കീവ്: യുക്രൈനിലെ നഗരങ്ങളില്‍ റഷ്യ ഷെല്ലാക്രമണം കടുപ്പിച്ചു. യുക്രൈനിന്‍റെ വടക്ക്, തെക്ക്, മധ്യഭാഗങ്ങളിലുള്ള നഗരങ്ങളിലാണ് ഷെല്ലാക്രമണം കടുപ്പിച്ചത്. ഇവിടങ്ങളിലെ ജനങ്ങളെ സുരക്ഷിത സ്ഥാനങ്ങളിലേക്ക് മാറ്റാനുള്ള രണ്ടാമത്തെ ശ്രമവും പരാജയപ്പെട്ടെന്ന് യുക്രൈനിയന്‍ അധികൃതര്‍ പറഞ്ഞു.
യുക്രൈനിലെ ജനങ്ങളോട് റഷ്യയ്‌ക്കെതിരെ അണിനിരക്കാന്‍ യുക്രൈന്‍ പ്രസിഡന്‍റെ വൊളാദിമിര്‍ സെലന്സ്കി ജനങ്ങളോട് ആഹ്വാനം ചെയ്തു. അതേസമയം യുക്രൈന്‍ അക്രമങ്ങള്‍ അവസാനിപ്പിച്ചാല്‍ മാത്രമെ റഷ്യയുടെ യുക്രൈനിലെ സൈനിക നടപടികള്‍ അവസാനിപ്പിക്കുകയുള്ളൂവെന്ന് റഷ്യന്‍ പ്രസിഡന്‍റ് വ്ളാദ്മിര്‍ പുടിന്‍ പറഞ്ഞു. കിഴക്കന്‍ യുക്രൈനിലെ റഷ്യന്‍ അനുകൂല വിമതര്‍ നിയന്ത്രിക്കുന്ന പ്രദേശങ്ങളില്‍ യുക്രൈന്‍ ആക്രമണം അഴിച്ചുവിടുന്നു എന്നാരോപിച്ചാണ് യുക്രൈനില്‍ റഷ്യ സൈനിക നടപടി തുടങ്ങിയത്.
യുക്രൈന്‍ തലസ്ഥാനമായ കീവിന്‍റെ പ്രാന്തപ്രദേശങ്ങള്‍, വടക്കുള്ള ചെര്‍നീവ്, തെക്കുള്ള മൈക്കലീവ്, വടക്ക് കിഴക്കുള്ള ഖാര്‍ക്കീവ് തുടങ്ങിയ നഗരങ്ങളില്‍ കടുത്ത ഷെല്ലാക്രമണമാണ് ഇന്നലെ(6.03.2022) റഷ്യ നടത്തിയതെന്ന് യുക്രൈനിയന്‍ അധികൃതര്‍ വ്യക്തമാക്കി. ഖാര്‍ക്കീവില്‍ നടന്ന പീരങ്കിയാക്രമണത്തില്‍ ഒരു പ്രാദേശിക ടെലിവിഷന്‍ ചാനലിന്‍റെ ആസ്ഥാനം തകര്‍ന്നു. തെക്കന്‍ യുക്രൈനിലും തീരമേഖലകളിലും റഷ്യന്‍ സേന വലിയമുന്നേറ്റമാണ് നടത്തിയത്.
കടുത്തപ്രതിരോധം ഉയര്‍ത്തി യുക്രൈന്‍
എന്നാല്‍ യുക്രൈനിന്‍റെ പല മേഖലകളിലും കടുത്ത പ്രതിരോധമാണ് റഷ്യന്‍ സേന നേരിടുന്നത്. കീവിനെ ലക്ഷ്യമാക്കി നീങ്ങിയ റഷ്യന്‍ സൈനികവ്യൂഹത്തിന്‍റെ പ്രയാണം കീവിന് വടക്കായി നിലച്ചിരിക്കുകയാണ്. തെക്കന്‍ തുറമുഖ നഗരമായ മരിയാപോളില്‍ ഭക്ഷണത്തിനും വെള്ളത്തിനും മരുന്നിനും കടുത്ത ക്ഷാമം നേരിടുകയാണ്. മരിയാപോളില്‍ ദുരന്തനിവാരണ പ്രവര്‍ത്തനങ്ങള്‍ക്കും രക്ഷാദൗത്യത്തിനും വേണ്ടി 11 മണിക്കൂര്‍ വെടിനിര്‍ത്തില്‍ യുക്രൈന്‍ റഷ്യന്‍ സേനകള്‍ പ്രഖ്യാപിച്ചിരുന്നു. എന്നാല്‍ റഷ്യ ആക്രമണം പുനഃരാരംഭിച്ചതോടെ ദുരന്തനിവാരണ ഇടനാഴി അടക്കേണ്ടി വന്നതായി യുക്രൈനിയന്‍ അധികൃതര്‍ വ്യക്തമാക്കി.
