സിന്‍ ആവശ്യത്തിന് ലഭ്യമല്ലാത്തതിനാല്‍ മങ്കിപോക്‌സുമായി ബന്ധപ്പെട്ട മരണങ്ങള്‍ കൂടുതലും ആഫ്രിക്കയിലാണ്.
മങ്കിപോക്‌സ് രോഗത്തെ ആഫ്രിക്കയില്‍ നിന്ന് പൂര്‍ണമായി ഇല്ലാ‍താക്കുക അസാധ്യമാണെന്നാണ് യുഎസ് ആരോഗ്യ വിദഗ്‌ധര്‍ പറയുന്നത്. അതുകൊണ്ടുതന്നെ സ്വവര്‍ഗ അനുരാഗികള്‍ക്ക് ഈ രോഗം വരും നാളുകളിലും ഭീഷണി സൃഷ്‌ടിക്കുന്നുണ്ടെന്ന് അവര്‍ വ്യക്തമാക്കി.
1958ലാണ് മങ്കിപോക്‌സ് എന്ന് ആദ്യമായി നാമകരണം ചെയ്യുന്നത്. ഗവേഷണത്തിനായി ബെല്‍ജിയത്തില്‍ നിരീക്ഷിച്ച് കൊണ്ടിരുന്ന കുരങ്ങന്‍മാരില്‍ ഈ രോഗം കണ്ടെത്തിയതുകൊണ്ടാണ് ഇങ്ങനെയൊരു പേരിട്ടത്. എന്നാല്‍ ഇതാദ്യമായാണ് ഒരു രോഗത്തിന്‍റെ പേര് ദശാബ്‌ദങ്ങള്‍ക്ക് ശേഷം മാറ്റാന്‍ ലോകാരോഗ്യ സംഘടന ശുപാര്‍ശ നല്‍കുന്നത്.
