ബാഗ്‌ദാദ്: ഇറാഖ് തലസ്ഥാനമായ ബാഗ്‌ദാദിലെ യുഎസ് എംബസിക്ക് നേരെ റോക്കറ്റ് ആക്രമണം. ഞായറാഴ്‌ച പുലർച്ചെയോടെയുണ്ടായ ആക്രമണത്തില്‍ ആളപായം റിപ്പോർട്ട് ചെയ്‌തിട്ടില്ല. എംബസിക്ക് സമീപമായി നിരവധി റോക്കറ്റുകൾ പതിച്ചതായി യുഎസ് സൈനിക വൃത്തങ്ങൾ അറിയിച്ചു.
ഇറാഖിലെ യുഎസ് സൈനികരെയും എംബസിയെയും ലക്ഷ്യമിട്ട് ഒക്‌ടോബറിന് ശേഷമുണ്ടാകുന്ന 19-ാം ആക്രമണമാണിത്. വിദേശ രാജ്യങ്ങളുടെ എംബസികൾ ഉൾപ്പെട്ട ബാഗ്‌ദാദിലെ ഗ്രീൻ സോണിലായിരുന്നു റോക്കറ്റ് ആക്രമണം. ആക്രമണത്തില്‍ എത്രത്തോളം നാശനഷ്‌ടങ്ങൾ സംഭവിച്ചെന്ന് വ്യക്‌തമായിട്ടില്ല. ഇറാൻ സൈനിക മേധാവി ഖാസിം സുലൈമാനിയെ അമേരിക്ക വ്യോമാക്രമണത്തില്‍ വധിച്ച ശേഷം മേഖല സംഘർഷഭരിതമാണ്.