അതേസമയം റഷ്യ യുക്രൈന്‍ മൂന്നാംവട്ട സമാധാന ചര്‍ച്ച ഇന്ന് നടക്കും. എന്നാല്‍ ഈ സമാധാന ചര്‍ച്ചയില്‍ പ്രതീക്ഷവെക്കാതെയുള്ള പ്രതികരണമാണ് യുക്രൈനിയന്‍ പ്രസിഡന്‍റ് വൊളാദിമിര്‍ സെലന്‍സ്കിയില്‍ നിന്ന് ഉണ്ടായത്. റഷ്യയുടെ നിയന്ത്രണത്തിലായ പ്രദേശങ്ങളിലെ ജനങ്ങളോട് റഷ്യയ്‌ക്കെതിരെ തെരുവില്‍ പോരാടാനുള്ള ആഹ്വാനമാണ് സെലന്സ്കി ടെലിവിഷനിലൂടെ നടത്തിയത്. " ഈ പൈശാചിക ശക്തിയെ(റഷ്യന്‍ സേന) നമ്മുടെ മണ്ണില്‍ നിന്ന് ആട്ടിയോടിക്കേണ്ടത് നമ്മുടെ പ്രഥമ പരിഗണനയാണ് " അദ്ദേഹം പറഞ്ഞു.
രണ്ടാംലോകമഹായുദ്ധത്തിന് ശേഷമുള്ള ഏറ്റവും വലിയ പലായനം
അമേരിക്കയോടും നാറ്റോ രാജ്യങ്ങളോടും കൂടുതല്‍ യുദ്ധവിമാനങ്ങളും സെലന്സ്കി ആവശ്യപ്പെട്ടു. പക്ഷെ എങ്ങനെ ഈ അവസരത്തില്‍ യുദ്ധവിമാനങ്ങള്‍ യുക്രൈനില്‍ എത്തിക്കുമെന്ന് പ്രായോഗിക ബുദ്ധിമുട്ടുകള്‍ നിലനില്‍ക്കുകയാണ്. റഷ്യയ്‌ക്കെതിരെ കൂടുതല്‍ ഉപരോധം ഏര്‍പ്പെടുത്താനും പാശ്ചാത്യ രാജ്യങ്ങളോട് സെലന്സ്കി ആവശ്യപ്പെട്ടു. 12ാം ദിവസത്തില്‍ എത്തിനില്‍ക്കുന്ന യുദ്ധത്തില്‍ 15 ലക്ഷം ആളുകളാണ് ഇതുവരെ യുക്രൈനില്‍ നിന്ന് പാലയനം ചെയ്‌തത്.
രണ്ടാം ലോക മഹായുദ്ധത്തിന് ശേഷം യൂറോപ്പിലെ ഏറ്റവും വേഗത്തില്‍ വര്‍ധിച്ചുകൊണ്ടിരിക്കുന്ന പാലയനമാണ് ഇപ്പോള്‍ നടന്നുകൊണ്ടിരിക്കുന്നതെന്ന് യുഎന്‍ വ്യക്തമാക്കി. യുക്രൈനിന് ചുറ്റും വിന്യസിച്ചിരുന്ന 95ശതമാനം റഷ്യന്‍ സൈനികരും ഇപ്പോള്‍ യുക്രൈനില്‍ കടന്നിട്ടുണ്ടെന്ന് അമേരിക്കന്‍ സൈനിക കേന്ദ്രങ്ങള്‍ വിലയിരുത്തുന്നു. കീവും, ഖാര്‍ക്കിവും, ചെര്‍നീവും പിടിച്ചെടുക്കാനുള്ള റഷ്യന്‍ സേനയുടെ മുന്നേറ്റത്തിന് കടുത്ത പ്രതിരോധമാണ് യുക്രൈന്‍ സൈന്യത്തിന്‍റെ ഭാഗത്തുനിന്ന് ഉണ്ടാവുന്നതെന്നും അമേരിക്കന്‍ പ്രതിരോധ ഉദ്യോഗസ്ഥര്‍ വ്യക്തമാക്കി. കീവിന് പുറത്തുള്ള റഷ്യന്‍ സൈനിക വ്യൂഹത്തിന്‍റെ പ്രയാണം ഇപ്പഴും നിശ്ചലമായി തുടരുകയാണെന്നും ഇവര്‍ വ്യക്തമാക്കി.
ലക്ഷ്യം യുക്രൈനിന്‍റെ മിലട്ടറി ഇന്‍ഡസ്ട്രിയല്‍ കോപ്ലക്‌സ്
യുദ്ധത്തിന് യുക്രൈനിയന്‍ സര്‍ക്കാറിനെയാണ് തുര്‍ക്കി പ്രസിഡന്‍റ് തയീപ് എര്‍ദോഗനുമായുള്ള ചര്‍ച്ചയില്‍ റഷ്യന്‍ പ്രസിഡന്‍റ് വ്ളാദിമിര്‍ പുടിന്‍ കുറ്റപ്പെടുത്തിയത്. റഷ്യയുടെ എല്ലാ ആവശ്യങ്ങളും അംഗീകരിച്ച് യുക്രൈന്‍ ആക്രമണം അവസാനിപ്പിക്കണമെന്നാണ് പുടിന്‍ ആവശ്യപ്പെടുന്നത്. നവ നാസികളാണ് യുക്രൈനില്‍ ഇപ്പോള്‍ അധികാരത്തില്‍ ഉള്ളതെന്നും ആണവായുധം വികസിപ്പിച്ച് റഷ്യയുടെ സുരക്ഷ ഭീഷണിയിലാക്കാനാണ് അവരുടെ ശ്രമം എന്നടക്കമുള്ള ആരോപണങ്ങള്‍ ഉന്നയിച്ചാണ് റഷ്യ യുക്രൈനില്‍ അധിനിവേശം തുടങ്ങിയത്.
യുക്രൈനിന്‍റെ മിലട്ടറി ഇന്‍ഡസ്ട്രിയല്‍ കോപ്ലംക്സിനെ തകര്‍ക്കുകയാണ് സൈനിക നടപടിയുടെ ലക്ഷ്യമെന്ന് റഷ്യന്‍ പ്രതിരോധ മന്ത്രാലയം വ്യക്തമാക്കി. റഷ്യന്‍ പ്രതിരോധ മന്ത്രാലയത്തിന്‍റെ ഈ ഭീഷണിയെ പശ്ചാത്യരാജ്യങ്ങള്‍ വിമര്‍ശിച്ചില്ലെന്ന് പരാതി വൊളാദിമിര്‍ സെലന്സ്കി ഉന്നയിച്ചു. ഇതില്‍ പ്രതിഷേധിച്ച് ഒരു വാക്ക് പോലും ലോകനേതാക്കള്‍ പറഞ്ഞില്ലെന്ന് സെലന്സ്കി പ്രതികരിച്ചു.
ആണവസുരക്ഷയില്‍ പുടിന്‍-മക്രോണ്‍ ചര്‍ച്ച
ഖാര്‍ക്കീവിലെ ഒരു പരീക്ഷണ ആണവനിലയം തകര്‍ത്ത് അതിന്‍റെ ഉത്തരവാദിത്വം റഷ്യന്‍ സേനയില്‍ ആരോപിക്കാന്‍ യുക്രൈന്‍ സൈന്യം ഗൂഡാലോചന നടത്തുന്നുണ്ടെന്ന് റഷ്യ ആരോപിച്ചു. യുക്രൈനിലെ ആണവനിലയങ്ങളുടെ സുരക്ഷ സംബന്ധിച്ച് വ്ളാദിമിര്‍ പുടിനും ഫ്രഞ്ച് പ്രസിഡന്‍റ് ഇമ്മാനുവല്‍ മക്രോണും തമ്മില്‍ ചര്‍ച്ച നടത്തിയിരുന്നു. വൈദ്യുതി ഉല്‍പ്പാദിപ്പിക്കുന്ന 15 ആണവനിലയങ്ങളാണ് യുക്രൈനില്‍ ഉള്ളത്. ലോകത്തിലെ തന്നെ ഏറ്റവും വലിയ ആണവ അപകടമായ 1986ലെ ചെര്‍ണോബില്‍ ആണവദുരന്തം ഉണ്ടായതും യുക്രൈനിലാണ്.
ആണവസുരക്ഷയുമായി ബന്ധപ്പെട്ട വിഷയത്തില്‍ റഷ്യയും, യുക്രൈനും, യുഎന്‍ ആണവ നിരീക്ഷണ ഏജന്‍സിയും തമ്മില്‍ ചര്‍ച്ചനടത്താന്‍ പുടിന്‍-മക്രോണ്‍ തമ്മിലുള്ള സംഭാഷണത്തില്‍ ധാരണയായതായി ഫ്രഞ്ച് സര്‍ക്കാര്‍ വൃത്തങ്ങള്‍ വ്യക്തമാക്കി. ഉടനെ ചര്‍ച്ചയുണ്ടാകുമെന്നാണ് ഫ്രഞ്ച് വൃത്തങ്ങള്‍ പറയുന്നത്. അതേസമയം യുക്രൈനിലെ സപ്പറേഷ്യയിലെ ആണവനിലയത്തിലുണ്ടായ തീപിടുത്തതിന് കാരണം യുക്രൈനിലെ 'തീവ്രവാദി'കളുടെ പ്രകോപന ഫലമാണെന്നും പുടിന്‍ ആരോപിച്ചു.
"ഒഴുകുന്നത് കണ്ണീരും ചോരപ്പുഴയും"
പോപ്പ് ഫ്രാന്‍സിസ് അടക്കമുള്ള ലോകനേതാക്കള്‍ പ്രശ്ന്ന പരിഹാരത്തിനുള്ള ചര്‍ച്ചയാരംഭിക്കാന്‍ പുടിനോട് ആവശ്യപ്പെട്ടിരുന്നു. സംഘര്‍ഷം അവസാനിപ്പിക്കാനായി രണ്ട് കര്‍ദിനാള്‍മാരെ യുക്രൈനിലേക്ക് അയച്ചിട്ടുണ്ടെന്ന് പോപ്പ് പറഞ്ഞു. യുക്രൈനില്‍ ചോരയുടെയും കണ്ണുനീരിന്‍റേയും പുഴകള്‍ ഒഴുകികൊണ്ടിരിക്കുകയാണെന്നാണ് ഞായറാഴ്ച കുര്‍ബാനയില്‍ പോപ്പ് പറഞ്ഞത്. സംഘര്‍ഷത്തില്‍ എത്രപേര്‍ മരിച്ചിട്ടുണ്ടെന്ന് ഇതുവരെ തിട്ടപ്പെടുത്താന്‍ സാധിച്ചിട്ടില്ലെന്ന് യുഎന്‍ വ്യക്തമാക്കി. ഇപ്പോള്‍ തങ്ങള്‍ക്ക് സ്ഥിരിക്കാന്‍ കഴിഞ്ഞതിനേക്കാള്‍ കൂടുതല്‍ മരണങ്ങള്‍ യുക്രൈനില്‍ നടന്നിട്ടുണ്ടെന്ന് യുഎന്‍ വ്യക്തമാക്കി.
ചെച്ചന്നിയയിലും സിറിയയിലും നടപ്പാക്കിയ തന്ദ്രം തന്നെയാണ് റഷ്യന്‍ സൈന്യം യുക്രൈനിലും നടപ്പിലാക്കുന്നതെന്ന് ബ്രിട്ടീഷ് സൈനിക ഉദ്യോഗസ്ഥര്‍ പറഞ്ഞു. നഗരങ്ങളെ വളഞ്ഞതിന് ശേഷം വ്യോമാക്രമണവും പീരങ്കി ആക്രമണവും അവിടങ്ങളില്‍ നടത്തുകയാണ് തന്ദ്രം. യുക്രൈനിയന്‍ ജനങ്ങളുടെ ആത്മവിശ്വാസം തകര്‍ക്കുകയാണ് ഇതിലൂടെ ലക്ഷ്യമിടുന്നതെന്നും ബ്രിട്ടീഷ് സൈനിക ഉദ്യോഗസ്ഥര്‍ പറഞ്ഞു.
നോഫ്ലൈസോണ്‍ പ്രഖ്യാപിക്കണമെന്ന ആവശ്യം വീണ്ടും ഉന്നയിച്ച് സെലന്സ്കി
യുക്രൈനില്‍ നാറ്റോ നോഫ്ലൈസോണ്‍ പ്രഖ്യാപിക്കണമെന്ന ആവശ്യം യുക്രൈന്‍ പ്രസിഡന്‍റ് വീണ്ടും ആവര്‍ത്തിച്ചു. നോഫ്ലൈസോണ്‍ പ്രഖ്യാപിച്ചാല്‍ റഷ്യയുടെ യുദ്ധവിമാനങ്ങള്‍ യുക്രൈനിന്‍റെ ആകശത്തൂടുകൂടി പറന്നാല്‍ വെടിവെച്ചിടും. എന്നാല്‍ നോഫ്ലൈസോണ്‍ എന്നുള്ള ആവശ്യം അംഗീകരിക്കാന്‍ ഇതുവരെ തയ്യാറായിട്ടില്ല നാറ്റോ. നോഫ്ലൈസോണ്‍ പ്രഖ്യാപിക്കുകയാണെങ്കില്‍ യുദ്ധം റഷ്യയും നാറ്റോയുമായി മാറുമെന്ന കാരണത്താലാണ് ഇത്.
റഷ്യന്‍ ആക്രമണത്തെ നേരിടാന്‍ ലോകത്തിന്‍റെ വിവിധഭാഗങ്ങളില്‍ നിന്നുള്ള ആളുകളെ ഉള്‍പ്പെടുത്തി വൊളണ്ടിയര്‍ സേനയെ രൂപികരിക്കാന്‍ പദ്ധതിയിടുകയാണ് യുക്രൈന്‍. ലോകം മൊത്തം യുക്രൈനിന്‍റെ പക്ഷത്ത് കേവലം വാക്കുകളിലൂടെ മാത്രമല്ല പ്രവര്‍ത്തിയിലൂടേയും നിലയുറപ്പിച്ചിരിക്കുകയാണെന്ന് യുക്രൈന്‍ വിദേശകാര്യമന്ത്രി ദിമിത്രോ കുലേബ പറഞ്ഞു.
കൂടുതല്‍ ആഗോള കമ്പനികള്‍ റഷ്യയില്‍ നിന്ന് പിന്‍മാറുന്നു
യുദ്ധം ആരംഭിച്ചതിന് ശേഷം റഷ്യയും പാശ്ചത്യ ലോകവുമായുള്ള ബന്ധം പാടെ നിലച്ച അവസ്ഥയാണ്. ഉപരോധങ്ങള്‍ റഷ്യന്‍ സമ്പദ്‌വ്യവസ്ഥയെ നല്ല രീതിയില്‍ ബാധിച്ചിട്ടുണ്ട്. പല ആഗോള കമ്പനികളും റഷ്യയിലെ പ്രവര്‍ത്തനങ്ങള്‍ അവസാനിപ്പിച്ചു. റഷ്യയുടെ റൂബിളിന്‍റെ മൂല്യം വലിയ രീതിയില്‍ ഇടിഞ്ഞു.
ലോകത്തെ ഏറ്റവും വലിയ നാല് കമ്പനികളില്‍ രണ്ടെണ്ണമായ കെപിഎംജിയും, പ്രൈസ്‌വാട്ടര്‍ ഹൗസ് കൂപ്പേഴ്‌സും റഷ്യന്‍ കമ്പനികളുമായുള്ള ബന്ധം അവസാനിപ്പിച്ചു. പുതിയ വിഡിയോകള്‍ പോസ്‌റ്റ് ചെയ്യാനോ, ലോകത്തിന്‍റ വിവിധ ഭാഗങ്ങളില്‍ നിന്ന് പങ്കുവെക്കപ്പെട്ട വീഡിയോകള്‍ കാണാനോ റഷ്യന്‍ ഉപയോക്താക്കള്‍ക്ക് ടിക്ടോകില്‍ കഴിയില്ലെന്ന് കമ്പനി പ്രഖ്യാപിച്ചു. വ്യാജവാര്‍ത്ത തടയാനെന്ന പേരില്‍ റഷ്യയില്‍ ഈയിടെ നടപ്പാക്കിയ നിയമത്തിനെയാണ് ടിക്ടോക് ഇതില്‍ കുറ്റം പറയുന്നത്.
പുതിയ നിയമപ്രകാരം റഷ്യ യുക്രൈന്‍ സംഘര്‍ഷത്തെ റഷ്യന്‍ അധിനിവേശമായി വിശേഷിപ്പിക്കുന്നത് കുറ്റകരമാണ്. ചൈനിസ് ടെക്‌കമ്പനിയായ ബൈറ്റ്ഡാന്‍സിന്‍റെ സബ്‌സിഡിയറി കമ്പനിയാണ് ടിക്ടോക്. പല പാശ്ചാത്യ മാധ്യമസ്ഥാപനങ്ങളുടെ വെബ്‌സൈറ്റുകളും, ട്വിറ്ററും, ഫേസ്‌ബുക്കും റഷ്യയില്‍ തടയപ്പെട്ടിരിക്കുകയാണ്. നെറ്റ്ഫ്ലിക്സും റഷ്യയിലെ പ്രവര്‍ത്തനങ്ങള്‍ അവസാനിപ്പിച്ചു.
ALSO READ: നെറ്റ്ഫ്ലിക്സും ടിക്‌ടോക്കും റഷ്യയില്‍ പ്രവര്‍ത്തനം അവസാനിപ്പിച്ചു
